Ads by Exprox

ޚަބަރު

މިސަރުކާރުގަ އެއްވެސްބޭފުޅެއް އިސްތިސްނާ ނުކޮށް އެމީހެއްގެ ފުރާނަ ރައްކާތެރިކުރެވޭނެ ހުރިހާ ފިޔަވަޅެއް އަޅާނެ: ވަޒީރު އިޙްސާން

މިސަރުކާރުގަ އެއްވެސްބޭފުޅެއް އިސްތިސްނާ ނުކޮށް އެމީހެއްގެ  ފުރާނަ ރައްކާތެރިކުރެވޭނެ ހުރިހާ ފިޔަވަޅެއް އަޅާނެ: ވަޒީރު އިޙްސާން

ދާޚިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙްސާން. ފޮޓޯ: ރައީސް އޮފީސް

ޙަސްނާ އަޙްމަދް

ޙަސްނާ އަޙްމަދް

30 ނޮވެމްބަރު 2024، 06:12

30 ނޮވެމްބަރު 2024، 06:12

މިސަރުކާރުގަ އެއްވެސްބޭފުޅެއް އިސްތިސްނާ ނުކޮށް އެމީހެއްގެ ހަށިގަނޑާއި ފުރާނަ ރައްކާތެރިކުރެވޭނެ ހުރިހާ ފިޔަވަޅެއް އަޅާނެ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ. 

ވަޒީރު މިހެން ވިދާޅުވީ އިދިކޮޅު އެމްޑީޕީގެ އެކްޓިވިސްޓަކު އެކްސްގައި ކުރި ޕޯސްޓަކާ ގުޅިގެން އެ އެކްޓިވިސްޓަށް ފުލުހަށް ހާޒިރުވުމަށް އެންގުމާ ގުޅިގެން އެމްޑީޕީގެ ޗެއަރ ޕަރސަން ފައްޔާޒް އިސްމާޢިލް ކުރެއްވެވި ޕޯސްޓަކާ ގުޅިގެންނެވެ. 

ފައްޔާޒް ވިދާޅުވެފައިވަނީ ޓްވީޓް ކުރާތީ އެމްޑީޕީގެ އެކްޓިވިސްޓެއް ކަމަށްވާ ހުސެއިން ޝާފިޢު އަށް ފުލުހަށް ހާޒިރުވުމަށް އަންގާފައިވާ ކަމަށާއި، ރައީސުލްޖުމްހޫރިއްޔާ އާއި ސަރުކާރުގެ އިސްވެރިންގެ "އަބުރުފުޅު"ގެ ހިމާޔަތުގައި ކައުންސިލަރުންނާ ދެކޮޅަށް ފިޔަވަޅު އަޅަން ފަށައިފި ކަމަށެވެ.

އަދި ސަރުކާރާ މެދު ހިތްހަމަނުޖެހުން އޮތްކަން ހާމަކުރުމަކީ ބޮޑު ކުށަކަށް މިއަދު ވެއްޖެ ކަމަށާއި، ރައްޔިތުންގެ އަޑު ކަނޑުވާލައި، ހިޔާލު ފާޅުކުރުމަށް ހުދުމުޚުތާރު ވެރިން އަބަދުވެސް ހުރަސް އަޅާނެ ކަމަށް ފައްޔާޒު ވަނީ ވިދާޅުވެފައެވެ.

“ހިޔާލާއި ފިކުރުގައި ތަޅެއް ނޭޅުވޭނެ. މިހެން ޗިޓު ފޮނުވިޔަސް ފާޅުގައި ބަސް ބުނުމުގެ ހިތްވަރު ދިވެހިންގެ އަދި ހާއްސަކޮށް އެމްޑީޕީގެ މެމްބަރުންގެ ހުންނާނެ” ފައްޔާޒް ވިދާޅުވެފައިވެއެވެ. 

ފައްޔާޒުގެ މި ޕޯސްޓަށް ރައްދު ދެއްވަމުން ވިދާޅުވީ ޝާފިއު ކޮށްފައިވާ ޕޯސްޓުގައި ބުނެފައިވަނީ “މަށަށް ކަލޭ މަގެއްމަތިން ނުފެއްނާތި!” މިހެން ކަމަށާއި، މި ޖުމްލައިން ކޮންމެވެސް މީހަކަށް ނިސްބަތްކޮށް އެމީހަކު މަގެއްމަތިން ފެނިއްޖެނަމަ އެމީހަކަށް ޖިސްމާނީގޮތުން ގެއްލުމެއް ދީފާނެކަމަށް ދޭހަވާގޮތަށް އޮތުމުން މިކަމުގެ ތަފްސީލު ހޯދާ މިކަން ސާފުކުރުމަކީ ކަމާބެހޭ އިދާރާތަކުން ކޮންމެހެން ކުރަންޖެހޭކަމެއް ކަމަށް ވަޒީރު އިޙްސާން ވިދާޅުވިއެވެ.

“މާދަމާ މީހަކު މިފަދަ އިބާރާތެއް މަނިކުފާނަށް ނިސްބަތްކޮށް ނުވަތަ ދޭހަވާގޮތަށް ބުނެފިނަމަ އެއީ ޚިޔާލުފާޅުކުރީކަމަށް ބަލާ އަޅާނުލާ ތިބެންވީތޯ؟ އަދި އެހެން ތިއްބާ މަނިކުފާނު މަގެއްމަތިން ފެނި ޖިސްމާނީ އަނިޔާއެއް ދީފިނަމަ އެއީ ފާޅުކުރި ޚިޔާލު އިތުރަށް ސާފުކޮށްދިނީކަމަށް ބަލާ އަޅާނުލާ ތިބެންވީތޯ؟ މިއީތޯ މަނިކުފާނުގެ ޒަޢާމަތެއްގައި މިގައުމުގައި ކަންކަން އޮންނާނެގޮތަކީ؟” ދާޚިލީ ވަޒީރު އިޙްސާން ވިދާޅުވެފައިވެއެވެ.

އެމަނިކުފާނު އިތުރަށް ވިދާޅުވެފައިވަނީ ޔަޤީނުންވެސް މިސަރުކާރުގަ އެއްވެސްބޭފުޅެއް އިސްތިސްނާ ނުކޮށް އެމީހެއްގެ ހަށިގަނޑާއި ފުރާނަ ރައްކާތެރިކުރެވޭނެ ހުރިހާ ފިޔަވަޅެއް އަޅާނެކަމަށެވެ.

ހަމައެއާއެކު ރާއްޖޭގެ ޤާނޫނުތަކާއި ޤަވާއިދުތަކުގެ އިމުގެތެރޭގައި ހިޔާލުފާޅުކުރެވޭނެ އެންމެ ފުޅާމިނަށް އެކަން ކުރެވޭނެ މަގު އޮންނާނީ އަބަދުވެސް ހުޅުވިފަ ކަމަށާއި، ކޮންމެ ކަމަކީ ސިޔާސީ ކުޅިވަރަކަށް ހެދުމަކީ ވަރަށް ޣައިރު ޒިންމާދާރު ކަމެއް ކަމަށް ވަޒީރު ވިދާޅުވިއެވެ.

 

 

 

 

މި ލިޔުން ކިޔާލުމުން

Ads by MSS