ހައިވޭގައި އެކްސިޑެންޓްވެ ދެމީހަކަށް އަނިޔާވުމުން އަޅާނުލާދިޔަ ސައިކަލްދުއްވި މީހާ ހައްޔަރުކޮށްފި

ހުޅުމާލެ ހައިވޭގައި އިއްޔެ މެންދުރު ހިނގި ނުރައްކާތެރި އެކްސިޑެންޓެއްގައި ދެ މީހަކަށް އަނިޔާވެ، އެކްސިޑެންޓް ކުރުމަށްފަހު ފިލައިގެން ދިޔަ ސައިކަލު ދުއްވި މީހާ ފުލުހުން ވަނީ ހައްޔަރުކޮށްފައެވެ.

ފުލުހުން މަޢުލޫމާތު ދިންގޮތުގައި މި އެކްސިޑެންޓް ހިނގާފައިވަނީ ބާރު ސްޕީޑުގައި ދުއްވަމުންދިޔަ ސައިކަލެއް ގަވާއިދާ ޚިލާފަށް އޯވަރޓޭކް ކުރުމުގެ ސަބަބުން އެހެން ސައިކަލަކާ ޖެހިގެންނެވެ. މި އެކްސިޑެންޓްގައި އަނިޔާވި ދެ މީހުންނަކީ ދިވެހި ފިރިހެނަކާއި އަންހެނެކެވެ. އޭގެ ތެރެއިން އަންހެން މީހާއަށް އަދިވެސް ހޮސްޕިޓަލުގައި ފަރުވާ ދެމުންދާއިރު، ފިރިހެން މީހާ ވަނީ ދޫކޮށްލާފައެވެ.

އެކްސިޑެންޓް ކުރުމަށްފަހު ފިލައިގެން ދިޔަ ސައިކަލު ދުއްވި މީހާއަކީ ބ. އޭދަފުށި ފަސްމީރު، 22 އަހަރުގެ ޝުނާން މުހައްމަދު ޝާކިރު ކަމަށް ފުލުހުން ބުނެއެވެ. އޭނާ ހައްޔަރުކުރުމަށްފަހު ކޯޓަށް ހާޒިރުކުރުމުން، ފަސް ދުވަހުގެ މުއްދަތަށް ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައެވެ.