ކަސްޓަމްސްގެ 15 އޮފިސަރަކު ޑްރޯން ޕައިލެޓް ތަމްރީނު ފުރިހަމަކޮށްފި

މޯލްޑިވްސް ކަސްޓަމްސް ސަރވިސްގެ ބޯޑަރ ކޮންޓްރޯލް ވަރުގަދަކުރުމުގެ ގޮތުން، އޮސްޓްރޭލިއަން ބޯޑަރ ފޯސްއާ ގުޅިގެން ހިންގި ޚާއްޞަ ޑްރޯން ޕައިލެޓް ތަމްރީނު ޕްރޮގްރާމެއް ކަސްޓަމްސްގެ 15 އޮފިސަރަކު ކާމިޔާބުކަމާއެކު ފުރިހަމަކޮށްފިއެވެ.

މިދިޔަ ޖޫން މަހުގެ 28 އިން ޖުލައި މަހުގެ 2 އަށް ކުރިއަށްގެންދިޔަ މި ތަމްރީނު ޕްރޮގްރާމަކީ ކަސްޓަމްސްގެ ފާރަވެރިވުމާއި، މޮނިޓަރ ކުރުމާއި އަދި ތަންފީޒީ އޮޕަރޭޝަންތަކުގައި ޑްރޯން ބޭނުންކުރުމުގެ ޤާބިލުކަން އިތުރުކުރުމަށް ހިންގުނު މުހިންމު ހަރަކާތެކެވެ. މި ތަމްރީނުގެ ސަބަބުން ރާއްޖޭގެ ބޯޑަރު ބެލެހެއްޓުމުގެ މަސައްކަތްތަކަށް އިތުރު ކުރިއެރުމެއް ލިބިގެންދާނެއެވެ.

މި ތަމްރީނު ޕްރޮގްރާމް ކުރިއަށް ގެންދިއުމުގައި އޮސްޓްރޭލިއަން ބޯޑަރ ފޯސް އާއި ރާއްޖޭގައި ހުންނަ އޮސްޓްރޭލިއާގެ ހައިކޮމިޝަނުން ދެއްވި އެއްބާރުލުމަށް ކަސްޓަމްސްއިން ވަނީ ޝުކުރު އަދާކޮށްފައެވެ. އަދި ކަސްޓަމްސްގެ ދާއިރާ ހަރުދަނާކުރުމަށް އެ ފަރާތްތަކުން ދެއްވާ މެދުނުކެނޑޭ އެހީތެރިކަން މި ފުރުޞަތުގައި ފާހަގަކޮށްފައިވެއެވެ.

މީގެ އިތުރުން، މި ތަމްރީނު ކާމިޔާބުކަމާއެކު ނިންމާލުމުގައި މޯލްޑިވްސް ޕޮލިސް ސަރވިސްގެ އިންސްޓްރަކްޓަރުންގެ ފަރާތުން ލިބުނު ފަންނީ އެހީތެރިކަމާއި އިރުޝާދަށްޓަކައި ކަސްޓަމްސްއިން ވަނީ އެ މުއައްސަސާއަށްވެސް ޚާއްޞަ ޝުކުރެއް ރައްދުކޮށްފައެވެ.

މިފަދަ ޒަމާނީ ވަސީލަތްތަކަށް އޮފިސަރުން އަހުލުވެރިކުރުވުމަކީ ރާއްޖެއަށް އެތެރެވާ އަދި ބޭރުވާ ތަކެތި ކޮންޓްރޯލްކުރުމުގައާއި، ޤާނޫނާ ޚިލާފު އަމަލުތައް ހުއްޓުވުމަށް ކަސްޓަމްސްއިން ކުރަމުންދާ މަސައްކަތްތަކަށް ލިބިގެންދާނެ ވަރަށް ބޮޑު ބާރެކެވެ.

15 officers successfully completed the @AusBorderForce Drone Pilot Training held from 28 June -2 July, enhancing Maldives Customs' drone capabilities for surveillance, monitoring and enforcement operations.@AusHCMV pic.twitter.com/Us3BkDSvjE

— Maldives Customs Service (@CustomsMv) July 5, 2026