އެމެރިކާއަށް ދަތުރުކުރުމުގައި އީރާނަށް އަޅާފައިވާ ހުރަސްތަކަށް ލުއި ނުދޭން ނިންމައިފި

ވޯލްޑް ކަޕްގައި ލޮސް އެންޖެލިސް އާއި ސިއެޓްލްގައި ކުޅޭ މެޗުތަކަށް ދަތުރުކުރުމުގައި އީރާނުގެ ޓީމަށް ކުރިމަތިވެފައިވާ ހުރަސްތަކަށް ލުޔެއް ނުދޭން އެމެރިކާއިން ނިންމައިފިއެވެ.

 މިކަމާ ގުޅިގެން ފީފާއަށް ޝަކުވާ ހުށަހަޅާނެ ކަމަށް އީރާނުން ބުނެފައިވީ ނަމަވެސް، އެމެރިކާގެ ކަމާބެހޭ އިސް އޮފިޝަލުން ވަނީ ކުރިން އޮތް ޕްލޭނަށް ބަދަލެއް ނުގެންނާނެކަން ކަށަވަރުކޮށްދީފައެވެ.

ވައިޓް ހައުސް ޓާސްކް ފޯސްގެ އެގްޒެކެޓިވް ޑައިރެކްޓަރު އެންޑްރޫ ގިއުލިއާނީ ރޮއިޓާސް ނިއުސް އެޖެންސީއަށް މައުލޫމާތު ދެއްވަމުން ވިދާޅުވީ، އީރާނު ޓީމުގެ ދަތުރުފަތުރުގެ ކަންކަން މޮނިޓަރ ކުރަމުންދާނެ ކަމަށާއި، ނަމަވެސް މިވަގުތަށް އޮތީ ކުރިންވެސް ކަނޑައެޅިފައިވާ އުސޫލު ކަމަށެވެ. މި އުސޫލުގެ ދަށުން އީރާނު ޓީމަށް މެޗު ކުޅޭ ސަރަހައްދަށް ދެވޭނީ މެޗު ފެށުމުގެ 24 ގަޑިއިރު ކުރިންނެވެ. އަދި މެޗު ނިމުމާއެކު އެނބުރި މެކްސިކޯގެ ޓިޖުއާނާގައި ހުންނަ އެ ޓީމުގެ ޓްރޭނިންގ ބޭސްއަށް ދާންޖެހެއެވެ.

މި ހަރުކަށި އުސޫލުތަކާ މެދު ހިތްހަމަނުޖެހުން ފާޅުކުރަމުން އީރާނުގެ ކޯޗު އާމިރު ގަލެނޯއީ ބުނީ، އޭނާގެ ޓީމަކީ މުޅި ވޯލްޑް ކަޕްގައިވެސް އޮތް "އެންމެ ބޮޑަށް އަނިޔާ ލިބެމުންދާ ޓީމު" ކަމަށެވެ. ނިއުޒީލެންޑާ ދެކޮޅަށް ކުޅުނު ފުރަތަމަ މެޗަށްފަހު، ކުޅުންތެރިންނަށް އަރާމުކޮށްލުމަށް ހޮޓަލުގައި މަޑުކޮށްލުމުގެ ފުރުސަތު ނުލިބި، މެޗު ނިމުނުތާ މަދު ގަޑިއިރުތަކެއްގެ ތެރޭގައި އެމެރިކާއިން ފުރަން ޖެހުމުން ގިނަ ބައެއްގެ ފާޑުކިޔުން ވަނީ އަމާޒުވެފައެވެ.

ވިސާގެ މައްސަލަތަކާއި ސަލާމަތީ ކަންކަން
އީރާނުގެ ވިންގަރ މެހްދީ ތޮރާބީގެ ވިސާގެ މުއްދަތު ފުރަތަމަ މެޗަށްފަހު ހަމަވުމުން ދިމާވި މައްސަލަ މިހާރު ހައްލުކޮށްފައިވާ ކަމަށް އެމެރިކާގެ ސްޓޭޓް ޑިޕާޓްމަންޓުން ވަނީ ބުނެފައެވެ. ނަމަވެސް ބައެއް އޮފިޝަލުންނަށް އަދިވެސް ވިސާ ނުލިބޭކަން ފާހަގަކުރައްވަމުން ގިއުލިއާނީ ވިދާޅުވީ، އެއީ ބައެއް އޮފިޝަލުންގެ ފަރާތުން ފެނިފައިވާ ނުރަނގަޅު މައުލޫމާތުތަކެއްގެ ސަބަބުން ސަލާމަތީ ފިޔަވަޅެއްގެ ގޮތުން ނިންމާފައިވާ ނިންމުމެއް ކަމަށެވެ.

ގިއުލިއާނީ އިތުރަށް ވިދާޅުވީ، އީރާނުގެ ޓްރޭނިންގ ބޭސް ޓޫސަންއިން ޓިޖުއާނާއަށް ބަދަލުކުރުމަކީ ދަތުރުގެ ވަގުތު ކުޑަވެގެންދިޔަ ކަމެއް ކަމަށެވެ. "މި ބަދަލުގެ ސަބަބުން ލޮސް އެންޖެލިސްއަށް ކުރާ ދަތުރުގެ ވަގުތު އެއް ގަޑިއިރު ކުޑަވެގެންދޭ. އަދި ފުރަތަމަ މެޗުގެ ކަންކަން ދިޔަ ގޮތާ މެދު އަޅުގަނޑުމެން ހިތްހަމަޖެހޭ،" އޭނާ ވިދާޅުވިއެވެ.

އީރާނުން އަންނަ އާދީއްތަ ދުވަހު ބެލްޖިއަމާ ދެކޮޅަށް ކުޅުމަށްފަހު، ވަގުތުން އެނބުރި މެކްސިކޯއަށް ދާންޖެހޭނެއެވެ. ނަމަވެސް އަންނަ ހުކުރު ދުވަހު ސިއެޓްލްގައި މިސްރާ ދެކޮޅަށް ކުޅޭ މެޗުގައި އަމަލުކުރާނެ ގޮތަކާ މެދު، ބެލްޖިއަމް މެޗަށްފަހު މަޝްވަރާ ކުރާނެ ކަމަށް އެމެރިކާއިން ވަނީ ބުނެފައެވެ. މިހާތަނަށް މުބާރާތަށް އެއްވެސް ނުރައްކަލެއް އޮތްކަން ފާހަގަކުރެވިފައި ނުވި ނަމަވެސް، ސަލާމަތީ ބާރުތަކުން ދަނީ ވަރަށް ބޮޑަށް ފާރަވެރިވަމުންނެވެ.