ކ.ގުޅީގައި ފާނަބަސަންދު ފެތުރުން ކޮންޓްރޯލް ކުރެވިއްޖެ

ކ.ގުޅީގައި ފާނަބަސަންދު ފެތުރުން ކޮންޓްރޯލް ކުރެވިއްޖެ ކަމަށް ހެލްތް ޕްރޮޓެކްޝަން އޮތޯރިޓީ(އެޗްޕީއޭ) އިން ބުނެފިއެވެ. 

މި ނޮވެންބަރު މަހުން ފެށިގެން ފާނަބަސަންދުގެ ކޭސްތަކެއް ކ.ގުޅީގައި ފެތުރި އިތުރުވަމުން ދާތީ އެޗްޕީއޭ އިން ވަނީ އެކަން ޢާންމުންގެ ސަމާލުކަމަށް ގެނެސްފައެވެ. އޭރު ފާނަބަސަންދުގެ ކޭސްތައް އެރަށުގައި ފެތުރެމުން ދިޔަނަމަވެސް މި ވޭތުވެދިޔަ ތިން ދުވަހު އެއްވެސް ކޭސްއެއް ފެނިފައި ނުވާކަމަށް އެޗްޕީއޭއިން ހާމަކޮށްފައިވެއެވެ. 

މިހާތަނަށް އެ ރަށުން ފެނިފައިވަނީ ފާނަބަސަންދުގެ 22 ކޭހެވެ.

ފާނަބަސަންދު ޖެހިގެން ދެ މީހަކަށް އައިޖީއެމްއެޗުގައި ފަރުވާދިން ނަމަަވެސް، އެ ދެމީހުން މިިހާރު ވަނީ ދޫކޮށްލާފައެވެ. އަދި މިވަގުތު ސީރިއަސް ވެގެން ފަރުވާދެމުންދާ މީހަކު ނެތް ކަމަށްވެސް އެޗްޕީއޭއިން ވަނީ ބުނެފައެވެ.

ގުޅީގައި ފާނަބަސަންދު ފެތުރުން ކޮންޓްރޯލް ކުރުމަށްޓަކައި މިހާތަނަށް 87 މީހަކަށް ވަނީ ވެކްސިން ދީފައިވެއެވެ. އޭގެ ތެރޭގައި ޞިއްޙީ މަރުކަޒުގައި މަސައްކަތް ކުރާ މުވައްޒަފުންނާއި އާއްމުން ހިމެނޭކަމަށާއި، މީގެ އިތުރުން އާންމުންނާއި، ސްކޫލް ކުދިންނާއި ބެލެނިވެރިންނަށް ބައްޔާއި ގުޅޭ މައުލޫމާތު ދިނުމުގެ ޙަރަކާތްތައް އެ ރަށުގައި ކުރިއަށް ގެންގޮސްފައިވާ ކަމަށްވެސް އެޗްޕީއޭއިން ބުނެފައިވެއެވެ.

އެޗްޕީއޭ ގެ ތަފާސްހިސާބުތަކަށް ބަލާއިރު ފާނަބަސަންދުގެ ކޭސްތައް އާންމުކޮށް ރާއްޖޭގެ އެކި ހިސާބުތަކުން ކޮންމެ އަހަރަކު ވެސް ރިޕޯޓް ކުރެއެވެ.

ފާނަބަސަންދަކީ ވައިރަހަކުން ޖެހޭ ބައްޔެކެވެ. އަދި މި ބައްޔަކީ އާއްމުކޮށް ކުޑަކުދިންނަށް ޖެހޭ ބައްޔެއް، ނަމަވެސް ބޮޑެތި މީހުންނަށްވެސް މި ބަލި ޖެހެއެވެ.

ބަލީގެ ޢަލާމާތްތައް:-

• ހުންއައުން
•  ވަރުދެރަވުން
• ނޭފަތުން ފެންއައުން
• ހަމުގައި ބިހިތަކެއް ނެގުން

 ފާނަބަސަންދު ޖެހުމުން ނަގާ މި ބިހިތައް ފެންފޮޅުތަކަކަށް ބަދަލުވެގެންދެއެވެ. މި ބިހިތަކަކީ ވަރަށް ހިރުވާ އަދި ފަސޭހައިން ފަޅައިގެންދާ ބިހިތަކެކެވެ. އަދި ދެތިން ދުވަސްތެރޭގައި ހަށިގަނޑުގެ އެކިތަންތާގައި ފެންބިހިގޮތައް ހުންނަ ބިހި ނަގަންފަށައެވެ.

ފާނަބަސަންދު ފެތުރޭގޮތް:-

• ބަލިޖެހިފައި ހުރި މީހަކު ކެއްސާ ކިނބިހި އަޅާ ހަދާއިރު، ނޭވާލާ ނިޒާމުގެ ޒަރީޔާއިން.
• ބަލި މީހާގެ ގައިގައި ބިހިނަގަން ފެށުމުން، އެމީހާގެ ގައިގައި ބީހުމުން ނުވަތަ އޭނާ ބޭނުންކޮށްފައިވާ ތުވާލި، އަންނައުނު ފަދަ ތަކެތީގައި ބީހުމުން

ގައިގައި ހުރި ބިހިތައް އެއްކޮށް ކުރަމަގާލިލަންދެން މި ބަލި އެކަކުގެގައިން އަނެކެއްގެ ގަޔަށް ފެތުރުމުގެ ފުރުސަތު އޮންނާނެއެވެ. ކުރިން ފާނަބަސަންދު ނުޖެހޭ ކޮންމެ މީހަކީ މިބަލިޖެހިދާނެ މީހެކެވެ. އެއްފަހަރު މި ބަލި ޖެހިއްޖެނަމަ ދެވަނަ ފަހަރަށް މި ބަލި ޖެހުމުގެ ފުރުސަތު ވަރަށް ކުޑައެވެ.

ބަލިޖެހިފައިވާ މީހުން ގާތަށް ޒިޔާރަތްނުކުރުމާއި، މިބަލިޖެހިފައިވާ މީހާ އޭނާގެ ގައިގައި ނަފާފައިވާ ބިހިތައް އެއްކޮށް ކުރަމަގާލިލަންދެން ބޭރު ތެރެއަށް ނުނިކުތުމާއި، ފާނަބަސަންދު ޖެހިއްޖެނަމަ ގޭގައި އުޅޭ އެހެން މީހުންނާ އެކަހެރިވުމަކީ ފާނަބަސަންދު ޖެހުމުން ރައްކާތެރިވުމަށް އެޅިދާނެ ފިޔަވަޅު ތަކެކެވެ. 

މީގެއިތުރުންބަލި ފަސޭހަވަންދެން ހިފާ ގެންގުޅޭ ތަކެތި ( އަންނައުނު، ތުވާލި ކުޅޭ އެއްޗިހި ފަދަ ތަކެތި ) ވަކި ކުރުމަކީ ވެސް އެޅިދާނެ ފިޔަވަޅެކެވެ. 

މި ބަލިން ރައްކާތެރިވުމަށް ޗިކަންޕޮކްސް ވެކްސިން ޖެހުން މުހިންމެވެ. ފާނަބަސަންދުން ރައްކާތެރިވުމަށް ޖަހާ ވެކްސިން އާއްމުގޮތެއްގައި ފާމަސީތަކުން ލިބެންހުންނާނެއެވެ.