ފުޓުބޯޅަ ސީޒަނަށް ތައްޔާރުވުމަށް މާޒިއާއިން ޕްރެކްޓިސް ފަށައިފި

ދިވެހި ފުޓްބޯޅަ ސީޒަނަށް ތައްޔާރުވުމުގެ ގޮތުން، މާޒިޔާ ސްޕޯޓްސް އެންޑް ރެކްރިއޭޝަން ކްލަބުން ބުދަ ދުވަހު ފަރިތަކުރުންތައް ފަށައިފިއެވެ. މިއީ ފުޓުބޯޅަ ސީޒަނަށް ތައްޔާރުވުމަށް ފަރިތަކުރުންތައް ފެށި ފުރަތަމަ ޓީމެވެ. ނަމަވެސް މި ފަރިތަކުރުންތަކުގައި އެ ޓީމުގެ ބިދޭސީ ކުޅުންތެރިން ބައިވެރިވެފައެއް ނުވެއެވެ.

މާޒިޔާއިން ފަރިތަކުރުންތައް ފަށާފައިވަނީ މިދިޔަ އޯގަސްޓު މަހު އެ ކްލަބުގެ ކޯޗަކަށް ހަމަޖެއްސި ޔުއެފާ ޕްރޯ ލައިސަންސް ކޯޗު ޑްރަގަން ޑުކަނޯވިޗްއާއެކުއެވެ. މިހާތަނަށް ކޯޗެއްގެ ގޮތުގައި 18 އަހަރު ތަފާތު 5 ގައުމެއްގައި ހޭދަކޮށްފައިވާ ޑުކަނޯވިޗްއަކީ މާޒިޔާގެ ކޯޗުކަމާ ހަވާލުވި ހަ ވަނަ ބިދޭސީ ކޯޗެވެ.

ފުޓްބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް) އިން ކްލަބްތަކަށް ފޮނުވާފައިވާ ޑްރާފްޓް ކަލަންޑަރުގައިވާ ގޮތުން، ސީޒަން ހުޅުވުމުގެ ގޮތުން ކުޅޭ ޗެރިޓީ ޝީލްޑް މެޗް އޮންނާނީ ޖެނުއަރީ 24 ވަނަ ދުވަހުއެވެ. އަދި ސީޒަނުގެ ފުރަތަމަ މުބާރާތެއްގެ ގޮތުން ކުޅޭ ޕްރެޒިޑެންޓްސް ކަޕް ފަށާނެ ތާރީހަކަށް ކަނޑައަޅާފައިވަނީ ޖެނުއަރީ 29 ވަނަ ދުވަހުއެވެ. 

މީގެ އިތުރުން، ގިނަ ދުވަސްތަކަކަށް މެދުކެނޑިފައި އޮތް ދިވެހި ޕްރިމިއަރ ލީގު ފަށާނެ ދުވަހަކަށް އެ ކަލަންޑަރުގައި ބުނެފައިވަނީ ފެބުރުވަރީ މަހުގެ 25 ވަނަ ދުވަހެވެ. މި މުބާރާތުގެ މެޗެއް އެންމެ ފަހުން ކުޅެފައިވަނީ 2023 ޑިސެމްބަރ މަހުގެ ތެރޭގައެވެ.

މާޒިޔާއިން އައު ސީޒަނަށް ތައްޔާރުވާން ފަށާފައިވާއިރު، އެ ކްލަބުން ވަނީ ވާދަވެރި މެޗުތަކަކާ ނުލައި އޭއެފްސީ ޗެލެންޖު ކަޕްގައި ވެސް މި އަހަރު ވާދަކޮށްފައެވެ. މާޒިޔާގެ ގްރޫޕްގައި ހިމެނުނީ ކުވެއިތުގެ އަލް އަރަބީ ސްޕޯޓްސް ކްލަބް، ތުރުކުމެނިސްތާންގެ އެފްސީ އަކްރަޑަގް އަދި ކިރްގިސްތާން އެފްސީ އަބްދީޝް އާޓާއެވެ. ނަމަވެސް އެ މުބާރާތުގެ އެއްވެސް މެޗަކުން މާޒިޔާ މޮޅުވެފައެއް ނުވެއެވެ.