ޚަބަރު
އައްޑޫގައި ވިއްސާރައިގެ ސަބަބުން 5 ގެއެއްގެ ފުރާޅު އެއްލާލުމުން ސިފައިން އެހީތެރިވެއްޖެ

ފުރާޅު މަރާމާތު ކުރުމަށް ފުލުހެއް ހަރަކާތްތެރިވަނީ ފޮޓޯ:އެމްއެންޑީއެފް
ރޭ އައްޑޫ ސިޓީއަށް ކުރި ގަދަ ވިއްސާރައިގެ ސަބަބުން 5 ގެއެއްގެ ފުރާޅު ވަޔާއެކު މަގުމައްޗަށް އެއްލާލާފައިވާކަމަށް އެމްއެންޑީއެފުން މަޢުލޫމާތު ދީފިއެވެ. މި ހާދިސާ ހިނގީ ރޭ އައ ހިނގީ ރޭ އައްޑޫ ސިޓީއަށް ކުރި ވިއްސާރައާއެކު އައި ގަދަ ކޮޅިގަނޑުގައެވެ.
އެމްއެންޑީއެފުން ބުނީ މި ހާދިސާގައި ފުރާޅު އެއްލާލާފައިވަނީ އައްޑޫ ސިޓީގެ މަރަދޫގެ ގެއަކާއި، މަރަދޫފޭދޫގެ ގެއަކާއި، ފޭދޫގެ ދެ ގެއަކާއި، އަދި ހުޅުދޫގެ ގެއެއްގެ ކަމަށެވެ. މި ހާދިސާއާ ގުޅިގެން އެމްއެންޑީއެފް ސަދަން އޭރިއާ ކޮމާންޑްގެ ސިފައިން ވަނީ އެ ގެތަކުގެ ފުރާޅުތައް މަގުމަތިން އެއްފަރާތްކޮށް، ފުރާޅު އަލުން ހެދުމުގައި އެހީތެރިކަން ފޯރުކޮށްދީފައެވެ.
އެމްއެންޑީއެފުން އިތުރަށް ބުނީ މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށެވެ. ނަމަވެސް، މި ކަހަލަ ހާދިސާތަކުގައި ރައްޔިތުން ސަލާމަތްތެރިކަމަށް އިސްކަންދިނުމަށް އެމްއެންޑީއެފުން އިލްތިމާސްކޮށްފައިވެއެވެ.
މޫސުމާބެހޭ އިދާރާއިން ވަނީ ކުރިއަށް އޮތް ދުވަސްތަކުގައިވެސް ރާއްޖޭގެ އެކި ސަރަޙައްދުތަކަށް ވިއްސާރަވެ، ވައި ގަދަވުމުގެ ފުރުޞަތު އޮތްކަމަށް އަންގާފައެވެ. އެހެންކަމުން، ރައްޔިތުން ވިއްސާރައަށް ތައްޔާރުވެ، ސަލާމަތީ ފިޔަވަޅުތައް އެޅުމަށް ކަމާބެހޭ ފަރާތްތަކުން އިލްތިމާސްކޮށްފައިވެއެވެ.