ކަނޑަށް ވެއްޓުނު ކޮންޓެއިނަރުތަކުގެ ތެރެއިން 3 ކޮންޓެއިނަރެއް އަދިވެސް ނުފެނޭ

މާލޭ ވިޔަފާރި ބަނދަރުގެ ބޭރު ޖެޓީގައި އަޅާފައި އޮތް ބާޖަކުން ރޭ ކަނޑަށް ވެއްޓުނު ފަސް ކޮންޓެއިނަރުގެ ތެރެއިން ތިން ކޮންޓެއިނަރެއް އަދިވެސް ފެނިފައިނުވާ ކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

މި ހާދިސާއާ ގުޅިގެން ފުލުހުން ވިދާޅުވީ، ކަނޑަށް ވެއްޓި ގެއްލިފައިވާ ކޮންޓެއިނަރުތައް ހޯދުމުގެ މަސައްކަތް ކަމާބެހޭ ފަރާތްތަކާ ގުޅިގެން މިހާރު ކުރަމުންދާ ކަމަށެވެ. މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މި ހާދިސާ ފުލުހުންނަށް ރިޕޯޓްކޮށްފައިވަނީ ރޭ މާލެ ސަރަހައްދަށް މޫސުން ގޯސްވެ، ވަރަށް ބޮޑަށް ވިއްސާރަކުރަމުން ދިޔަ ވަގުތެއްގައި، ރޭގަނޑު 11:00 ގެ ފަހުންނެވެ.

އެމްޕީއެލްއިން މައުލޫމާތު ދެއްވާފައިވާ ގޮތުގައި، ބާޖުން ކަނޑަށް ވެއްޓިފައިވަނީ ހުސް ކޮންޓެއިނަރުތަކެކެވެ. ނަމަވެސް، މި ކޮންޓެއިނަރުތައް ބާޖުން ކަނޑަށް ވެއްޓެން މެދުވެރިވި ސީދާ ސަބަބެއް މިހާތަނަށް ސާފުވެފައެއް ނުވެއެވެ.

ފުލުހުންނާއި އެމްއެންޑީއެފުން ލަފާކުރާ ގޮތުގައި، ވެއްޓުނު ކޮންޓެއިނަރުތައް އޮޔާދާނެ ކަމަށް ބެލެވެނީ ދޫނިދުއާއި ފޭދޫފިނޮޅާ ދެމެދުގައިވާ ކަނޑުގެ ސަރަހައްދަށެވެ. އެހެންކަމުން، އެ ސަރަހައްދުން ދަތުރުކުރާ އުޅަނދުފަހަރުތަކުން މިކަމަށް ޚާއްޞަ ސަމާލުކަމެއް ދިނުމަށް ކަމާބެހޭ އިދާރާތަކުން ވަނީ އިލްތިމާސްކުރައްވާފައެވެ. ވަކި ގޮތަކަށް ނުފެނި އޮޔާދާ ކޮންޓެއިނަރުތަކުގެ ސަބަބުން ކަނޑުދަތުރުފަތުރު ކުރާ އުޅަނދުތަކަށް ނުރައްކާތެރި ހާދިސާއެއް ކުރިމަތިވެދާނެތީ، ހުރިހާ ފަރާތްތަކުންވެސް ރައްކާތެރިކަމުގެ ފިޔަވަޅުތައް އެޅުމަށް ވަނީ އިރުޝާދު ދީފައެވެ.