ނުޞައިރަތަށް ދިން އެންމެ ފަހުގެ ހަމަލާތަކުގައި އަލްޖަޒީރާގެ ނޫސްވެރިއަކަށް އަނިޔާވެެއްޖެ

ޣައްޒާގެ ނުޞައިރަތަށް އިޒްރާއިލް ސިފައިން އެންމެ ފަހުން ދިން ހަމަލާތަކުގައި އަލްޖަޒީރާގެ ނޫސްވެރިޔަަކަށް އަނިޔާވެފައިވާކަމަށް އަލްޖަޒީރާއިން ރިޕޯޓުކޮށްފިއެވެ. 

ނުޞައިރަތް ރެފިޔުޖީ ކޭމްޕަށް އިޒްރާއިލުގެ ސިފައިން އެންމެ ފަހުން ދިން ހަމަލާތަކުގެ ސަބަބުން އެކަކު ޝަހީދުވެފައިވާ ކަމަށް އަލްޖަޒީރާގައި ވަނީ ރިޕޯޓުކޮށްފައެވެ. 

ނުޞައިރަތަށް ދިން މި ހަމަލާގައި އަނިޔާވެފައިވަނީ އަލްޖަޒީރާގެ ކެމެރާމަންއަކަށެވެ. އަލްޖަޒީރާއިން ބުނެފައިވަނީ ފާއިތުވި ދެތިން ގަޑިއިރުގެ ތެރޭގައި ވަރުގަދަ ބޮމުގެ ހަމަލާތަކެއް ކެމްޕަށް އަމާޒުކޮށްފައިވާ ކަމަށެވެ.

އަދި މިހަމަލާތައް އަމާޒުކޮށްފައިވަނީ ހަމައެކަނި މީހުން ދިރިއުޅޭ  މީހުން ދިރިއުޅޭ އިމާރާތްތަކާއި ގެދޮރުތަކަށް ނޫން ކަމަށާއި މިސްކިތްތަކާއި އާންމު އެހެން ވަސީލަތްތަކަށް ވެސް އަމާޒުކޮށްފައިވާ ކަމަށް އަލްޖަޒީރާގައި ވަނީ ބުނެފައެވެ.

 އޭގެ ތެރެއިން އެއް ހަމަލާއަކީ ޣައްޒާ ސިޓީން ގެދޮރު ގެއްލިފައިވާ އާއިލާތަށް ދިރިއުޅެމުންދާ ގެއަކަށް ދިން ހަމަލާއެކެވެ. އެ ހަމަލާގައި  އެއް އާއިލާގެ ހަތް މީހަކު ވަގުތުން ޝަހީދުވެފައިވެއެވެ. އަދި ހަމަލާއާއި ގުޅުގިން ވެއްޓިފައިވާ ޢިމާރާތުގެ ގައުތަކުގެ ދަށުގައި ބަޔަކު ތާށިވެ ވީނުވީއެއް ނޭނގިފައިވެއެވެ. 

 ޖަބަލިއްޔާ ރެފިއުޖީ ކޭމްޕާއި ޖަބަލިއްޔާ ޓައުން އިން ގެދޮރު ދޫކޮށް ދިޔަ ގިނަ މީހުން ދިރިއުޅޭ ސަރަހައްދެއް ކަމަށްވާ ބައިތް ލާހިޔާގައި  ވެސް ހުއްޓުމެއް ނެތި ހަމަލާތައް ދަނީ ދެމުންނެވެ.

އިޒްރާއިލުން ޣައްޒާގެ ނަޞްލު ނައްތާލުމަށް 7 އޮކްޓޫބަރު 2023 ގައި ފެށި ހަމަލާތައް ފެށިތާ އަހަރަކަށްވުރެ ގިނަ ދުވަސްވެފައިވާއިރު ހަމަލާތަކުގެ ސަބަބުން މިހާތަނަށް 44،282 މީހަކު ވަނީ ޝަހީދުވެފައެވެ. އަދި 104،880 މީހަކަށް ވަނީ އެކިވަރުގެ ޒަޚަމްތައް ލިބިފައެވެ.