ކުޑަކުދިންނާ ގުޅޭ މަޢުލޫމާތު ހާމަކުރުމުގައި ޤާނޫނީއިމުގެ ތެރެއިން ޢަމަލުކުރުމަށް މީޑިއާތަކަށް ފުލުހުން އިލްތިމާސްކޮށްފި

ކުޑަކުދިންނާ ގުޅޭ މަޢުލޫމާތު ހާމަކުރުމުގައި ޤާނޫނީއިމުގެ ތެރެއިން ޢަމަލުކުރުމަށް މީޑިއާތަކަށް ދިވެހި ފުލުހުންގެ ޚިދުމަތުން އިލްތިމާސްކޮށްފިއެވެ. 

ފުލުހުން މިގޮތައް އިލްތިމާސްކޮށްފައިވަނީ އެއިދާރާއިން ނެރެފައިވާ ނޫސްބަޔާނެއްގައެވެ. 

ފުލުހުން ބުނެފައިވަނީ ބައެއް މީޑިއާގެ ވަސީލަތްތަކުގައި ކުޑަކުދިންގެ މަޢުލޫމާތު އާންމުކުރާއިރު، އެ ކުދިންގެ ކަރާމަތާއި ރައްކާތެރިކަމަށް އުނިކަން އަންނަ ފަދަ މަޢުލޫމާތާއި ތަސްވީރުތައް އާންމުކުރަމުން ދިޔުމަކީ ދިވެހި ފުލުހުންގެ ޚިދުމަތުން ކަންބޮޑުވާކަމެއް ކަމަށެވެ.

ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނު، ޤާނޫނު ނަންބަރު 2019/19 ގައި ކުޑަކުދިންގެ ކަރާމާތަށް އުނިކަން އަންނަ ގޮތަށް އެކުދިންގެ ޒާތީ މަޢުލޫމާތު އެއްވެސް ފަރާތަކުން އާންމުކޮށްގެން ނުވާނެކަމަށް ސާފުކޮށް ބަޔާންކޮށްފައިވާ ކަމަށް ފުލުހުން ވަނީ ބުނެފައެވެ.

ނަމަވެސް ބައެއް މީޑިއާގެ މަންސަތަކުގައި ކުޑަކުދިންގެ މަޢުލޫމާތާއި ތަސްވީރު، އެ ކުދިންގެ ކަރާމާތަށް އުނިކަން އަންނަ ގޮތަށް ފަތުރަމުން ދިއުމަކީ އެ ކުދިންގެ މަސްލަޙަތު ރައްކާތެރިނުކުރެވި، ކުއްޖާ ނުރައްކަލަށް ހުށަހެޅިދާނެ ކަމެއްކަން ދިވެހި ފުލުހުންގެ ޚިދުމަތުން ދެކެން، ޚާއްސަކޮށް، ކުޑަކުދިންގެ ފޮޓޯ މީސްމީޑިއާގައި ދައުރުވަމުންދިއުމަކީ އެ ކުޑަކުދިންގެ ނަފްސާނީ އަދި ޖިސްމާނީ ދުޅަހެޔޮކަމަށް ނޭދެވޭ އަސަރުކޮށްފާނެ ކަންކަން

ފުލުހުން ބުނެފައިވެއެވެ.

ފުލުހުން ބުނެފައިވަނީ މިކަމަކީ އޭގެ ސަބަބުން ކުޑަކުދިން އެކި ބާވަތުގެ އަނިޔާތަކަށް ހުށަހެޅުމުގެ ފުރުސަތު އިތުރުވެގެންދާނެ ކަމެއްކަންވެސް ފުލުހުން ވަނީ ފާހަގަކޮށްފައެވެ.

ކަންމިހެން އޮތް ހިނދު، ކުޑަކުދިންގެ މަޢުލޫމާތު އާންމުކުރާއިރު، އެ ކުދިންގެ ކަރާމަތާއި ރައްކާތެރިކަން ނެގެހެއްޓުމަށް ޚާއްސަ ސަމާލުކަމެއް ދިނުމަށާއި ކުޑަކުދިންގެ ފޮޓޯތަކާއި އެހެނިހެން ޒާތީ މަޢުލޫމާތު މީސްމީޑިއާގައާއި އެހެނިހެން މީޑިއާގެ ވަސީލަތްތަކުގައި ޝާއިއު ނުކުރުމަށާއި ކުޑަކުދިންނާ ގުޅޭ މަޢުލޫމާތު ހާމަކުރުމުގައި ޤާނޫނީ އިމުގެ ތެރެއިން އަމަލުކުރުމަށް މީޑިއާތަކާއި އާންމު ރައްޔިތުންނަށް ދިވެހި ފުލުހުންގެ ޚިދުމަތުން އިލްތިމާސްކުރާ ކަމަށް ފުލުހުން ވަނީ ބުނެފައެވެ.