ގޯލްޑް ކަޕް: ނައިފަރު ބަލިކޮށް އަލިފުށިން ދެވަނަ ބުރު ޔަގީންކޮށްފި

ނައިންޓީ ޕްލަސް ގޯލްޑް ކަޕްގައި ބުރާސްފަތި ދުވަހުގެރޭ ކުޅުނު ގްރޫޕް-ޑީގެ މެޗުގައި އަލިފުށިން ނައިފަރު ބަލިކޮށް، ދެވަނަ ބުރުގެ ޖާގައެއް ޔަގީންކޮށްފިއެވެ. މި މެޗުގައި ވެސް، އެ ރަށު ކައުންސިލްގެ ރައީސް، އާދަމް އިމްރާން ވަނީ މޮޅު ކުޅުމެއް ދައްކާފައެވެ. އެގޮތުން އޭނާވަނީ ފުރަތަމަ ގޯލު ޖެހުމަށް ފުރުސަތު ތަނަވަސް ކޮށްދިނުމަށްފަހު އިތުރު ގޯލެއް ވެސް ކާމިޔަބުކޮށްފައެވެ.

އަލިފުށިން އެ ޓީމުގެ ފުރަތަމަ ގޯލު ކާމިޔާބު ކުރީ މެޗުގެ ފުރަތަމަ ހާފް ނިމެން ކުޑަތަން ވެފައިވަނިކޮށް އެ ޓީމުގެ ޒުވާން ފޯވާޑް އަހުމަދު ހުސާމް (ހުސާންކޮ)އެވެ. ހުސާންކޮއަކީ ސުޕަ ޔުނައިޓެޑް ސްޕޯޓްސް (ސަސް) އާއި ދަ ގްރާންޑޭ ސްޕޯޓްސް ކްލަބަށް ފުރަތަމަ ޑިވިޝަނުގައި ކުޅެފައިވާ ކުޅުންތެރިއެކެވެ. މީގެ އިތުރުން ޒުވާން ގައުމީ ޓީމަށް ވެސް އޭނާ ކުޅެފައިވެއެވެ.

އަލިފުށި ޓީމުގެ ދެވަނަ ގޯލު ކާމިޔާބު ކުރީ މެޗު ނިމެން 8 މިނެޓަށްވެފައި ވަނިކޮށް، ޓީމުގެ ކެޕްޓަން މުހައްމަދު ރަޝީދު (ހޮކޭ) ހުރަސްކޮށްދިން  ބޯޅައެއް ބޮލުން ގޯލަށް ފޮނުވާލާ، ފުރަތަމަ މެޗުގައި ދެ ގޯލު ކާމިޔާބުކުރި އިމްރާންއެވެ.

މި ނަތީޖާއާއެކު އަލިފުށި އޮތީ 2 މެޗުން ލިބުނު 6 ޕޮއިންޓާއެކު ގްރޫޕްގެ އެއްވަނައިގައެވެ. އަދި ނައިފަރު އޮތީ ގްރޫޕްގެ ދެވަނައިގައި 3 ޕޮއިންޓާއެކުއެވެ.  

މުބާރާތުގެ މެޗުތަކެއް ހުކުރު ދުވަހަކު ނުކުޅޭނެއެވެ. އަދި ހޮނިހިރު ދުވަހުގެ ހަވީރު މެޗުގައި މާފުއްޓާއި ކެންދޫ ބަދަލު ކުރުމަށް ހަމަޖެހިފައިވާއިރު، އެރޭ ކުޅޭނީ ފުވައްމުލަކު ސިޓީ އާއި ދ. މީދޫއެވެ.  

މުބާރާތުގެ ގްރޫޕް ސްޓޭޖުގެ މެޗުތައް 7 ޑިސެމްބަރުގައި ނިމޭއިރު، ކޮންމެ ގްރޫޕަކުން އެންމެ ރަގަޅު ނަތީޖާ ހޯދާ 3 ޓީމެއް ދެވަނަ ބުރަށް ދަތުރު ކުރާނެއެވެ. ދެވަނަ ބުރުވެސް ކުޅޭނީ 4 ގްރޫޕަށް ބަހާލައިގެނެވެ. އަދި ދެވަނަ ބުރުން ކުއާޓާ ފައިނަލަށް ދާނީ ކޮންމެ ގްރޫޕަކުން އެންމެ މޮޅު ދެ ޓީމެވެ.