ޤައުމިއްޔަތު ނެގެހެއްޓުމަކީ މިނިވަން ޤައުމެއްގެ ގޮތުގައި ދެމިއޮތުމަށް މުހިންމު ކަމެއް: ރައީސުލްޖުމްހޫރިއްޔާގެ ނައިބު

މިނިވަން އަދި ތަހުޒީބު ޤައުމެއްގެ ގޮތުގައި ދިވެހިރާއްޖެ ދެމިއޮތުމަށްޓަކައި އެންމެ މުހިންމީ ޤައުމިއްޔަތު ނެގެހެއްޓުންކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުޙައްމަދު ލަޠީފް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިއަދު ބޭއްވުނު ދިވެހި ޤައުމިއްޔަތުގެ އިސްވަރުގެ ފުރަތަމަ މަހާސިންތާ "ކަޅުއޮށްފުންމި – ދިވެހި ޤައުމިއްޔަތުގެ ދަރުބާރު" ފެށުމުގެ ރަސްމީއްޔާތުގައި ވާހަކަފުޅު ދައްކަވަމުންނެވެ.

މި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ ނައިބު ވަނީ ދިވެހި ޤައުމިއްޔަތު ނެގެހެއްޓުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ. އެގޮތުން ޤައުމިއްޔަތު ކުރިއަރުވައި، އީޖާދީ ވިސްނުންތަކެއް ގެނައުމަށް މިފަދަ ދަރުބާރުތައް މުހިންމުކަމަށް އެމަނިކުފާނު ވިދާޅުވިއެވެ. އަދި މިއީ ޤައުމިއްޔަތާއި އަމިއްލަވަންތަކަން ރައްކާތެރިކުރުމަށާއި އެކަމަށް ހޭލުންތެރިކަން އިތުރުކުރުމަށް އެޅޭ މުހިންމު ފިޔަވަޅެއް ކަމަށްވެސް ފާހަގަކުރެއްވިއެވެ.

އަޅުގަނޑު ޤަބޫލުކުރާ ގޮތުގައި މިނިވަން އަދި ތަހުޒީބު ޤައުމެއްގެ ގޮތުގައި އެތައްހާސް އަހަރަކަށް، ރާއްޖެ ދެމިއޮތުމަށްޓަކައި އެންމެ މުހިންމު ކަމަކީ ދިވެހި ޤައުމިއްޔަތު ނެގެހެއްޓުން. ދިވެހިންގެ ޤައުމިއްޔަތާއި މެދު ފަޚުރުވެރިވާ ބަޔަކަށް އަޅުގަނޑުމެން އެންމެންވެސްވުން

ރައީސުލްޖުމްހޫރިއްޔާގެ ނައިބު.

މީގެ އިތުރުން، ދިވެހި ޤައުމިއްޔަތުގެ ބަހާތައް ކުރިއަރުވަން ޖެހޭކަން ފާހަގަކުރައްވަމުން، ރައީސުލްޖުމްހޫރިއްޔާގެ ނައިބު ވިދާޅުވީ އަމިއްލަ ބަހެއް އަދި އާދަކާދަތަކެއް ދިވެހީންނަށް ލިބިފައިވާއިރު، ދިވެހިރާއްޖެއަށްވުރެ ބޮޑު އަދި މުއްސަނދި ޤައުމުތަކުގައިވެސް މިފަދަކަންކަން ފުރިހަމަ ނުވާ ކަމަށެވެ.

އެމަނިކުފާނު ވަނީ ދިވެހި ޤައުމީއްޔަތަށް ރައީސުލްޖުމްހޫރިއްޔާ ދެއްވާ އިސްކަމަށްވެސް އަލިއަޅުއްވާލައްވާފައެވެ. އެގޮތުން ތަޢުލީމީ މަންހަޖުގެ ތެރޭގައި ޤައުމިއްޔަތު ހިމަނުއްވައި، ދިވެހި ޤައުމީ ސަލާމަށާއި، ދިވެހި ދިދައަށް ޚާއްސަ އިސްކަމެއް ދެއްވާކަން އެމަނިކުފާނު ފާހަގަކުރެއްވިއެވެ.

ރާއްޖޭގެ މިނިވަންކަން ކަށަވަރުކުރެއްވުމަށާއި، ޤައުމިއްޔަތު ކުރިއެރުވުމަށް ރައީސުލްޖުމްހޫރިއްޔާ ކުރައްވަމުންގެންދަވާ މަސައްކަތަށް އެއްބާރުލުން ދޭންޖެހޭކަމަށްވެސް ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ވިދާޅުވިއެވެ.

ދިވެހިންނަކީ ފަޚުރުވެރި ތަރީޚީ، ޒަމާންވީ އާދަކާދަތަކާއި، ކާބަފައިންގެ ހީވާގި ދިރިއުޅުމާއި ދިވެހި ބަހުގެ ޗާލުކަންފަދަ، އަޅުގަނޑުމެން ޤައުމިއްޔަތުގެ ބަހާތަކަކީ ރާއްޖެއަށް ލިބިފައިވާ އިތުރު ޒީނަތްތެރިކަމެއްގެ ގޮތުގައި ދުނިޔެއަށް ހާމަކޮށްދޭން އެބަޖެހޭ. ރާއްޖޭގެ އާމާންކަން ދިވެހިން ޚުލްޤުހެޔޮކަން މި ޤައުމަށް އަންނަ ކޮންމެ ފަތުރުވެރިއަކަށް އަޅުގަނޑުމެން ދައްކަން އެބަޖެހޭ

ރައީސުލްޖުމްހޫރިއްޔާގެ ނައިބު

މި ދަރުބާރަކީ ދިވެހި ޤައުމިއްޔަތާއި ގުޅުންހުރި އަދި ދިވެހިންގެ އަމިއްލަވަންތަކަމާގުޅޭ މުހިންމު ދާއިރާތަކަށް މަޢުލޫމާތު ހުށަހަޅައި، އިލްމީ މަޝްވަރާތަކެއް ކުރެވި، އައު އީޖާދީ ވިސްނުންތަކެއް ލިބިގެންދާނެ ފުރުޞަތެއްކަމަށް ރައީސުލްޖުމްހޫރިއްޔާގެ ނައިބު ޔަޤީންކުރެއްވިއެވެ.