ޚަބަރު
މޯލްޑިވްސް ޕޮލިޓެކްނިކް ޒަމާނީކޮށް ރީބްރޭންޑް ކުރުމަށް ނިންމައިފި

މޯލްޑިވްސް ޕޮލިޓެކްނިކް
މޯލްޑިވްސް ޕޮލިޓެކްނިކް ޒަމާނީކޮށް ރީބްރޭންޑް ކުރުމަށް ނިންމާފައިވާކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވަޒީރު ޑރ. މަރްޔަމް މާރިޔާ ވިދާޅުވެއްޖެއެވެ. އެކަމަނާ މިހެން ވިދާޅުވީ ސަރުކާރަށް 1 އަހަރުވުމާއި ގުޅިގެން ޕީއެސްއެމް ނިއުސްއިން ގެނެސްދޭ "ހަފުތާ 52" ޕްރޮގުރާމްގައި ވާހަކަފުޅުދައްކަވަމުންނެވެ.
ވަޒީރު ޑރ. މާރިޔާ ވިދާޅުވީ ޕޮލިޓެކްނިކް ޒަމާނީކުރުމުގެ މަސައްކަތް ވަރަށް އަވަހަށް ފަށްޓަވާނެކަމަށެވެ. މިހާރުގެ ޒުވާނުން ބޭނުންވަނީ އުފާވެރި މާހައުލެއްގައި ކިޔެވޭނެ މަގު ތަނަވަސްވުމަށްކަން ފާހަގަކުރައްވާ، މިހާރު ޕޮލިޓެކްނިކްގައި އެފަދައިން އިންތިޒާމްތައް ހަމަޖެހިފައިނުވާ ކަމަށް އެކަމަނާ ވިދާޅުވިއެވެ.
އެތަނުގައި ކިޔައިވައިދެމުންދަނީ އެންމެ ކުރީގެ ގޮތްތަކަށް އަދިވެސް. ނަމަވެސް ކިޔަވައިދިނުމުގައި ޓެކްނޮލޮޖީގެ އެކި ވަސީލަތްތަކުގެ ބޭނުން ހިފަންޖެހޭ. އަދި އޮންލައިންކޮށް ކިޔަވައިދިނުމުގެ ފުރުސަތުވެސް ޤާއިމުކުރުމުގެ މަސައްކަތް ކުރުމުގެ ވިސްނުން އެބަހުރި
ވަޒީރު ޑރ. މާރިޔާ ވިދާޅުވިއެވެ.
ޕޮލިޓެކްނިކް ޒަމާނީކުރާއިރު، އެންމެ ފަހުގެ މޮޑެލަށް، ޒަމާނީ ވަސީލަތްތަކާއެކު ކިޔަވައިދޭނެކަމަށާއި، އެތަން ރީބްރޭންޑު ކުރުމަށްވެސް ނިންމާފައިވާކަން ވަޒީރު ފާހަގަކުރެއްވިއެވެ.
12 އޭޕްރީލް 2010 ގައި އުފައްދާފައިވާ މޯލްޑިވްސް ޕޮލިޓެކްނިކަކީ އެކި ދާއިރާތަކުން ރާއްޖެއަށް ބޭނުންވާ ހުނަރުވެރި މަސައްކަތްތެރިން ތަމްރީނު ކުރުމަށާއި، ވަޒީފާތަކަށް ކުރިމަތިލާ ޒުވާނުންނަށް އެދާއިރާއަކުން ސީދާގޮތެއްގައި ފަންނީ ތަމްރީނުދިނުމަށް ސަރުކާރުން އުފައްދަވާފައިވާ މުއައްސަސާއެކެވެ. ސެޓްފިކެޓް ލެވެލުން ފެށިގެން ޑިޕްލޮމާއާއިހަމައަށް ކިޔެވުމުގެ ފުރުޞަތު އޮންނަ ޕޮލިޓެކްނިކުން އެކިދާއިރާތަކުން ދަނީ ފަންނީ ތައުލީމު އުނގަންނައިދެމުންނެވެ. މީގެ އިތުރަށް ޕޮލިޓެކްނިކްގެ ކެމްޕަސްތައް ރާއްޖޭގެ އެކި ސަރަހައްދުތަކުގައި ޤާއިމުކޮށް ދަނީ ޒުވާނުން ތަމްރީންކުރަމުންނެވެ.