ލުބުނާނުގެ ހައްގުތަކާއި މުއައްސަސާތަކުގެ ދިފާއުގައި އަބަދުވެސް ދެމިއޮތުމަށް ރައީސް އައުން އެމެރިކާއަށް ގޮވާލައްވައިފި

ލުބުނާނާއި އިސްރާއީލާ ދެމެދު އެމެރިކާ މެދުވެރިވެގެން ސޮއިކުރި ތާރީޚީ އެއްބަސްވުމަށްފަހު، އެމެރިކާއިން އަބަދުވެސް ލުބުނާނާއެކު ދެމިއޮތުމަށް އެ ގައުމުގެ ރައީސް ޖޯސެފް އައުން ގޮވާލައްވައިފިއެވެ.

 އެމެރިކާގެ 250 ވަނަ މިނިވަން ދުވަހުގެ މުނާސަބަތުގައި ރައީސް ޑޮނަލްޑް ޓްރަމްޕަށް ފޮނުއްވި ތަހުނިޔާގެ މެސެޖެއްގައި އައުން ވަނީ ލުބުނާނުގެ ހައްގުތަކާއި، މުއައްސަސާތަކާއި، ސިފައިން އަދި ރައްޔިތުންގެ ދިފާއުގައި އެމެރިކާއިން އަބަދުވެސް މަސައްކަތް ކޮށްދިނުމަށް އެދިވަޑައިގެންފައެވެ.

ރައީސް އައުން ވިދާޅުވީ ލުބުނާނުން މިހާރު އުންމީދު ކުރަނީ "ހަނގުރާމައިގެ ސަފުހާތައް ނިންމާލައި، އުންމީދާއި، ސުލްހަވެރިކަމާއި އަދި ހަމަޖެހުމުގެ އާ ސަފުހާއެއް ހުޅުވުމަށް" ކަމަށެވެ. މިކަމާ ގުޅިގެން ލުބުނާނުގައި ހުންނަ އެމެރިކާ އެމްބަސީން އެކްސްގައި ކުރި ޕޯސްޓެއްގައި ބުނެފައިވަނީ، ލުބުނާނުގެ ރައްޔިތުން ބިނާކުރަމުންދާ އުޖާލާ މުސްތަގުބަލުގައި އެ ގައުމާއެކު ފަޚުރުވެރިކަމާއެކު ދެމިތިބޭނެ ކަމަށެވެ.

މިދިޔަ ހަފުތާގައި އިސްރާއީލާއި ލުބުނާނުން ވަނީ ހިޒްބުﷲ ޖަމާއަތާއެކު ކުރިއަށްދާ ހަނގުރާމަ ދާއިމީކޮށް ހުއްޓާލުމަށް އެމެރިކާގެ އެހީތެރިކަމާއެކު އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގައި ހިޒްބުﷲ ހަތިޔާރު އެޅުން ހުއްޓާލުމަށާއި، އިސްރާއީލު ސިފައިން ލުބުނާނުގެ ދެކުނުން ފޭބުމަށާއި، އަދި އެ ސަރަހައްދުގައި ލުބުނާނުގެ ގައުމީ ސިފައިން ގާއިމުވުމަށް ހިމަނާފައިވެއެވެ. ނަމަވެސް، އިސްރާއީލު ސިފައިން ފައިބާނެ ވަކި ތާރީޚެއް ކަނޑައަޅާފައި ނުވާތީ ހިޒްބުﷲ އިން ވަނީ މި އެއްބަސްވުން ގަބޫލުކުރަން އިންކާރުކޮށްފައެވެ.

މިދިޔަ މާޗް މަހުގެ 2 ވަނަ ދުވަހުން ފެށިގެން ކުރިއަށްދާ މި ހަނގުރާމައިގައި މިހާތަނަށް 4,303 މީހުން މަރުވެ، 12,202 މީހުން ޒަޚަމްވެފައިވާ ކަމަށް ލުބުނާނުގެ ހެލްތު މިނިސްޓްރީން ބުނެއެވެ. ހަނގުރާމައިގެ ސަބަބުން ގެދޮރު ދޫކޮށް ދިޔަ މީހުންގެ ތެރެއިން 400,000 މީހުން މިހާރު އެނބުރި އަމިއްލަ ރަށްތަކަށް ގޮސްފައިވާ ކަމަށް ސޯޝަލް އެފެއާޒް މިނިސްޓަރު ހަނީން ސައްޔިދު ވިދާޅުވިއެވެ. ސަރުކާރުން މިހާރު ދަނީ ހާލުގައި ޖެހިފައިވާ މީހުންނަށް ވަގުތީ ބޯހިޔާވަހިކަމާއި ކުލީގެ އެހީތެރިކަން ފޯރުކޮށްދިނުމުގެ މަސައްކަތް ކުރަމުންނެވެ.

ސުލްހައިގެ ވާހަކަތައް ދެކެވުނު ނަމަވެސް، ލުބުނާނުގެ ދެކުނުގައި އިސްރާއީލުގެ ހަމަލާތައް އަދިވެސް ދަނީ ކުރިއަށެވެ. ލުބުނާނުގެ ގައުމީ މީޑިއާއިން ރިޕޯޓްކޮށްފައިވާ ގޮތުގައި އިސްރާއީލުގެ ހެލިކޮޕްޓަރުތަކުން މަޖްދަލް ޒޫން އަދި އަލް-މަންސޫރީ އަވަށަށް ހަމަލާދީފައިވެއެވެ. އިސްރާއީލު ސިފައިން ބުނެފައިވަނީ ދެކުނު ލުބުނާނުގެ "ސެކިއުރިޓީ ޒޯން" ތެރޭގައި ހަރަކާތްތެރިވަމުންދިޔަ ހަތިޔާރު އެޅި ހަނގުރާމަވެރިއަކު މަރާލާފައިވާ ކަމަށެވެ.