ޚަބަރު
މިހާތަނަށް މަސްތުވާތަކެތި ވިއްކާ 40 ތަނެއް ބަންދުކުރެވިފައިވާނެ: ސީޕީ ޝުޖާޢު
ކޮމިޝަނަރ އޮފް ޕޮލިސް ޢަލީ ޝުޖާޢު. ފޮޓޯ: ޕޮލިސް
މިހާތަނަށް މަސްތުވާތަކެތި ވިއްކާ 40 ތަނެއް ބަންދުކުރެވިފައިވާނެ ކަމަށް ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވެއްޖެއެވެ.
ސީޕީ ޝުޖާޢު މިހެން ވިދާޅުވީ ޕީއެސްއެމްގެ ހަފްތާ 52 ޕްރޮގްރާމްގައި ވާހަކަފުޅު ދައްކަވަމުންނެވެ.
ސީޕީ ޝުޖާޢު ވިދާޅުވެފައިވަނީ މިދިޔަ އަހަރެއްހާ ދުވަހުގެ ތެރޭގައި ގިނަ ޢަދަދެއް މަސްތުވާތަކެއްޗާއި ބަނގުރާ އަތުލައިގަނެވިފައިވާކަމަށެވެ. އަދި އެ ވިޔަފާރި ކުރަމުންދިޔަ ގިނަ ޢަދަދެއްގެ ތަންތަން ފުލުހުންގެ މަސައްކަތުން ހުއްޓުވިފައިވާކަމަށްވެސް ސީޕީ ޝުޖާޢު ވިދާޅުވިއެވެ.
ސީޕީ ޝުޖާޢު ވިދާޅުވީ މިވެރިކަން ފެށިގެން މިހާތަނަށް 40 އަށް ވުރެ ގިނަ މަސްތުވާތަކެތި ވިއްކާ ތަންތަން ބަނދުކޮށްފައިވާނެ ކަމަަށެވެ. އަދި ބައެއް ތަންތަނަކީ ބަނދުކޮށްފައި ހުރިނަމަވެސް ދުވަސްކޮޅަކުން އަލުން ހުޅުވާ ތަންތަން ކަން ސީޕީ ޝުޖާޢު ފާހަގަކުރެއްވެވިއެވެ.
ޝުޖާޢު ވިދާޅުވީ މިމައްސަލައަށް ޖުމްލަ ހައްލެއް ގެނައުމަށް މި ވިޔަފާރި ކުރަމުންދާ ބޮޑުންގެ މައްސަލަ ހައްލު ކުރަންޖެހޭ ކަމަށެވެ. އެގޮތުން އެކަމަށް ޚާއްސަ މަސައްކަތްތަކެއް ކުރެވި ރައްޔިތުންނަށް އެކަމުގެ ނަތީޖާ ފެންނަމުންދާނެ ކަމަށް ވިދާޅުވިއެވެ. މީގެ އިތުރުން ފަރުވާގެ ނިޒާމު ހަރުދަނާ ކުރުމަށްވެސް މަސައްކަތްތަކެއް އެންޑީއޭއާއި ގުޅިގެންދާ ކަމަށް ސިިޕީ ޝުޖާޢު ވިދާޅުވިއެވެ.
ސީޕީ ޝުޖާޢު ވިދާޅުވީ ބައެއްގެ ފުށުން މަސްތުވާތަކެތީ ވަބާ ފެތުރިޔަ ނުދިނުމަށްޓަކައި ޓާގެޓް ކުރަންޖެހޭ ބަޔަކީ މަަސްތުވާތަކެތި އެތެރެކޮށް މި ވިޔަފާރިކުރާ ނެޓްވޯކްތަ ކަމަށެވެ. އަދި އެމީހުންނަކީ ކޮންބައެއްތޯ ބަލާ އެމީހުންގެ މައްޗަށް ރަނގަޅު ތަހުޤީޤެއް ހިންގުން މުހިންމު ކަމަށާއި އެކަމަންޓަކާއި ވާންޖެހޭ ތައްޔާރީތައް ފުލުހުން ދަނީ ވަމުންކަމަށްވެސް ޝުޖާޢު ވިދާޅުވިއެވެ. ކޮމިޝަނަރ ވިދާޅުވީ މިދިޔަ އެއް އަހަރުތެރޭ ރައްޔިތުންގެ އިތުބާރު ހޯދުމަށް ގިނަ މަސައްކަތްތަކެއް ކުރެވިފައިވާކަމަށާއި ރައްޔިތުންގެރައްކާތެރިކަން ކަށަވަރުކުރުމަށް، ފުލުހުން ފެންނަ މިންވަރު މިހާރު އިތުރުކޮށްފައިވާކަމަށެވެ.
އަދި އެކަން ގިނަ އަދަދެއްގެ ރައްޔިތުން ބަލައިގެންފައިވާކަންވެސް ސީޕީ ޝުޖާޢު ވިދާޅުވިއެވެ.
