މާފުށިން ފަހު ވަގުތު ޖެހި ގޯލާއެކު، ދެވަނަ ބުރުގެ ފުރުސަތު އެއްކޮށް ގެއްލުނަކަ ނުދިން

ނައިންޓީ ޕްލަސް ގޯލްޑް ކަޕްގައި މިއަދު ހަވީރު ކެންދޫއާއި މާފުށި ބައްދަލުކުރި މެޗުގައި، ކެންދޫއިން ފުރަތަމަ ހާފު ނެގި ފަހު ވަގުތު ގެއްލުވާލައި، ދެވަނަ ބުރަށް ދިއުމަށް އޮތް ފުރުސަތު މާފުށިން ގެއްލުނަކަ ނުދިނެވެ. މި މެޗު 1-1 އިން އެއްވަރުވުމުން ކޮންމެ ޓީމަކަށް ލިބުނު ޕޮއިންޓާއެކު، ދެން މި ދެ ޓީމުން ޖެހޭނީ ގްރޫޕް-ޑީގެ ކުރީގައި އޮތް އަލިފުއްޓާއި ނައިފަރު ބަލިކުރާށެވެ.

މިއަދުގެ މެޗުގައި ކެންދޫއިން ލީޑު ނެގީ އެ ޓީމަށް ކުޅޭ، ފުރަތަމަ ޑިވިޝަނުގައި ގިނަ ކްލަބްތަކަށް ކުޅުމުގެ އިތުރުން ގައުމީ ފުޓްބޯޅަ ޓީމަށް ވެސް ކުޅެފައިވާ ގާސިމް ސައްމާމެއެވެ. އެ ޓީމަށް ލިބުނު ކޯނަރަކުން ގޯލު ކުރިމައްޗަށް ހުރަސްކޮށްލި ބޯޅަ އޭނާ ގޯލަށް ފޮނުވާލީ ބޮލުންނެވެ.

މާފުއްޓަށް މެޗުގެ ނަތީޖާ ބަދަލު ކުރުމަށް ގިނަ ފުރުސަތުތަކެއް ލިބުނު ނަމަވެސް، މި ފުރުސަތުތައް ދިޔައީ ނާކާމިޔާބު ވެގެނެވެ. އެ ޓީމަށް މެޗުގެ ނަތީޖާ ހަމަހަމަ ކުރެވުނީ، މެޗު ނިމެން މިނެޓަކަށް ވެފައިވަނިކޮށް ލިބުނު ޕެނަލްޓީއަކުން ކާމިޔާބު ކުރެވުނު ގޯލުންނެވެ. މި ޕެނަލްޓީ އެ ޓީމަށް ކާމިޔަބުކޮށްދިނީ އަލީ އުޒައިރު މުހައްމަދެވެ.

މި ގްރޫޕްގައި ނައިފަރާއި ކެންދޫ ބައްދަލުކުރާ މެޗު 3 ޑިސެމްބަރުގެ ރޭގަނޑު ކުޅުމަށް ތާވަލުކޮށްފައިވާއިރު، މާފުއްޓާއި އަލިފުށި ބައްދަލުކުރާ މެޗު އޮންނާނީ 4 ޑިސެމްބަރުގައެވެ. މި ގްރޫޕްގައި އަލިފުއްޓަށް 2 މެޗުން 6 ޕޮއިންޓު ލިބިފައިވާއިރު، ނައިފަރަށް ލިބިފައިވަނީ 3 ޕޮއިންޓެވެ. އެހެންކަމުން، 1 ޕޮއިންޓު ލިބިފައިވާ މާފުއްޓާއި ކެންދޫއިން ދެވަނަ ބުރުގެ ޖާގައެއް ޔަގީން ކުރުމަށް ދެން އޮންނަ މެޗު ކާމިޔާބު ކުރުން މުހިންމު ވާނެއެވެ.