އައިސީސީ ޗެމްޕިއަންސް ޓްރޮފީގެ މެޗުތައް ކުޅުމަށް އިންޑިއާއިން ޕާކިސްތާނަށް ދާކަށް ބޭނުމެއް ނުވޭ

ޕާކިސްތާނުގައި ބޭއްވުމަށް ހަމަޖެހިފައިވާ އައިސީސީ ޗެމްޕިއަންސް ޓްރޮފީ 2025ގެ މެޗުތައް ކުޅުމަށް އެ ގައުމަށް ދިއުމަށް އިންޑިއާއިން ދެކޮޅު ހެދިނަމަވެސް، އެކަމަގުގައި "ހައިބްރިޑް މޮޑެލް" އެއީ ގަބޫލު ކުރާނެ ގޮތެއް ނޫންކަމަށް ޕާކިސްތާން ކްރިކެޓް ބޯޑް (ޕީސީބީ) އިން ބުނެފިއެވެ. ޖުމްލަ 8 ގައުމުން ވާދަކުރާ މި މުބާރާތް ފެބުރުއަރީ 19 އިން މާޗު 9 އަކަށް ކުރިޔަށް ގެންދިއުމަށް ތާވަލުކޮށްފައިވާއިރު، އިންޑިއާއިން ބޭނުންވަނީ އެ ގައުމުގެ މެޗުތައް ޕާކިސްތާން ނޫން އެހެން ގައުމެއްގައި ކުޅުމަށެވެ. އަދި އިންޑިއާގެ މި ނިންމުމާ ގުޅިގެން މުބާރާތް މިހާރު އޮތީ އޮޅުންބޮޅުމެއްގެ ތެރޭގައެވެ.

މި މައްސަލައާ ގުޅިގެން އިތުރަށް މަޝްވަރާ ކުރުމަށް، އިންޓަނޭޝަނަލް ކްރިކެޓް ކައުންސިލް (އައިސީސީ) އިން ވަނީ ކަމާގުޅުންހުރި ފަރާތްތަކާއިއެކު މިއަދު ބައްދަލުވުމެއް ބޭއްވުމަށް ނިންމާފައެވެ. ރިޕޯޓުތައް ބުނާ ގޮތުން، މި ބައްދަލުވުމުގައި އައިސީސީއިން ޕާކިސްތާނު ނޫން ގައުމެއްގައި އިންޑިއާގެ މެޗުތައް ނުވަތަ މުބާރާތް އެއްކޮށް އެހެން ގައުމަކަށް ބަދަލުކުރުމަށް ޕީސީބީއަށް ޕްރޮޕޯޒަލްއެއް ހުށަހަޅާނެއެވެ. 

ނަމަވެސް ޕާކިސްތާން ނޫން ގައުމެއްގައި މުބާރާތުގެ އެއްވެސް މެޗެއް ކުޅެން ޕީސީބީއިން އެއްބަސްނުވާނެކަމަށް، ނަން ސިއްރުކުރުމަށް ޝަރުތުކޮށް އަލްޖަޒީރާއާ ވާހަކަ ދެއްކި ޕީސީބީގެ އޮފިޝަލަކު ބުނެފައިވާކަމަށް، އެ އެޖެންސީން ވަނީ ރިޕޯޓުކޮށްފައެވެ. މީގެ އިތުރުން، މި މުބާރާތް ކުޅުމަށް އިންޑިއާ އިން ޕާކިސްތާނަށް ދަތުރުނުކޮށްފިނަމަ، ކުރިޔަށް އޮތް ތާންގައި ޕާކިސްތާނުން ވެސް އަމަލުކުރާނީ އެގޮތަށްކަން އައިސީސީއަށް އަންގާފައިވާނެކަމަށް، ޕީސީބީން ވާހަކަ ދެއްކި އޮފިޝަލް ވަނީ ބުނެފައެވެ.

ޕީސީބީން މިހެން ބުނިއިރު، މި އަންނަ އަހަރު ބޭއްވުމަށް ހަމަޖެހިފައިވާ އައިސީސީ ވުމެންސް ވޯލްޑް ކަޕް އޮންނާނީ އިންޑިއާގައެވެ. އަދި އައިސީސީ ޓީ20 ވޯލްޑް ކަޕް 2026 ބޭއްވުމަށް ހަމަޖެހިފައިވަނީ އިންޑިއާ އާއި ސްރީލަންކާގައެވެ. 

އައިސީސީގެ ބައްދަލުވުމުގެ ކުރިން ޕީސީބީގެ ޗެއަރމަން، މޮހްސިން ނަގްވީ ބުނީ، އެ ބައްދަލުވުމުގައި އޭނާ ނިންމާނީ ޕާކިސްތާނަށް އެންމެ ފައިދާވާނެ ނިންމުންކަމާއި، ޗެމްޕިއަންސް ޓްރޮފީ ކުޅެން ޖެހޭނީ ޕާކިސްތާނުގައި ކަމަށެވެ. އަދި އިތުރު ގައުމެއްގައި އިންޑިއާގެ މެޗުތައް ކުޅުމަށް ނިންމައި، އެކަމުގެ ގެއްލުމުގެ ބަދަލުދިނުމެއް ހުށަހެޅި ނަމަވެސް ގަބޫލު ނުކުރާނެ ކަމަށެވެ. 

ދެ ގައުމުގެ ދެމެދުގައި އޮތް ސިޔާސީ އަރާރުންތަކާއެކު، އިންޑިއާގެ ގައުމީ ކްރިކެޓް ޓީމު ޕާކިސްތާނަށް ދިއުން އިންޑިއާއިން މަނާކޮށްފައި އޮންނަތާ މިހާރު ގިނަ ދުވަސްތަކެއް ވެއްޖެއެވެ. އެހެން ކުޅިވަރެއް ކުޅުމަކަށް ވެސް، 2008 ވަނަ އަހަރުގެ ފަހުން އިންޑިއާގެ އެއްވެސް ގައުމީ ޓީމެއް ޕާކިސްތާނަށް ދަތުރުކޮށްފައެއް ނުވެއެވެ. އެގޮތުން 2023 ވަނަ އަހަރު ޕާކިސްތާނުގައި ބޭއްވި އޭޝިއާ ކަޕްގެ އިންޑިއާގެ މެޗުތައް ކުޅެފައިވަނީ ސްރީލަންކާގައެވެ.

އަދި މި ފަހަރުގެ ޗެމްޕިއަންސް ޓްރޮފީ އަކީ 1996 ވަނަ އަހަރަށްފަހު ޕާކިސްތާނުގައި އައިސީސީގެ ފިރިހެން ޕްރޮފެޝަނަލް މުބާރާތެއް ބޭއްވުމަށް ތައްޔާރުވާ ފުރަތަމަ ފަހަރެވެ. އެ އަހަރު ޕާކިސްތާނުން ވަނީ އިންޑިއާ އަދި ސްރީލަންކާއާއެކު 50-އޯވަރ ވޯލްޑް ކަޕް ވެސް ބާއްވާފައެވެ.