ދުނިޔެ
މެލޭޝިޔާގައި ފެންބޮޑުވުމުގެ ކާރިސާއެއް، 80،000 މީހުން ގެދޮރުދޫކޮށް ގޮއްސި

މެލޭޝިޔާގައި ފެންބޮޑުވުމުގެ ކާރިސާ ފޮޓޯ:އިންޓަނެޓް
މެލޭޝިޔާގެ އެކި ސްޓޭޓްތަކުގައި މިދިޔަ ހަފްތާގައި ވެހުނު ބޯވާރޭގެ ސަބަބުން ފެންބޮޑުވެ ، 80،000 އަށްވުރެ ގިނަ މީހުން ގެދޮރު ދޫކޮށް ދާން މަޖުބޫރުވެއްޖެ ކަމަށް އެ ގައުމުގެ ރަސްމީ ފަރާތްތަކުން ހުކުރު ދުވަހު ހާމަކޮށްފިއެވެ. މި ހާދިސާގައި މިހާތަނަށް 4 މީހަކު ވަނީ މަރުވެފައެވެ.
ނޭޝަނަލް ޑިޒާސްޓަރ ކޮމާންޑް ސެންޓަރުން ބުނެފައިވާ ގޮތުގައި މެލޭޝިޔާގެ 7 ސްޓޭޓެއްގައި ޖުމްލަ 80،589 މީހުން ވަނީ 467 ވަގުތީ ހިޔާވަހިކަމުގެ މަރުކަޒުތަކަށް ބަދަލުކުރެވިފައެވެ. އެންމެ ބޮޑަށް ގެއްލުން ލިބިފައިވަނީ އިރުމަތީ އުތުރުގައި އޮންނަ ކެލަންޓަން ސްޓޭޓާއި އެ ސްޓޭޓާ އިންވެގެންވާ ޓެރެންގަނޫ ސްޓޭޓަށެވެ.
ކެލަންޓަން، ޓެރެންގަނޫ އަދި ސަރަވަކް ސްޓޭޓްތަކުގައި މިހާތަނަށް 4 މީހަކު މަރުވެފައިވާ ކަމަށް ކާރިސާއާ ގުޅޭ ރަސްމީ ފަރާތްތަކުން ބުނެފައިވެއެވެ. އަދި ގެއްލުން ލިބިފައިވާ ސްޓޭޓްތަކުގައި ހޯދާ ސަލާމަތްކުރުމުގެ މަސައްކަތްތަކަށް އެހީތެރިވުމަށް ޚާއްޞަ ޓީމެއް ވަނީ ފޮނުވިފައެވެ.
މެލޭޝިޔާގެ މޫސުމާބެހޭ އިދާރާއިން އޭއެފްޕީއަށް މަޢުލޫމާތު ދީފައިވާ ގޮތުގައި ގައުމުގެ އެކި ކަންކޮޅުތަކުގައި ބޯކޮށް ވާރޭވެހުން ހޮނިހިރު ދުވަހާ ހަމައަށް ދެމިގެންދާނެ ކަމަށް ލަފާކުރެވެއެވެ.
މެލޭޝިޔާގެ ޑެޕިއުޓީ ބޮޑުވަޒީރު އަޙްމަދު ޒާހިދު ހަމީދީ ބުރާސްފަތި ދުވަހު ވިދާޅުވެފައިވަނީ މިފަހަރުގެ ފެންބޮޑުވުން 2014 ވަނަ އަހަރަށްވުރެ ގޯސްވާނެ ކަމަށް ލަފާކުރެވޭ ކަމަށެވެ. 2014 ވަނަ އަހަރު ފެންބޮޑުވުމުގެ ސަބަބުން ގާތްގަނޑަކަށް 118،000 މީހުން ވަނީ ގެދޮރު ދޫކޮށް ދާން މަޖުބޫރުވެފައެވެ.
ނޭޝަނަލް ޑިޒާސްޓަރ މެނޭޖްމަންޓް ކޮމިޓީގެ ޗެއަރމަން ކަމުގައިވާ ޒާހިދު ވިދާޅުވެފައިވަނީ ފެންބޮޑުވުމުގެ ނުރައްކާ އޮތް ސްޓޭޓްތަކުގައި އިމަޖެންސީ ޚިދުމަތްތަކުގެ ހާހެއްހާ މުވައްޒަފުންނާއި، ސަލާމަތްކުރުމުގެ އުޅަނދުތަކާއި، ފޯވީލް ޑްރައިވް އުޅަނދުތަކާއި، ހެލިކޮޕްޓަރުތައް ބޭނުންކުރެވެމުންދާ ކަމަށެވެ.