ވަރޓިކަލް ފާމިންގ މަޝްރޫޢު ކުރިއަށް ގެންދިއުމަށް 5 ރަށެއް ކަނޑައަޅައިފި

ވަރޓިކަލް ފާމިންގ މަޝްރޫޢު ކުރިއަށް ގެންދިއުމަށް 5 ރަށެއް ކަނޑައަޅާފައިވާ ކަމަށް ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. ޢައިޝަތު ރަމީލާ ވިދާޅުވެއްޖެއެވެ. މި މަޝްރޫޢުގެ ދަށުން ވަރޓިކަލް ފާމިންގ މަސައްކަތް ފުރަތަމަ ފަށާ ރަށްތަކުގެ ގޮތުގައި ކަނޑައަޅާފައިވަނީ ނ. ކެނދިކުޅުދޫ، ޅ. ނައިފަރު، ރ. ހުޅުދުއްފާރު، އއ. މަތިވެރި އަދި ތ. ކިނބިދޫ ކަމަށް އެ ވުޒާރާއިން މަޢުލޫމާތު ދެއްވިއެވެ.

ޕީއެސްއެމް ނިއުސްއިން ގެނެސްދޭ "ހަފްތާ 52" ޕްރޮގްރާމްގައި ވާހަކަފުޅު ދައްކަވަމުން ވަޒީރު ވިދާޅުވީ، މިހާރު ކުރަމުންދަނީ ވަރޓިކަލް ފާމިންގ ސްޓްރަކްޗަރ ރާއްޖެއަށް ގެނައުމުގެ މަސައްކަތް ކަމަށެވެ. އަދި މި އަހަރުގެ ފަހުކޮޅު ނުވަތަ އަންނަ އަހަރުގެ ކުރީކޮޅު މި ސްޓްރަކްޗަރގެ މަސައްކަތް ނިމި، ޢަމަލީ ގޮތުން ރަށްރަށުގައި މަސައްކަތް ފެށޭނެ ކަމަށް އުންމީދުކުރައްވާ ކަމަށް ވިދާޅުވިއެވެ.

ވަޒީރު އިތުރަށް ވިދާޅުވީ، ރާއްޖޭގެ ދަނޑުވެރިކަމުގެ ދާއިރާ ޒަމާނާ އެއްގޮތަށް ތަރައްޤީކުރުމަކީ ސަރުކާރުގެ މުހިންމު ސިޔާސަތެއް ކަމަށެވެ. މި މަޝްރޫޢުގެ ދަށުން ސްޓްރަކްޗަރތައް ގެނައުމަށްފަހު، ރަށްރަށުގެ ރައްޔިތުންނަށް ވަރޓިކަލް ފާމިންގ ތަމްރީނުތައް ދޭން ފެށުމަށް ރާވާފައިވާ ކަމަށާއި، މި ސިސްޓަމްތައް ބޭނުންކޮށްގެން ގަސް ހެއްދުމަށް ބޭނުންވާ ފަންނީ އެހީތެރިކަންވެސް ފޯރުކޮށްދިނުމަށް ހަމަޖެހިފައިވާ ކަމަށް ވަޒީރު ވިދާޅުވިއެވެ.

މި މަޝްރޫޢަކީ ޔޫއެންޑީޕީގެ އެހީގައި ކުރިއަށްގެންދާ މަޝްރޫޢެއް ކަމަށް ވަޒީރު ފާހަގަކުރެއްވިއެވެ. ސަރުކާރުގެ އަމާޒަކީ ރާއްޖޭގެ ދަނޑުވެރިކަމުގެ ދާއިރާ އިތުރަށް ފުޅާކޮށް، ރާއްޖެއަށް ޢާންމުކޮށް އެތެރެކުރާ ކާބޯތަކެތީގެ ތެރޭގައި ހިމެނޭ ތަރުކާރީއާއި މޭވާގެ ބާވަތްތައް ރާއްޖޭގައި އުފައްދައި، އިމްޕޯޓަށް ބަރޯސާވެފައިވާ މިންވަރު ކުޑަކުރުން ކަމަށްވެސް ވަޒީރު ވިދާޅުވިއެވެ.