ކެނެޑާގެ ނޫސްތަކުން އޯޕަން އޭއައި އާ ދެކޮޅަށް މައްސަލަ ހުށަހަޅައިފި

ކެނެޑާގެ އެންމެ ބޮޑެތި ނޫސްތަކުގެ ގްރޫޕަކުން އާޓިފިޝަލް އިންޓެލިޖެންސް ޗެޓްބޮޓް ޗެޓްޖީޕީޓީ ހަދާފައިވާ އޯޕަން އޭއައި އާ ދެކޮޅަށް މައްސަލައެއް ހުށަހަޅައިފިއެވެ. މި މައްސަލަ ހުށަހަޅާފައިވަނީ އެ ކުންފުނިން ޤާނޫނާ ޚިލާފަށް ނޫސްތަކުގެ ލިއުންތައް ބޭނުންކޮށްގެން އެ ކުންފުނީގެ ސޮފްޓްވެއަރ ތަމްރީނު ކުރަމުންދާ ކަމަށް ބުނެއެވެ.

ޓޮރޮންޓޯ ސްޓަރ، މެޓްރޯލޭންޑް މީޑިއާ، ޕޯސްޓްމީޑިއާ، ދަ ގްލޯބް އެންޑް މެއިލް، ދަ ކެނޭޑިއަން ޕްރެސް އަދި ސީބީސީ ފަދަ ނޫސްތައް މި މައްސަލައިގައި ބައިވެރިވެފައިވެއެވެ. މިއީ އެ ޤައުމުގައި މިފަދަ މައްސަލައެއް ހުށަހެޅުނު ފުރަތަމަ ފަހަރު ކަމަށް ބެލެވެއެވެ.

ނޫސްވެރިކަމަކީ އާންމު މަސްލަހަތު ހިމެނޭ ކަމެކެވެ. އެހެން ކުންފުނިތަކުގެ ނޫސްވެރިކަން އޯޕަން އޭއައި އިން އެ ކުންފުނީގެ ވިޔަފާރި ބޭނުމަށް ބޭނުންކުރުމަކީ ޤާނޫނާ ޚިލާފު ކަމެކެވެ

މީޑިއާ ކުންފުނިތަކުން ނެރުނު ބަޔާނެއްގައި ބުނެފައިވެއެވެ.

އޯޕަން އޭއައި އިން ބުނެފައިވަނީ އެ ކުންފުނީގެ މޮޑެލްތައް ތަމްރީނު ކުރަނީ އާންމުކޮށް ލިބެން ހުންނަ މަޢުލޫމާތުތަކުން ކަމަށެވެ. އަދި އެ ކުންފުނީގެ ސޮފްޓްވެއަރ ހަދާފައިވަނީ "ފެއަރ ޔޫސް" އާއި ގުޅުންހުރި ބައިނަލްއަޤްވާމީ ކޮޕީރައިޓް އުސޫލުތަކާ އެއްގޮތަށް ކަމަށް އެ ކުންފުނިން ބީބީސީއަށް ދިން ބަޔާނެއްގައި ބުނެފައިވެއެވެ.

ކެނެޑާގެ މީޑިއާ ގްރޫޕުން ހުށަހެޅި 84 ޞަފްޙާގެ މައްސަލައިގައި ބުނެފައިވަނީ އޯޕަން އޭއައި އިން ޕޭވޯލް ނުވަތަ ކޮޕީރައިޓް ޑިސްކްލެއިމަރ ފަދަ ހުއްދަނެތި ކޮންޓެންޓް ކޮޕީކުރުން ހުއްޓުވުމަށް ބޭނުންކުރާ ރައްކާތެރިކަމުގެ ފިޔަވަޅުތައް އަޅާނުލާ ކަމަށެވެ.

މި މައްސަލައިގައި ކެނެޑާގެ އެންމެ މަޝްހޫރު ނޫސްތަކުގެ ޕަބްލިޝަރުން ހިމެނޭ ގްރޫޕުން އެދިފައިވަނީ ޗެޓްޖީޕީޓީ ތަމްރީނު ކުރުމަށް ޤާނޫނާ ޚިލާފަށް ބޭނުންކޮށްފައިވާ ކަމަށް ބުނާ ކޮންމެ މަޒުމޫނަކަށް 20,000 ކެނޭޑިއަން ޑޮލަރުގެ ބަދަލު ދިނުމަށެވެ. މިއީ ޖުމްލަ ބިލިއަން ޑޮލަރުގެ ބަދަލަކަށް ވެދާނެއެވެ.

މީގެ އިތުރުން، އެ ނޫސްތަކުގެ ލިއުންތައް ބޭނުންކޮށްގެން ލިބުނު ފައިދާ ހިއްސާކުރުމަށާއި، މުސްތަޤުބަލުގައި އެ މަޒުމޫނުތައް ބޭނުންކުރުން މަނާކުރުމަށް އަމުރެއް ނެރުމަށްވެސް އެދިފައިވެއެވެ.