ފަލަސްޠީނަށް އެހީވުމަށް ރާއްޖެއިން މިއަހަރުވެސް 50،000 ޑޮލަރު ދެނީ

ފަލަސްޠީނުގެ ރައްޔިތުންނަށް އެހީތެރިކަން ފޯރުކޮށްދިނުމަށް އދ. އިން އުފައްދާފައިވާ 'އަންރުވާ'  އަށް، މިއަހަރުވެސް ދިވެހިރާއްޖެއިން 50,000 އެމެރިކާ ޑޮލަރު ދިނުމަށް ނިންމައިފިއެވެ.

މިކަން އިޢުލާން ކުރައްވާފައިވަނީ މިދިޔަ ބުދަ ދުވަހު އދ. ގެ މައިމަރުކަޒުގައި ބޭއްވި 'އަންރުވާ ޕްލެޖިންގް ކޮންފަރެންސް' ގައެވެ. ރާއްޖޭގެ ފަރާތުން މި އެހީ އިޢުލާން ކުރެއްވީ ދިވެހިރާއްޖެއިން އދ. އަށް ކަނޑައަޅުއްވާފައި ހުންނަވާ ދާއިމީ މަންދޫބު ޑރ. ޢަލީ ނަސީރު މުޙައްމަދެވެ.

ފަލަސްޠީނަށް ކުރިމަތިވެފައިވާ އިންސާނީ ކާރިސީ ޙާލަތުން އަރައިގަތުމަށް އެހީވުމުގެ ގޮތުން ރާއްޖެއިން ކޮންމެ އަހަރުވެސް އަންނަނީ މާލީ އެހީ ފޯރުކޮށްދެމުންނެވެ. މީގެކުރިން އަންރުވާ މެދުވެރިކޮށް ރާއްޖެއިން ކޮންމެ އަހަރަކު ދެމުން އައީ 5,000 ޑޮލަރެވެ. ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަނީ 2024 ވަނަ އަހަރުން ފެށިގެން މި ޢަދަދު 10 ގުނަ އިތުރުކޮށް، 50,000 ޑޮލަރަށް ބޮޑުކުރައްވާފައެވެ.

މި ކޮންފަރެންސްގައި ވާހަކަފުޅު ދައްކަވަމުން ޑރ. ޢަލީ ނަސީރު ވިދާޅުވީ، އަންރުވާއަށް އެހީ ފޯރުކޮށްދިނުމަކީ ހަމައެކަނި މާލީ ނިންމުމެއް ނޫން ކަމަށެވެ. އެއީ އިންސާނީ ކަރާމާތާއި، ބައިނަލްއަޤުވާމީ ޤަވާއިދުތަކުގެ މައްޗަށް ބިނާވެފައިވާ ނިޒާމެއް ޙިމާޔަތްކުރުމާ ގުޅުންހުރި މުހިންމު ކަމެއްކަން އެމަނިކުފާނު ފާހަގަކުރެއްވިއެވެ.

މީގެ އިތުރުން، އަންރުވާގެ މަސައްކަތްތަކަށް ހުރަސްއެޅުމަށް ކުރިމަތިވަމުންދާ ގޮންޖެހުންތަކާއި، އެ އިދާރާއާ ދެކޮޅަށް ކުރަމުންދާ ދޮގު ތުހުމަތުތަކަށް އިޝާރާތް ކުރައްވައި، އަންރުވާގެ މަސްއޫލިއްޔަތުތައް އަދާކުރުމަށް ބޭނުންވާ މާލީ އެހީތެރިކަން ފޯރުކޮށްދިނުމަށް ބައިނަލްއަޤްވާމީ މުޖުތަމަޢަށް ރާއްޖެއިން ވަނީ ގޮވާލާފައެވެ. އަދި ރާއްޖެއިން އަބަދުވެސް ފަލަސްޠީނުގެ ރައްޔިތުންނާއެކު ސާބިތުކަމާއެކު އޮންނާނެކަން ޑރ. ޢަލީ ނަސީރު ތަކުރާރު ކުރެއްވިއެވެ.

'އަންރުވާ' އަކީ 1948 ވަނަ އަހަރު އދ. އިން ފާސްކުރި ޤަރާރެއްގެ ދަށުން، ފަލަސްޠީނުގެ ރެފިއުޖީންނަށް އެހީތެރިކަން ފޯރުކޮށްދިނުމަށް އުފައްދާފައިވާ ޚާއްޞަ އިދާރާއެކެވެ. ރާއްޖެއަކީ އާބާދީގެ ގޮތުން ކުޑަ ޤައުމެއް ނަމަވެސް، ފަލަސްޠީނުގެ ރައްޔިތުންގެ ޙައްޤުތައް ކަށަވަރު ކުރުމަށް ބައިނަލްއަޤްވާމީ އެކި ޕްލެޓްފޯމްތަކުގައި ރާއްޖެއިން ދަނީ ވަކާލާތު ކުރަމުންނެވެ.

Today, Ambassador @AlinyMohamed announced #Maldives pledge of USD 50,000 to @UNRWA in support of #Palestine refugees; reaffirmed 🇲🇻 commitment to ensuring humanitarian assistance to those who needs it, & called for UNRWA's mandate to be protected & enabled without obstruction. pic.twitter.com/YqdtiiiN1c

— Maldives Mission NY (@MVPMNY) July 1, 2026