ފީފާގެ ބެސްޓް ޕްލޭޔަރ ނޮމިނީސްގައި ފާއިތުވި ދެ އަހަރު މި އެވޯޑު ހާސިލްކުރި މެސީ ހިމެނޭ

ދުނިޔޭގެ ފުޓުބޯޅަ ފެޑެރޭޝަން، ފީފީ އިން ހޮވާ އަހަރުގެ އެންމެ މޮޅު ކުޅުންތެރިޔާގެ ނޮމިނީސްގައި، އިންޓަ މިއާމީއަށް ކުޅެމުން އަންނަ ލިއޮނެލް މެސީ މި ފަހަރު ވެސް ހިމެނިއްޖެއެވެ. މި މަގާމު 2022 ވަނަ އަހަރާއި 2023 ވަނަ އަހަރު ވެސް ހާސިލްކޮށްފައިވަނީ އޭނާއެވެ. އަދި މެސީ އެންމެ ފުރަތަމަ މި އެވޯޑު ހާސިލް ކުރީ ބާސެލޯނާއަށް ކުޅެމުން 2019 ވަނަ އަހަރުއެވެ.

މެސީ ވިދިވިދިގެން 3 ވަނަ އެވޯޑަށް ވާދަކުރާއިރު، ސައުދީ ޕްރޯ ލީގުގައި ކުޅެމުން އަންނަ މެސީއާ އެންމެ ވާދަވެރި ކްރިސްޓިއާނޯ ރޮނާލްޑޯ 2021 ވަނަ އަހަރުގެ ފަހުން މި އެވޯޑަށް ނޮމިނޭޓްވެފައެއް ނުވެއެވެ. ނަމަވެސް ރޮނާލްޑޯ ވަނީ މި އެވޯޑު ތައާރަފްކުރީ 2016 ވަނަ އަހަރާއި، ޖެހިގެން އައި 2017 ވަނަ އަހަރު ވެސް މި އެވޯޑު ހާސިލްކޮށްފައެވެ.

ހުކުރު ދުވަހު ފީފާއިން އާންމު ކުރި އެންމެ މޮޅު ފިރިހެން ކުޅުންތެރިންގެ ނޮމިނީސް ލިސްޓުގައި މެސީގެ އިތުރުން ދެން ހިމެނެނީ ޑެނީ ކަވަހާލް، އަރލިންގް ހާލަންޑް، ފެޑެރިކޯ ވަލްވަރްޑޭ، ފްލޮރިއަން ވަރޓްޒް، ޖޫޑް ބެލިންގްހަމް، ކީލިއަން އެމްބައްޕޭ، ލެމިން ޔަމާލް، ރޮޑްރީ، ޓޯނީ ކްރޫޒް އަދި ވިނީސިއަސް ޖޫނިއަރއެވެ.

ފްރާންސް ފުޓްބޯޅައިން ހޮވާ ބެލަން ޑިއޯރގެ ގަދަ 11 ގައި ވެސް ހިމެނުނީ ގާތްގަނޑަކަށް މި ކުޅުންތެރިންނެވެ. އެ ލިސްޓުގެ ގަދަ 11 ގައި ހިމެނުނު ކުޅުންތެރިންގެ ތެރެއިން ފީފާގެ ނޮމިނީސް ލިސްޓުގައި ނުހިމެނުނީ އާޖެންޓީނާގެ ލައުޓާރޯ މާޓިނޭޒް އާއި އިނގިރޭސިވިލާތުގެ ފިލް ފޮޑެން އަދި ހެރީ ކޭންއެވެ. 

ފީފާ އިން ވަނީ މި ލިސްޓާއެކު، އެންމެ މޮޅު އަންހެން ކުޅުންތެރިޔާގެ ނޮމިނީސް އާއި، އެންމެ މޮޅު އަންހެން އަދި ފިރިހެން ކޯޗުންގެ ނޮމިނީސް އަދި އެންމެ މޮޅު އަންހެން އަދި ފިރިހެން ގޯލްކީޕަރ ނޮމިނީސް ލިސްޓު އާންމުކޮށްފައެވެ. މި މަގާމުތަކަށް ސަޕޯޓަރުން ދޭ ވޯޓާއި ގައުމީ ޓީމުތަކުގެ ކެޕްޓަނުންނާއި ކޯޗުންނާއި މީޑިއާ ތަމްސީލްކުރާ ފަރާތްތަކުން ދޭ ވޯޓުތައް ގުނާނީ އެއް ހަމައަކުންނެވެ.

މި މަގާމުތަކުގެ އިތުރުން ފީފާ ފޭން އެވޯޑް ހޮވުމުގައި ހަމައެކަނި ސަޕޯޓަރުންގެ ވޯޓަށް ބަލާއިރު، ފީފާ ފެއަރ ޕްލޭ އެވޯޑު ހޮވަނީ އެ އިދާރާއިން ކަނޑައަޅާ ޕެނަލިސްޓުންގެ ޓީމަކުންނެވެ. 

މީގެ އިތުރުން އެންމެ މޮޅު ގޯލު ޖެހި އަންހެން ކުޅުންތެރިޔާއަށްދޭ މާރތާ އެވޯޑާއި އެންމެ މޮޅު ގޯލު ޖެހި ފިރިހެން ކުޅުންތެރިއާއަށްދޭ ޕުސްކަސް އެވޯޑަށް ވޯޓު ގުނުމުގައި ބަލާނީ ސަޕޯޓަރުންގެ ވޯޓާއި ފީފާ ލެޖެންޑުންގެ ވޯޓު ގުނާނީ ހަމަހަމަ ކޮށެވެ. 

މި ފަހަރު ވޯޓު ގުނުމުއި އެންމެ ބޮޑު ބަދަލެއް ގެނަސްފައިވަނީ ދަ ބެސްޓް ފީފާ މެންސް 11 އާއި ދަ ބެސްޓް ފީފާ ވުމެންސް 11 ހޮވުމުގައެވެ. މި އެވޯޑަށް ވާދަކުރާ 77 ކުޅުންތެރިންގެ ތެރެއިން އެ ސަޕޯޓަރަކަށް އެންމެ މޮޅު 11 ކުޅުންތެރިންނަށް ވޯޓު ދެވޭނެއެވެ. އަދި ވޯޓު ދިނުމުގައި އެ ސަޕޯޓަރަކަށް އެންމެ ކަމުދާ ޓްކެޓިކަލް ފޯމޭޝަނަކަށް ކުޅުންތެރިންނަށް ވޯޓު ދެވޭނެއެވެ. އަދި ވޯޓު ގުނުމުގައި ސަޕޯޓަރުންގެ ވޯޓާއި ފީފާގެ މާހިރުންގެ ޓީމުގެ ވޯޓު ގުނާނީ ހަމަހަމަކޮށެވެ.

ފީފާ އެވޯޑުތަކަށް ވޯޓު ދިނުމުގެ ސުންގަޑިއަކީ ޑިސެމްބަރު 10 ވަނަ ދުވަހުގެ، ސެންޓްރަލް ޔޫރަޕިއަން ޓައިމްގެ 23:59 އެކެވެ.