ޣައްޒާގެ ދަނޑުވެރިން ހައިހޫނުކަމުން ސަލާމަތްވުމަށް ފޭލިގެތައް ކައިރީގައި ދަނޑުވެރިކަން ކުރަނީ

އިސްރާއީލުން ޣައްޒާގައި ހިންގަމުންދާ ލާއިންސާނީ އުދުވާނުގެ ސަބަބުން ޣައްޒާގެ ދަނޑުބިންތައް ސުންނާފަތިވެފައިވާއިރު، ގެދޮރު ގެއްލިފައިވާ ފަލަސްތީނުގެ ދަނޑުވެރިން މިހާރު ދިރިއުޅެމުންދާ ފޭލިގެތައް ކައިރީގައި ގަސް އިންދައި ދަނޑުވެރިކަން ކުރަން ފަށައިފިއެވެ. މިއީ ކާބޯތަކެތީގެ އަގު އިންތިހާއަށް އުފުލި، ބަނޑަށް ޖެހުމުގެ ބިރު ބޮޑުވެފައިވާ ދަނޑިވަޅެއްގައި އާއިލާތަކަށް ބޭނުންވާ ކާނާ ހޯދުމަށް ކުރަމުންދާ މަސައްކަތެކެވެ.

އިސްރާއީލް ސިފައިން ޣައްޒާގެ ދަނޑުބިންތަކާއި، ވަޅުތަކާއި، އަދި ދަނޑުވެރިކަމަށް ބޭނުންކުރާ ނިޒާމުތައް މުޅިންއެކީ ހަލާކުކޮށްލުމުގެ ސަބަބުން ޣައްޒާގެ ދަނޑުވެރިކަމުގެ އުފެއްދުންތެރިކަން ވަނީ 15 އިންސައްތައަށްވުރެ ދަށަށް ގޮސްފައެވެ.

ޣައްޒާގެ އެގްރިކަލްޗަރ މިނިސްޓްރީން ހާމަކޮށްފައިވާ ގޮތުގައި، އިސްރާއީލުން ވަނީ ޣައްޒާގެ 178،000 ދޫނަމްގެ ދަނޑުބިމުގެ ތެރެއިން 94 އިންސައްތަ ބިން ސުންނާފަތިކޮށްލާފައެވެ. މީގެ ސަބަބުން އަހަރަކު އުފައްދާ 405،000 ޓަނުގެ ތަކެތި 28،000 ޓަނަށް ވަނީ ދަށްވެފައެވެ.

އދ. ގެ ކާބޯތަކެއްޗާއި ދަނޑުވެރިކަމާ ބެހޭ ޖަމްއިއްޔާ (އެފް.އޭ.އޯ) ގެ ތަޖުރިބާކާރު ފާދިލް އަލް-ޒުބީ ވިދާޅުވި ގޮތުގައި، މިއީ ހަމައެކަނި ހަނގުރާމައިގެ ސަބަބުން ލިބޭ ގެއްލުމެއް ނޫނެވެ. މިއީ ޣައްޒާގެ މުޅި ކާބޯތަކެތީގެ ނިޒާމު ހަލާކުކޮށްލައި، ފަލަސްތީނުގެ ރައްޔިތުންނަކީ އެހީއަށް ބަރޯސާވާ ބަޔަކަށް ހެދުމަށް ރޭވުންތެރިކަމާއެކު ހިންގާ އަމަލެކެވެ. އިސްރާއީލުން ވަނީ ޣައްޒާގައި ހުރި 4 މިލިއަނެއްހާ މޭވާ ގަސްތައް އުފުރާލާފައެވެ. މީގެ ތެރޭގައި އަލުން ހެއްދުމަށް އެތައް އަހަރެއް ނަގާނެ 1.6 މިލިއަން ޒައިތޫނި ގަސް ހިމެނެއެވެ.

ފޭލިގެތައް ކައިރީގައި ދަނޑުވެރިކަން ކުރަމުންދާ އެއް ދަނޑުވެރިއަކު ކިޔައިދިން ގޮތުގައި، އޭނާ މިހާރު ހައްދަމުންދަނީ ބާވަތްތަކުގެ ތެރޭގައި ޓޮމާޓޯ، ބަށި، މިރުސް އަދި މޮލޮކިއާ ފަތެވެ. ފެނާއި، އޮށާއި، އަދި ގަސްކާނާ ލިބުމުގައި ބޮޑެތި ދަތިތަކެއް ހުރި ނަމަވެސް، މިއީ އާއިލާގެ ބަނޑުފުރާނަ މުއްތިކުރުމަށް އޮތް ހަމައެކަނި މަގެވެ. ޣައްޒާގެ ގިނަ ދަނޑުވެރިންނަށް އެމީހުންގެ އަސްލު ބިންތަކަށް ދިއުމަކީ މަރުގެ ހުކުމެއް ފަދަ ނުރައްކާތެރި ކަމެކެވެ.

އެފް.އޭ.އޯއިން ވަނީ ޣައްޒާގެ ދަނޑުވެރިންނަށް އެހީތެރިވުމަށް 75 މިލިއަން ޑޮލަރުގެ އެހީއަކަށް އެދިފައެވެ. ނަމަވެސް ބައިނަލްއަގުވާމީ މުޖުތަމައުގެ ސަމާލުކަން އެހެން ކަންކަމަށް ހުއްޓިފައިވުމުގެ ސަބަބުން، މިހާތަނަށް ލިބިފައިވަނީ ބޭނުންވާ ފައިސާގެ 10 އިންސައްތައަށްވުރެ މަދު މިންވަރެކެވެ. ދަނޑުވެރިކަމުގެ ދާއިރާއަށް ލިބިފައިވާ ގެއްލުން މިހާރު 2.8 ބިލިއަން ޑޮލަރަށް އަރާނެ ކަމަށް އަންދާޒާ ކުރެވެއެވެ.

މިހާ ބޮޑެތި ގޮންޖެހުންތަކާއި ނުރައްކާތަކެއް ހުރި ނަމަވެސް، ޣައްޒާގެ ދަނޑުވެރިން ދަނީ އެމީހުންގެ ބިމާއި ދަނޑުވެރިކަމަކީ އެމީހުންގެ ދިރިހުރުމުގެ އަސާސް ކަމުގައި ދެކި، އެ މަސައްކަތް ހުއްޓާނުލައި ކުރިއަށް ގެންދަމުންނެވެ.