ޙައްޖު ކޯޕަރޭޝަނުން އުމްރާ ދަތުރުތަކުގައި ޓްރެކިން ޑިވައިސް ބޭނުންކުރަނީ

ޙައްޖު ކޯޕަރޭޝަނުން ބުނެފައިވާ ގޮތުގައި، ކުރިއަށް އޮތް ޑިސެންބަރު މަހު އުމްރާ ދަތުރުގައި ފުރަތަމަ ފަހަރަށް ޓްރެކިން ޑިވައިސް ބޭނުންކުރުމަށް ވަނީ ނިންމާފައެވެ. މިއީ ނިމިދިޔަ ޙައްޖު މޫސުމުގައި ކާމިޔާބުކަމާއެކު ބޭނުންކުރެވުނު ޓެކްނޮލޮޖީއެއް ކަމަށްވެއެވެ.

ޕީއެސްއެމް ނިއުސްގެ ހަފްތާ 52 ޕްރޮގްރާމުގައި ވާހަކަދައްކަވަމުން، ޙައްޖު ކޯޕަރޭޝަންގެ ޑެޕިއުޓީ މެނޭޖިންގ ޑިރެކްޓަރ އަލްއުސްތާޛް އަލީ ޝަރީފް ވިދާޅުވީ، މި ޑިސެންބަރުގައި 800 އެއްހާ މީހުން އުމްރާއަށް ގެންދިއުމަށް ހަމަޖެހިފައިވާ ކަމަށާއި، މިއީ ޙައްޖު ކޯޕަރޭޝަންގެ ހަވާލުގައި އެންމެ ގިނަ މީހުން އުމްރާއަށް ދާ ފަހަރު ކަމަށެވެ.

ޙައްޖާއި އުމްރާގެ އަޅުކަމަކީ ގިނަ އަދަދެއްގެ މީހުން ޖަމާވާ އަޅުކަމަކަށްވާތީ، މީހުން ގެއްލި މަގުއޮޅޭ ހާލަތްތައް ދިމާވާކަމަށް އަލީ ޝަރީފް ފާހަގަކުރެއްވިއެވެ. މީގެ ކުރިން މީހުން ގެއްލިގެން ގިނަ ވަގުތުތަކެއް ހޭދަވުމުގެ ސަބަބުން ނަފްސާނީ ގޮތުން ބަލިވުން ފަދަ މައްސަލަތައް ދިމާވެފައިވާ ކަމަށް އޭނާ ވިދާޅުވިއެވެ.

ނިމިދިޔަ ޙައްޖު މޫސުމުގައި ޓްރެކިން ޑިވައިސް ބޭނުންކުރުމުން ވަރަށް ރަނގަޅު ނަތީޖާއެއް ލިބުނު ކަމަށާއި، ގެއްލޭ މީހުން އަވަހަށް ހޯދައި ގެނެވުނު ކަމަށް އަލީ ޝަރީފް ފާހަގަކުރެއްވިއެވެ.

މީގެ އިތުރުން، ޙައްޖު ކޯޕަރޭޝަނުން ވަނީ ފާއިތުވި 11 އަހަރު އެ ކުންފުނި ހިންގާފައިވަނީ ގެއްލުމުގައި ކަމަށް ބުނެފައެވެ. ނަމަވެސް، ކުންފުނި ފައިދާވާ ކުންފުންޏަކަށް ހެދުމަށް މަސައްކަތްތަކެއް ކުރަމުންދާ ކަމަށާއި، ރިއަލް އެސްޓޭޓް ދާއިރާ ނޫން އެހެން ދާއިރާތަކުންވެސް އިންވެސްޓު ކުރުމަށް މަސައްކަތްކުރަމުންދާ ކަމަށް ޙައްޖު ކޯޕަރޭޝަނުން ވަނީ ހާމަކޮށްފައެވެ.