ކުޅިވަރު
ލަ ޕާމާސް އިން 125 ވަނަ އެނިވާސަރީ ފާހަގަކުރަމުންދިޔަ ބާސެލޯނާ ބަލިކޮށްފި
ބާސެލޯނާގެ ލެމިން ޔަމާލު ލަ ޕާމާސްގެ ކުޅުންތެރިން ކައިރިން ބޯޅަ ހިފައިގެން ދަނީ--- ފޮޓޯ: ގެޓީ އިމޭޖަސް
ހުލާސާ
- މި ނަތީޖާއާއެކު، ރެލިގޭޝަނުގައި އޮތް ލަ ޕާމާސް ވަނީ ލީގުގެ 14 ވަނައަށް ކުރިއަށް ޖެހިލާފައި.
- ބާސެލޯނާގެ ކޯޗު ހޭންސް ފްލިކް ބުނީ، މި ނަތީޖާއާއެކު މާޔޫސްވެފައިވާ ކަމަށާއި، ސީޒަން ފެށުނު އިރު ހުރި ލެވެލްއަށް ޓީމުގެ ކުޅުމުގެ ފެންވަރު ގެންނަން ޖެހޭ ކަމަށް.
ސްޕެނިޝް ލަ ލީގާގެ ރެލިގޭޝަނުގައި އޮތް ލަ ޕާމާސް އިން، ޕޮއިންޓު ޓޭބަލްގެ އެންމެ ކުރީގައި އޮތް ބާސެލޯނާގެ 2-1 އިން ބަލިކޮށްފިއެވެ. ސިހުން ގެނުވި މި ނަތީޖާއާ ގުޅިގެން 125 ވަނަ އަހަރީ ދުވަސް ފާހަގަ ކުރަމުން ދިޔަ ބާސެލޯނާއަށް މިހާރު މިވަނީ ލީގުގައި މޮޅުނުވެވި 3 މެޗު ހަމަވެފައެވެ.
ބާސެލޯނާގެ ވެނިއު އެސްޓަޑި އޮލިމްޕިކް ލުއި ކޮމްޕެނީޒްގައި ކުޅުނު މި މެޗުގައި ފުރަތަމަ ލީޑު ނެގީ ވެސް ލަ ޕާމާސްއެވެ. ދެވަނަ ހާފުގެ ކުރީކޮޅު އެ ޓީމަށް މި ގޯލު ކާމިޔާބުކޮށްދިނީ ސެންޑްރޯ ރަމިރޭޒްއެވެ. އޭގެ 12 މިނެޓު ފަހުން ބާސެލޯނާއިން ވަނީ މެޗުގެ ނަތީޖާ ހަމަހަމަކޮށްފައެވެ. މި ސީޒަނުގެ 9 ވަނަ ގޯލާއެކު، ބާސެލޯނާއާ ނަތީޖާ ހަމަހަމަކޮށްދިނީ ރަފީނާއެވެ.
އަދި އޭގެ މާގިނައިރުތަކެއް ނުވަނީސް، ލަ ޕާމާސްގެ ފެބިއޯ ސިލްވަރ ކާމިޔާބުކުރި ގޯލާއެކު އެ ޓީމުން އަނެއްކާ ވެސް ލީޑު ނެގިއެވެ. އޭގެ ފަހުން ބާސެލޯނާ އިން އެ ޓީމުގެ ކޮޅަށް ނުރައްކާތެރި ބޯޅަތަކެއް ފޮނުވާލި ނަމަވެސް، އެ ޓީމުގެ ގޯލްކީޕަރ ޖެސްޕަރ ސިލެސެން ވަނީ ހުޝިޔާރުކަމާއެކު އެ ހަމަލާތައް ދިފާއުކޮށްފައެވެ.
މި ނަތީޖާއާއެކު، ރެލިގޭޝަނުގައި އޮތް ލަ ޕާމާސް ވަނީ ލީގުގެ 14 ވަނައަށް ކުރިއަށް ޖެހިލައިފައެވެ. އަދި މި މެޗުން ޕޮއިންޓެއް ނުލިބުމުން، ބާސެލޯނާއަށް ވުރެން 2 މެޗު މަދުން ކުޅެފައިވާ ރިއާލް މެޑްރިޑަށް ލީގުގެ އެއްވަނައަށް އެރުމުގެ ފުރުސަތު ފަހިވީއެވެ.
މެޗަށްފަހު ވާހަކަ ދައްކަމުން ބާސެލޯނާގެ ކޯޗު ހޭންސް ފްލިކް ބުނީ، މި ނަތީޖާއާއެކު މާޔޫސްވެފައިވާ ކަމަށާއި، ސީޒަން ފެށުނު އިރު ހުރި ލެވެލްއަށް ޓީމުގެ ކުޅުމުގެ ފެންވަރު ގެންނަން ޖެހޭ ކަމަށެވެ. އަދި މެޗުގެ %70 ބޯޅަ ގެންގުޅެވުނު ނަމަވެސް، ގޯލު ޖެހުން މަދުވުމަކީ ޓީމުގެ ބައެއް ކަންކަން ބަދަލުކުރަންޖެހޭ ކަމުގެ މެސެޖެއް ކަމުގައި އޭނާ ފާހަގަ ކުރިއެވެ.
އަނިޔާގެ ސަބަބުން ކުޅުމާއި ދުރުގައި ހުރި ލެމިން ޔަމާލް ވަނީ މި މެޗުގެ ސްކޮޑުގައި ހިމަނާފައެވެ. ނަމަވެސް އޭނާ ކުޅެން ނިކުމެފައިވަނީ މެޗުގެ ދެވަނަ ހާފުގައެވެ.
29 ނޮވެމްބަރ 1899 ގައި ފުޓުބޯޅަ ޓީމެއްގެ ގޮތުގައި ރެޖިސްޓްރީކުރި ބާސެލޯނާއިން، އެ ޓީމުގެ އަހަރީ ދުވަސް ފާހަގަ ކުރުމުގެ ގޮތުން ހޮނިހިރު ދުވަހުގެ މެޗުގައި ބޭނުންކޮށްފައިވަނީ، އެންމެ ފުރަތަމަ އެ ޓީމުން ބޭނުންކުރި ސްޓައިލްގެ ހުދު ސޯޓެވެ. އަދި ކްލަބުގެ އަހަރީ ދުވަހުސް ފާހަގަ ކުރުމަށް ހުކުރު ދުވަހުގެރޭ ބާސެލޯނާގައި ވަނީ ހާއްސަ ހަރަކާތްތަކެއް ވެސް ހިންގާފައެވެ.