ސޯޅަ އަހަރުން ދަށުގެ ކުދިން ސޯޝަލް މީޑިއާ ބޭނުންކުރުން މަނާކުރާ ބިލް އޮސްޓްރޭލިއާގެ ޕާލަމެންޓުން ފާސްކޮށްފި

ސޯޅަ އަހަރުން ދަށުގެ ކުދިން ސޯޝަލް މިޑިއާ ޕްލެޓްފޯމްތައް ބޭނުންކުރުން މަނާކުރާ ބިލު އޮސްޓްރޭލިއާގެ ޕާލަމެންޓުން ބުރާސްފަތި ދުވަހު ފާސްކޮށްފިއެވެ. މިއީ މިހާ ހަރުކަށިކޮށް ސޯޝަލް މީޑިއާ ބޭނުން ކުރުން މަނާކުރުމަށް ގައުމެއްގައި ފާސްކުރި މިފަދަ ފުރަތަމަ ބިލެވެ.

މި ބިލުގައި ބުނާގޮތުން، އޮސްޓްރޭލިއާގައި ދިރިއުޅޭ 16 އަހަރުން ދަށުގެ ކުދިންނަށް އިންސްޓަގްރާމް، ފޭސްބުކް އަދި ޓިކްޓޮކް ފަދަ ޕްލެޓްފޯމްތައް ދެން ބޭނުންކުރުން މަނާވާނެއެވެ. އަދި މި ގާނޫނަށް ބޯ ނުލަބައިފިނަމަ، 50 މިލިއަން އޮސްޓްރޭލިއާ ޑޮލަރާ (32.5 އެމެރިކާ ޑޮލަރު) ހަމައަށް ޖޫރިމަނާ ކުރެވޭނެއެވެ. 

ޕާލަމެންޓުން މި ބިލު ފާސްކޮށް ގާނޫނަކަށް ގާނޫނަކަށް ބަދަލުކުރުމާ ގުޅިގެން، މި ގާނޫނު ތަންފީޒު ކުރެއްވުމަށް ބެލުނިވެރިންގެ އެއްބާރުލުން ބޭނުންވާނެކަމަށް  އެ ގައުމުގެ ޕްރައިމް މިނިސްޓަރ، އެންތޮނީ އަލްބަނީސް ވަނީ ވިދާޅުވެފައެވެ. އަލްބަނީސް ވިދާޅުވީ، ސޯޝަލް މީޑިއާއަކީ މީހާ ހާސްކަމަށް ވައްޓާލާ ޕްލެޓްފޯމެއް ކަމަށާއި އަދި އެ ޕްލެޓްފޯމްތައް ބޭނުންކުރުމަކީ ސެކޭމަރުންނަށް ކޮށާދެވޭ މަގެއް ކަމުގައެވެ. އްލްބަނީސް އިތުރަށް ވިދާޅުވީ، ފޯނު ބޭނުން ކުރުމުގައި ގިނަ ވަގުތު ހޭދަކުރުން ދޫކޮށްލުމަށްފަހު އެންމެންވެސް ހަރަކާތްތެރި ދިރިއުޅުމެއް އުޅުން މުހިންމު ކަމުގައެވެ. 

މި ބިލު ފާސްކުރުމުގެ ކުރިން، މި ބިލާ ގުޅިގެން އިތުރު ދިރާސާތަކެއް ހެދުމަށް ވަގުތު ދިނުމަށް، ސޯޝަލް މީޑިއާގެ ގިނަ ޕްލެޓްފޯމުތަކެއް ގެންގުޅޭ ގޫގްލްސް އާއި މެޓާ ޕްލެޓްފޯމްސް އިން އެދުނެވެ. ނަމަވެސް ޕްރައިމް މިނިސްޓަރ އެންތޮނީ އަލްބަނީސްގެ ސަރުކާރުން ބޭނުންވީ މި ހަފްތާ ނިމުމުގެ ކުރިން މި ބިލު ޕާލަމެންޓުން ފާސްކުރުމަށެވެ.

އޮސްޓްރޭލިއާގެ ޕާލަމެންޓަށް މި ބިލު ހުށަހަޅާފައިވަނީ މިދިޔަ ހަފްތާގައެވެ. އަދި އެ ބިލަށް ހިޔާލު ފާޅުކޮށް ބަހުސްކުރުމަށް ދީފައިވަނީ އެންމެ ދުވަހެކެވެ. 

ބުރާސްފަތި ދުވަހު ބިލް ފާސްވެ ގާނޫނަކަށް ބަދަލުވެގެން އައި ނަމަވެސް، އެ ގާނޫނު ތަންފީޒު ކުރާނެ ގޮތެއް އަދި އެ ގައުމުގެ ސަރުކާރުން ހާމަކޮށްފައެއް ނުވެއެވެ. އެހެންކަމުން މި ގާނޫނާ ގުޅޭގޮތުން ގެންނަންޖެހޭ ބަދަލުތައް ގެނައުމަށާއި މިކަމާ ގުޅޭ ގަވާއިދުތައް ތައްޔާރުކޮށް، ގާނޫނު ތަންފީޒުކުރުމުގެ މަސައްކަތް ފެށުމަށް އިތުރު 12 ވަރަކަށް މަސް ހޭދަވާނެކަމަށް ބެލެވޭކަމަށް ގާނޫނީ މާހިރުން ފާހަގަ ކުރެއެވެ.