ފެންގަލް ސައިކްލޯން އިންޑިއާގެ ތަމިލްނާޑޫ އަށް މިއަދު އަރާނެ ކަމަށް ބުނެފި

ފެންގަލް ސައިކްލޯން އިންޑިއާގެ ތަމިލްނާޑޫ އަދި ޕުދުއްޗެރީ ސަރަޙައްދަށް މިއަދު މެންދުރުފަހު އަރާނެކަމަށް ބެލެވޭއިރު، މި ސަރަޙައްދުތަކަށް ވިއްސާރައާއި ވައިގަދަވުން ކުރިމަތިވާނެކަމަށް އިންޑިއާގެ މޫސުމާބެހޭ އިދާރާ (އައިއެމްޑީ)އިން ވަނީ އިންޒާރު ދީފައެވެ.

އައިއެމްޑީގެ އެންމެ ފަހުގެ މަޢުލޫމާތުތަކަށް ބަލާއިރު، ފެންގަލް ސައިކްލޯން ތަމިލްނާޑޫ-ޕުދުއްޗެރީ ސަރަޙައްދަށް އަރާނީ ކަރައިކަލްއާއި މަހާބަލިޕުރަމްގެ ދެމެދުންނެވެ. މި ސައިކްލޯނާއެކު ގަޑިއަކު 70-80 ކިލޯމީޓަރުގެ ބާރުމިނުގައި ވައި ޖެހޭނެކަމަށާއި، ބައެއް ވަގުތުތަކުގައި ވައިގެ ބާރުމިން ގަޑިއަކު 90 ކިލޯމީޓަރަށް އަރާނެކަމަށް ބެލެވެއެވެ.

މި ސައިކްލޯނުގެ ސަބަބުން ޗެންނާއީ އެއަރޕޯޓުގެ އުދުހުންތަކަށް ބުރޫއަރާފައިވާކަން ފާހަގަކުރެވެއެވެ. އިންޑިގޯ އެއަރލައިންސްއިން ވަނީ ޗެންނާއީ އެއަރޕޯޓުގެ ހުރިހާ އޮޕަރޭޝަންތަކެއް ވަގުތީގޮތުން ހުއްޓާލާފައެވެ. އަދި އެއަރ އިންޑިއާގެ ޗެންނާއީއާ ގުޅޭ ދަތުރުތަކަށްވެސް ވަނީ އަސަރުކޮށްފައެވެ.

ތަމިލްނާޑޫގެ ޗެންނާއީ، ތިރުވައްލޫރު، ކަންޗީޕުރަމް، ކައްލަކުރިޗި އަދި ކަޑަލޫރު ޑިސްޓްރިކްޓްތަކާއި ޕުދުއްޗެރީއަށް ބޯކޮށް ވާރޭވެހި، ބައެއް ސަރަޙައްދުތަކަށް ވަރަށް ބޯކޮށް ވިއްސާރަވާނެކަމަށް އައިއެމްޑީއިން ލަފާކުރެއެވެ. މިހާރުވެސް ގިނަ ސަރަޙައްދުތަކުގައި މޫސުން ބަދަލުވެ، ކަނޑުގަދަވާން ފަށާފައިވާކަން ފާހަގަކުރެވެއެވެ.

މި ނުރައްކާތެރި މޫސުމާ ގުޅިގެން ތަމިލްނާޑޫގެ ގިނަ ސަރަޙައްދުތަކަށް ރެޑް އެލާޓް ދީފައިވާއިރު، ބައެއް ސަރަޙައްދުތަކަށް އޮރެންޖް އެލާޓް ދީފައިވެއެވެ. އަދި ތަމިލްނާޑޫގެ ގިނަ ޑިސްޓްރިކްޓްތަކާއި ޕުދުއްޗެރީގެ ސްކޫލްތަކާއި ކޮލެޖްތައް މިއަދު ބަންދުކުރުމަށް ވަނީ އަންގާފައެވެ.

މި ސައިކްލޯނާ ގުޅިގެން އެ ސަރަޙައްދުގެ މަސްވެރިންނަށް ކަނޑަށް ނުފޭބުމަށް އިރުޝާދު ދީފައިވާއިރު، އުޅަނދުފަހަރު ރައްކާތެރި ތަންތަނަށް ގެންދިއުމަށް ވަނީ އަންގާފައެވެ. އަދި ސައިކްލޯނުގެ ސަބަބުން މުވާސަލާތީ ވިއުގަތަކަށް ގެއްލުން ލިބި، ތިރީ ސަރަޙައްދުތަކަށް ފެންބޮޑުވުން ކުރިމަތިވެދާނެކަމަށް ޗެންނާއީގެ ސަރަޙައްދީ މޫސުމާބެހޭ މަރުކަޒުގެ ޑިރެކްޓަރު ޑރ. އެސް. ބާލަޗަންދްރަން ވަނީ އިންޒާރު ދެއްވާފައެވެ.