އެންސްޕާ ހިންގުމަށް އިމާރާތް ހޯދީ ކަނޑައަޅާފައިވާ ޤަވާޢިދުތަކާއި އުސޫލުތަކުގެ ތެރެއިން: ހީނާ

ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ހިންގުމަށް އިމާރާތެއް ހޯދުމުގެ މުޢާމަލާތް ކުރެވިފައިވަނީ  މާލީ ވުޒާރާއާއެކު ޤަވާޢިދާ އުސޫލުން ކަމަށް އެ އެޖެންސީން ވިދާޅުވެއްޖެއެވެ. މިކަން އެންސްޕާއިން ހާމަކުރެއްވީ، އެ އެޖެންސީ ހިންގުމަށް ނަގާފައިވާ އިމާރާތެއް އެހެން ފަރާތަކަށް ދިނުމަށް އެއްބަސްވެފައިވާކަމަށް ބުނެ ބައެއް މީޑިއާތަކުން ޚަބަރު ފެތުރުމާ ގުޅިގެންނެވެ.

އެންސްޕާއިން ނެރުއްވި ބަޔާނުގައި ވިދާޅުވެފައިވަނީ، އެޖެންސީ ހިންގުމަށް އިމާރާތެއް ހޯދުމާ ގުޅޭގޮތުން ބައެއް ނޫސްތަކުން ފަތުރަމުންދާ ވާހަކަތަކަކީ ޙަޤީޤަތާ ޚިލާފު ދޮގު ވާހަކަތަކެއް ކަމަށެވެ. އަދި އިމާރާތެއް ހޯދުމުގެ މުޢާމަލާތަކީ، އެކަން ކުރުމަށް ކަނޑައަޅާފައިވާ ގަވާއިދުތަކާއި އުސޫލުތަކުގެ ތެރެއިން މާލީ ވުޒާރާއާއެކު ކުރެވިފައިވާ މުޢާމަލާތެއް ކަމަށް އެ އެޖެންސީން ފާހަގަކުރައްވާފައިވެއެވެ.

އެންސްޕާއިން އިތުރަށް ވިދާޅުވެފައިވަނީ، މި މަޢުލޫމާތުތަކަކީ މިހާރުވެސް ހާމަކަން ބޮޑު ގޮތެއްގައި މާލީ ވުޒާރާގެ މަންސަތަކުގައި ފެންނަން ހުރި މަޢުލޫމާތުތަކެއް ކަމަށެވެ. އަދި އެޖެންސީ ހިންގުމަށް ބޭނުންވާ މުވައްޒަފުން ހޯދުމާއި އެ މުވައްޒަފުންގެ ޒިންމާތައް ހަވާލުކުރުމަކީވެސް އެކަމަށް ކަނޑައެޅިފައިވާ އުސޫލުތަކެއްގެ ތެރެއިން ކުރެވެމުންދާ ކަމެއް ކަމަށް ފާހަގަކުރައްވާފައިވެއެވެ.

އެންސްޕާއިން ވަނީ، އެ އެޖެންސީއާ ގުޅޭގޮތުން ދެކެވޭ ޙަޤީޤަތާ ޚިލާފު ވާހަކަތަކާ ގުޅިގެން ފުރިހަމަ، މިނިވަން ތަޙުޤީޤެއް ހިންގައިދިނުމަށް އެންޓި-ކޮރަޕްޝަން ކޮމިޝަން (އޭސީސީ) ގައި އެދިފައެވެ. އަދި ތަޙުޤީޤު ނިންމައި ރިޕޯޓް އެ އިދާރާއާ ވީހާވެސް އަވަހަކަށް ހިއްސާކުރުމަށްވެސް އެދިފައިވާ ކަމަށް އެ އެޖެންސީން ބުނެފައިވެއެވެ.