ސިޓީ ފަހަތަށް ޖައްސާލުމަށްފަހު ބްރައިޓަން ލީގުގެ ދެވަނައަށް

އިންގްލިޝް ޕްރިމިއަލީގުގައި ހުކުރު ދުވަހުގެރޭ ބްރައިޓަން އެންޑް ހޯލްވްސް އިން ސައުތެމްޕްޓަންއާ ދެކޮޅަށް ކުޅުނު މެޗު 1-1 އިން އެއްވަރުވެ އެއް ޕޮއިންޓު ހޯދުނު ނަމަވެސް، ލީގުގެ ދެވަނައިގައި އޮތް މެންޗެސްޓަރ ސިޓީ ފަހަތަށް ޖައްސާލުމަށްފަހު އެ ޓީމު ލީގުގެ ދެވަނައަށް ކުރިޔަށް ޖެހިލައިފިއެވެ. ބްރައިޓަން މިވަގުތު ލީގުގެ ދެވަނައިގައި އޮތީ 13 މެޗުން 23 ޕޮއިންޓު ހޯދައިގެންނެވެ. 

ބްރައިޓަންގެ އެމެކްސް ސްޓޭޑިއަމްގައި ކުޅުނު މި މެޗުގައި ފުރަތަމަ ލީޑު ނެގީ ވެސް އެޓީމެވެ. އެގޮތުން މެޗުގެ 29 ވަނަ މިނެޓުގައި އެ ގޯލު ކާމިޔާބުކޮށްދިނީ މޮޅު ކުޅުމެއް ދައްކަމުން އަންނަ ކޯރު މިޓޯމާއެވެ. ނަމަވެސް ދެވަނަ ހާފުގައި ސައުތެމްޕްޓަންގެ ފްލައިން ޑައުންސް ވަނީ އޭނާގެ ފުރަތަމަ ލީގު ގޯލު ޖަހާ، މެޗުގެ ނަތީޖާ ހަމަހަމަކޮށްފައެވެ. 

މެޗަށްފަހު ވާހަކަ ދައްކަމުން ބްރައިޓަންގެ ކޯޗު ފެބިއަން ހާޒެލަރ ބުނީ، އެ ޓީމަށް ބޯޅަ ހިފަހައްޓައިގެން ރަގަޅު އިންޓެންސިޓީއެއްގައި މެޗު ނުކުޅެވުނު ކަމަށާއި ފުރަތަމަ ހާފުގައި މެޗު ނިންމާލުމަށް ރަގަޅު ފުރުސަތުތަކެއް ލިބުނު ކަމަށެވެ. ނަމަވެސް ފުރުސަތުގެ ބޭނުން ނުހިފުމުގެ ނަތީޖާއަކަށްވީ، ފަހު ހާފުގައި އިދިކޮޅު ޓީމުން މެޗުގެ ނަތީޖާ ހަމަހަމަ ކުރުން ކަމުގައި އޭނާ ބުންނެވެ.

ބްރައިޓަން ދެވަނައަށް ޖެހެލި ނަމަވެސް، ސިޓީއަށް ވެސް ލިބިފައިވަނީ ހަމަ 23 ޕޮއިންޓެވެ. ބްރައިޓަންއަށް ވުރެން އެއް މެޗު މަދުން ކުޅެ އެ އަދަދަށް ޕޮއިންޓު ހޯދާފައިވާ ސީޓިއަށް ދެން އޮތީ ބޮޑު އިމްތިހާނެކެވެ. ސިޓީއަށް ލީގުގެ ދެވަނަ އަނބުރާ ޔަގީން ކުރެވޭނީ އެންފީލްޑްގައި ލިވަޕޫލް ބަލިކޮށްގެންނެވެ. މި މެޗު ކުޅެން ހަމަޖެހިފައިވަނީ އާދީއްތަ ދުވަހުއެވެ. އަދި ލިވަޕޫލްގެ މިވަގުތުގެ ފޯމާއެކު، އެ ޓީމު ބަލިކުރުމަށް ސިޓީއިން ބުރަ މަސައްކަތްތަކެއް ކުރަން ޖެހޭނެއެވެ.

ސިޓީގެ އިތުރުން، މި ހަފްތާ ނިމޭއިރު ލީގުގެ ދެވަނައަށް އެރުމުގެ ފުރުސަތު ޗެލްސީ އާއި އާސެނަލްއަށް ވެސް އެބައޮތެވެ. އަދި މި ރޭހުގައި ފައިތިލަ ސާބިތުކުމަށް އެ ދެޓީމު ވެސް ޖެހޭނީ 3 ޕޮއިންޓު ހޯދާށެވެ. މިހަފްތާ ޗެލްސީއިން އެސްޓަން ވިލާއާ ދެކޮޅަށް ނިކުންނަ އިރު އާސެނަލް ނިކުންނާނީ ވެސްޓް ހޭމްއާ ދެކޮޅަށެވެ.