އިސްރާއީލުން މަސައްކަތް ކުރަނީ އެމެރިކާއާއި އީރާނުގެ އެއްބަސްވުމަށް ހުރަސްއަޅަން: އުރުދުޣާން

އެމެރިކާއާއި އީރާނާ ދެމެދު ވެވިފައިވާ ފަހުމުނާމާ (އެމް.އޯ.ޔޫ) އަށް ހުރަސްއަޅައި، އެ އެއްބަސްވުން ނަގާލުމަށް އިސްރާއީލުން މަސައްކަތް ކުރަމުންދާ ކަމަށް ތުރުކީވިލާތުގެ ރައީސް ރަޖަބް ތައްޔިބު އުރުދުޣާން ތުހުމަތު ކުރައްވައިފިއެވެ.

ޕާކިސްތާނުގެ ބޮޑުވަޒީރު ޝެހްބާޒް ޝަރީފާއެކު އިސްތަންބޫލްގައި ބޭއްވެވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް އުރުދުޣާން ވިދާޅުވީ، ސަރަހައްދީ ސުލްހަ ގާއިމުކުރުމަށް ކުރެވޭ އެއްވެސް މަސައްކަތަކަށް ހުރަސް ނޭޅުމަށް އިސްރާއީލަށް އިންޒާރު ދެއްވާ ކަމަށެވެ. އަދި ސަރަހައްދީ ހަމަޖެހުމަށްޓަކައި ކުރެވޭ ކޮންމެ މަސައްކަތަކަށް ތުރުކީވިލާތުން ފުރިހަމަ އެއްބާރުލުން ދޭނެ ކަމުގެ ޔަގީންކަން އެމަނިކުފާނު ދެއްވިއެވެ.

"އަޅުގަނޑުމެންނަށް އެނގޭ މި ސުލްހައިގެ މަޝްވަރާތަކަކީ ވަރަށް ގިނަ ގޮންޖެހުންތަކާ ކުރިމަތިލާންޖެހުނު މަރުހަލާއެއްކަން،"

އުރުދުޣާން ވިދާޅުވިއެވެ.

މީގެ އިތުރުން ރައީސް އުރުދުޣާން ފާހަގަކުރެއްވި ގޮތުގައި އިސްރާއީލުގެ ދެމިއޮތުން ބިނާވެފައިވަނީ ސަރަހައްދީ ހަމަނުޖެހުންތަކުގެ މައްޗަށެވެ. ޚާއްޞަކޮށް ސީރިއާ އާއި ލުބުނާނުގައި ހިނގަމުންދާ ހަމަނުޖެހުންތަކަކީ އިސްރާއީލުގެ މަސްލަހަތު ހިމެނޭ ކަންކަން ކަމަށް އެމަނިކުފާނު ތުހުމަތު ކުރެއްވިއެވެ.

މި ބައްދަލުވުމުގައި ތުރުކީއާއި ޕާކިސްތާނުން ވަނީ މެދުއިރުމަތީގެ މަސްލަހަތު ފިނިކުރުމަށާއި، ފަލަސްތީނުގެ ރައްޔިތުންނަށް ކުރިމަތިވަމުންދާ އަނިޔާވެރިކަން ހުއްޓުވުމަށް ބައިނަލްއަގުވާމީ މުޖުތަމައުން ގުޅިގެން މަސައްކަތް ކުރުމަށް ގޮވާލާފައެވެ.