ހުސްވެފައިވާ ލެސްޓާ ސިޓީގެ ކޯޗުގެ މަގާމަށް ނިސްޓެލްރޯއީ ހަމަޖައްސަނީ

އިންގްލިޝް ޕްރިމިއަރ ލީގުގެ 16 ވަނައިގައި އޮތް ލެސްޓާ ސިޓީގެ ހުސްވެފައިވާ ކޯޗުގެ މަގާމަށް، މެންޗެސްޓަރ ޔުނައިޓެޑުގެ ލެޖެންޑް، ރޫޑް ވެން ނިސްޓެލްރޯއީ ހަމަޖައްސަން ނިންމައިފިއެވެ. ނަމަވެސް އެ ކުލަބުން އެކަން އަދި ރަސްމީކޮށް ހިއްސާކޮށްފައެއް ނުވެއެވެ.

ލެސްޓާ ސިޓީގެ ކޯޗަކަށް ހުރި ސްޓީވް ކޫޕަރ އޭނާގެ މަގާމުން ވަކިކުރީ، މިދިޔަ ހަފްތާގެ ހޮނިހިރު ދުވަހު ޗެލްސީއާ ދެކޮޅަށް ކުޅުނު މެޗުން އެ ޓީމު 2-1 އިން ބަލިވިތާ 24 ގަޑިއިރު ވެސް ނުވަނީސް، ޖެހިގެން އައި އާދީއްތަ ދުވަހުއެވެ. 

ސްޓީވް ކޫޕަރ މަގާމުން ވަކިކުރުމަށްފަހު ލެސްޓާ ސިޓީއިން ނެރުނު ބަޔާނެއްގައި ބުނީ، ސްޓީމް ކޫޕަރ މަގާމުން ވަކިކޮށްފައިވާ ކަމަށާއި، އޭނާއާއެކު ކްލަބުގެ އެސިސްޓެންޓް މެނޭޖަރ، އަލަން ޓޭޓް އާއި އެ ކްލަބުގެ ފަސްޓް ޓީމް ކޯޗު އަދި އެނަލިސްޓް، ސްޓީވް ރޭންޑްސް ވެސް ކްލަބު ދޫކޮށްލާފައިވާ ކަމަށެވެ. 

ލެސްޓާ ސިޓީގެ ކޯޗެއްގެ މަގާމަށް ސްޓީވް ކޫޕަރ އައްޔަނުކޮށްފައިވަނީ މި އަހަރުގެ ޖޫން މަހުއެވެ. އެއީ އެ ކްލަބަށް ޗެމްޕިއަންޝިޕް ކާމިޔާބުކޮށްދިން އެންޒޯ މަރެސްކާ ޗެލްސީއަށް ބަދަލުވުމަށް ނިންމުމުންނެވެ. ނަމަވެސް ކޫޕަރގެ އިރުޝާދުގެ ދަށުން 15 މެޗު ލެސްޓާރ ސިޓީއިން ކުޅުނު އިރު، އެ ޓީމު މޮޅުވެފައިވަނީ 3 މެޗުންނެވެ. މި ނަތީޖާތަކާއެކު، ރެލިގޭޝަން ޒޯނާ ދެމެދު އޮތީ 2 ޕޮއިންޓުގެ ފަރަގެކެވެ. 

ރިޕޯޓުތައް ބުނާ ގޮތުން، ލެސްޓާ ސިޓީ އިން މި ހަފްތާ ބަންދުގައި ލީގު މެޗަށް ނިކުތުމުގެ ކުރިން ނިސްޓެލްރޯއީ އެ ކްލަބުގެ ވަޒީފާއަށް ހަމަޖައްސާނެއެވެ. 

މެންޗެސްޓަރ ޔުނައިޓެޑުގެ ކުރީގެ ކޯޗު، އެރިކް ޓެން ހެގް އެ ކުލަބުން ދޫކޮށްލުމާ ގުޅިގެން، ނިސްޓެލްރޯއީ ވަނީ ވަގުތީ ކޯޗެއްގެ ގޮތުގައި ޔުނައިޓެޑާއި ވެސް މި ފަހުން ހަވާލުވެފައެވެ. އަދި މި މުއްދަތުގައި އޭނާ ވަނީ ކަރަބޯ ކަޕާއި ޕްރިމިއަރ ލީގުގައި ލެސްޓަރ ސިޓީ ބަލިކޮށްފައެވެ. 

ނިސްޓެލްރޯއީ ވަނީ ޑަޗް ލީގުގެ ޕީއެސްވީ އެންދޯވެންގެ ކޯޗެއްގެ މަގާމު ވެސް އަދާކޮށްފައެވެ. އަދި އެ ކްލަބާއެކު 2022/23 ސީޒަނުގައި އޭނާ ވަނީ ކޭ.އެން.ވީ.ބީ. ކަޕް ކާމިޔާބުކޮށްފައެވެ.