ދުނިޔެ
އިންޑޮނީޝިޔާގެ ބިންގަނޑު ކަނޑައިގެންގޮސް 27 މީހުން މަރުވެއްޖެ

އިންޑޮނޭޝިއާގެ ބިންގަނޑުކަނޑައިގެްނ ދިޔަ ސަރަހައްދަު ފޮޓޯ: އިންޓަނެޓް
އިންޑޮނީޝިޔާގެ އުތުރު ސުމާތުރާ ޕުރޮވިންސަށް ކުރަމުންދާ ވިއްސާރައާ ގުޅިގެން ހިނގި ބިންގަނޑު ކެނޑުމާއި ކިސަޑު ފޭބުމުގެ ހާދިސާތަކުގައި މަރުވި މީހުންގެ އަދަދު 27 އަށް އަރައިފިއެވެ. މި ހާދިސާގައި ގެއްލިފައިވާ ކަމަށް ބެލެވޭ ގިނަ އަދަދެއްގެ މީހުން ހޯދުމުގެ މަސައްކަތް ކަމާބެހޭ އިދާރާތަކުން މިހާރުދަނީ ކުރަމުންނެވެ.
އުތުރު ސުމާތުރާ ޕުރޮވިންސުގެ ފުލުހުން މަޢުލޫމާތު ދީފައިވާ ގޮތުގައި، ކިސަޑުގެ ދަށުވެފައިވާ ބަހެއްގައި ތިބި ބަޔަކު ފެނިފައިވެއެވެ. މިހާރު އެ ބަހުގައި ތާށިވެފައިވާ މީހުން ސަލާމަތްކުރުމަށް ޚާއްޞަ ޓީމުތަކުން މަސައްކަތް ކުރަމުންދެއެވެ.
އިންޑޮނީޝިޔާގެ ކާރިސާތަކާބެހޭ ޤައުމީ އިދާރާއިން ބުނެފައިވާ ގޮތުގައި، ފާއިތުވި ހަފުތާއެއްހާ ދުވަހުގެ ތެރޭގައި މެދުކެނޑުމެއްނެތި ބޯކޮށް ވާރޭވެހުމާ ގުޅިގެން އުތުރު ސުމާތުރާގެ ހަތަރު ސަރަޙައްދެއްގައި ފެންބޮޑުވެ، ބިންގަނޑު ކެނޑި، ކިސަޑު ފޭބުމުގެ ހާދިސާތައް ހިނގާފައިވެއެވެ.
އުތުރު ސުމާތުރާގެ ފުލުހުންގެ އިދާރާގެ ތަރުޖަމާނު ހާދީ ވަޙިޔޫދީ ވިދާޅުވި ގޮތުގައި، ދެލީ ސަރްދާންގގެ އަވަށެއްގައި ހިނގި ބިންގަނޑު ކެނޑުމުގެ ހާދިސާއެއްގައި ހަތް މީހުން މަރުވެ، އިތުރު 20 މީހުން ޒަޚަމުވެފައިވެއެވެ. އަދި ގިނަ އަދަދެއްގެ މީހުން ގެއްލިފައިވާ ކަމަށް ޤަބޫލުކުރެވޭ ކަމަށާއި، ނަމަވެސް އެ މީހުންގެ ސީދާ އަދަދު ކަށަވަރުކޮށް ދެވެން ނެތް ކަމަށް އޭނާ ވިދާޅުވިއެވެ.
މީގެ އިތުރުން، އުތުރު ސުމާތުރާގެ އެހެން ސަރަޙައްދަކުން ގެއްލުނު ކަމަށް ބެލެވޭ އިތުރު 20 މީހެއްގެ ހަށިގަނޑު ފެނިފައިވާ ކަމަށާއި، އަދިވެސް ގެއްލިފައިވާ އިތުރު ދެ މީހަކު ހޯދުމުގެ މަސައްކަތް ކުރިއަށްދާ ކަމަށް ފުލުހުން މަޢުލޫމާތު ދީފައިވެއެވެ.
މި ހާދިސާތަކުގައި ގެއްލުން ލިބިފައިވާ ސަރަޙައްދުތަކުގެ ތެރޭގައި ކާރޯ، ޕަޑަންގ ލަވާސް، ތަޕަނުލީ ސްލާތާން އަދި ދޭލީ ސަރްދާންގ ހިމެނެއެވެ. އިންޑޮނީޝިޔާގެ ކާރިސާތަކާބެހޭ އިދާރާއިން ބުނެފައިވާ ގޮތުގައި، ބިންގަނޑު ކެނޑިފައިވާ ސަރަޙައްދުތަކުގައި ޢާންމުންގެ ގެދޮރާއި މިސްކިތްތަކަށް ބޮޑެތި ގެއްލުންތަކެއް ލިބި، ގޮވާން ދަނޑުތަކުގައި ފެންބޮޑުވެފައިވެއެވެ.