ލެސްޓަރ ސިޓީގެ ކޯޗެއްގެ މަގާމަށް ނިސްޓެލްރޯއީ ހަމަޖައްސައިފި

ގިނަ ބަޔަކު ހައިރާންކޮށްލުމަށްފަހު އިންގްލިޝް ޕްރިމިއަރ ލީގުގެ ޗެމްޕިއަންކަން މީގެ 9 އަހަރު ކުރިން ކާމިޔާބުކުރި ލެސްޓަރ ސިޓީގެ ހެޑް ކޯޗުގެ މަގާމަށް މެންޗެސްޓަރ ޔުނައިޓެޑުގެ ލެޖެންޑް، ރޫޑް ވެން ނިސްޓެލްރޯއީ ހަމަޖައްސައިފިއެވެ. އެކަން މިއަދު ވަނީ އެ ކުލަބުން އިއުލާންކޮށްފައެވެ. 

އުމުރުން 48 އަހަރުގެ ނިސްޓެލްރޯއީ ލެސްޓަރ ސިޓީގެ ކޯޗެއްގެ މަގާމަށް އައްޔަނުކުރިއިރު، އޭނާ ވަނީ މެންޗެސްޓަރ ޔުނައިޓެޑުގެ ވަގުތީ ކޯޗެއްގެ މަގާމުގައި ހުރުމަށްފަހު މީގެ 2 ހަފްތާއެއްހާ ދުވަސް ކުރިން އެ މަގާމު ދޫކޮށްލާފައެވެ. އެއީ އެއްބަސްވެވުނު ގޮތަށް، މެންޗެސްޓަރ އަށް ދާއިމީ ކޯޗަކު ހަމަޖެއްސުމުންނެވެ. 

ލެސްޓަރ ސިޓީއިން ނިސްޓެލްރޯއީއަށް ހުށަހެޅި އެގްރީމެންޓުގެ މުއްދަތު ހަމަވާނީ ޖޫން 2027 ގައެވެ. އޭނާ ޓީމާ ގުޅުނުކަން އިއުލާން ކުރުމަށް އެ ޓީމުގެ ސޯޝަލް މީޑިއާގައި އާންމު ކުރި ވީޑިއޯއެއްގައި ނިސްޓެލްރޯއީ ބުނީ، އެ ފުރުސަތު ލިބުނީތީ އޭނާ އުފާވާ ކަމަށާއި އަދި އެކަމަށް ފަހުރުވެރިވެސްވާ ކަމަށެވެ. އޭނާ އިތުރަށް ފާހަގަކުރި ގޮތުގައި، ކްލަބުގައި އޭނާއާއެކު މަސައްކަތް ކުރުމަށް އޮތީ ރަގަޅު ޓީމެއް ކަމަށާއި، ޓީމުގެ ފެންވަރު ވެސް ރަގަޅު ކަމަށާއި އަދި ސަޕޯޓަރުން ދެމުން ގެންދާ ހިތްވަރާމެދުވެސް ހިތްހަމަޖެހޭ ކަމަށެވެ. މީގެ އިތުރުން ޓީމުގެ ފަހުގެ ތާރީހަކީ ވެސް ފާހަގަކޮށްލެވޭ ތާރީހެއް ކަމަށް ނިސްޓެލްރޯއީ ބުނެފައި ވެއެވެ.

ލެސްޓަރ ސިޓީއިން ހާމަކޮށްފައިވާ ގޮތުގައި، މިރޭ އެ ޓީމު ބްރެޓްފޯޑާއި ކުޅޭ މެޗުގައި ނިސްޓެލްރޯއީ ހުންނާނީ މެޗު ބަލަން ކަމަށާއި، ޓީމާއި ރަސްމީކޮށް ހަވާލުވެ އޭނާ ފުރަތަމަ ނިކުންނާނީ އަންގާރަ ދުވަހު ވެސްޓް ހޭމްއާ ދެކޮޅަށް ކުޅޭ މެޗަށް ކަމަށެވެ.

އެރިކް ޓެންހެގް މަގާމުން ވަކިކުރުމާ ގުޅިގެން މެންޗެސްޓަރ ޔުނައިޓެޑުގެ ވަގުތީ ކޯޗެއްގެ މަގާމާއި ނިސްޓެލްރޯއީ ހަވާލުވެ އެ ޓީމުން ކުޅުނު 4 މެޗުން 3 މެޗު ވަނީ ކާމިޔާބުކޮށްފައެވެ. އަދި އަނެއް މެޗުވީ އެއްވަރެވެ. އޭރު ޔުނައިޓެޑު މޮޅުވި 3 މެޗުގެ ތެރެއިން ދެ މެޗަކީ، މިއަދު ނިސްޓެލްރޯއީ ހަވާލުވި ލެސްޓަރ ސިޓީއާ ދެކޮޅަށް ކުޅުނު ދެ މެޗެވެ. އެގޮތުން ލީގު ކަޕް މެޗުގައި އެ ޓީމު 5-2 އިން ބަލިކުރި އިރު، ލީގު މެޗުން ބަލިކޮށްފައިވަނީ 3-0 އިންނެވެ.

ލެސްޓަރ ސިޓީއާއި  ނިސްޓެލްރޯއީ ހަވާލުވެފައި މިވަނީ އެ ޓީމުގެ ކޯޗަކަށް ހުރި ސްޓީވް ކޫޕަރ އޭނާގެ މަގާމުން ވަކިކުރުމާ ގުޅިގެންނެވެ. އޭނާ މަގާމުން ވަކިކުރީ މިދިޔަ ހަފްތާގެ ހޮނިހިރު ދުވަހު ޗެލްސީއާ ދެކޮޅަށް ކުޅުނު މެޗުން އެ ޓީމު 2-1 އިން ބަލިވިތާ 24 ގަޑިއިރު ވެސް ނުވަނީސް، ޖެހިގެން އައި އާދީއްތަ ދުވަހެވެ. 

އެ ޓީމުގެ ކޯޗެއްގެ މަގާމަށް ސްޓީވް ކޫޕަރ އައްޔަނުކޮށްފައިވަނީ މި އަހަރުގެ ޖޫން މަހުއެވެ. އެއީ އެ ކްލަބަށް ޗެމްޕިއަންޝިޕް ކާމިޔާބުކޮށްދިން އެންޒޯ މަރެސްކާ ޗެލްސީއަށް ބަދަލުވުމަށް ނިންމުމުންނެވެ. ނަމަވެސް ކޫޕަރގެ އިރުޝާދުގެ ދަށުން 15 މެޗު ލެސްޓާރ ސިޓީއިން ކުޅުނު އިރު، އެ ޓީމު މޮޅުވެފައިވަނީ 3 މެޗުންނެވެ. މި ނަތީޖާތަކާއެކު، ރެލިގޭޝަން ޒޯނާ ދެމެދު އޮތީ 2 ޕޮއިންޓުގެ ފަރަގެކެވެ.