ޕާކިސްތާނުގެ ހުޅަނގު ދެކުނުގައި ދިން ހަމަލާއެއްގައި ފުލުހުންގެ ނުވަ މީހަކު މަރުވެއްޖެ

ޕާކިސްތާނުގެ ހުޅަނގު ދެކުނުގައި ހުންނަ ޑޭމް މަޝްރޫއެއްގެ ފުލުހުންގެ ޕޯސްޓަކަށް ދިން ހަމަލާއެއްގައި މަދުވެގެން ނުވަ ފުލުހުން މަރުވެފައިވާ ކަމަށް އެ ގައުމުގެ އޮފިޝަލުން ބުނެފިއެވެ.

ލޯކަލް ފުލުހުންގެ އޮފިޝަލެއް ކަމަށްވާ ޒަހޫރު އަހުމަދު އަންގާރަ ދުވަހު ވިދާޅުވީ، "މި ހަމަލާގައި ދެ އޮފިސަރުން ހިމެނޭހެން މަދުވެގެން ނުވަ ފުލުހުން މަރުވެފައިވާ" ކަމަށެވެ. ބަލޮޗިސްތާން ސަރުކާރުގެ ތަރުޖަމާނު ޝާހިދު ރިންދު ވިދާޅުވި ގޮތުގައި، ހަމަލާދިން މީހުން އަށް ފުލުހަކު ރަހީނުކުރި ނަމަވެސް، ފަހުން ސަލާމަތީ ބާރުތަކުން ވަނީ އެ އެންމެން ސަލާމަތްކޮށްފައެވެ.

މި ހަމަލާއާ ގުޅިގެން ސަލާމަތީ ބާރުތަކުން ހިންގި ޚާއްސަ އޮޕަރޭޝަނެއްގައި ހަމަލާދިން މީހުންގެ ތެރެއިން 15 މީހަކު މަރާލާފައިވާ ކަމަށް ރިންދު ވިދާޅުވިއެވެ. މި އޮޕަރޭޝަނަކީ ޕެރާމިލިޓަރީ، ފުލުހުން އަދި ކައުންޓަރ ޓެރަރިޒަމްގެ މުވައްޒަފުން ގުޅިގެން ކާމިޔާބުކަމާއެކު ކުރިއަށް ގެންދިޔަ އޮޕަރޭޝަނެއް ކަމަށް އޭނާ ފާހަގަކުރެއްވިއެވެ.

މި ހަމަލާގެ ޒިންމާ އަދި އެއްވެސް ޖަމާއަތަކުން އުފުލާފައެއް ނުވެއެވެ. ނަމަވެސް، އެއްވެސް ހެއްކެއް ދެއްކުމެއް ނެތި ރިންދު ވަނީ މި ހަމަލާގެ ފަހަތުގައި ވަނީ ޕާކިސްތާން ތާލިބާން (ޓީޓީޕީ) ކަމަށް ތުހުމަތު ކުރައްވާފައެވެ.

އަފްޣާނިސްތާނާއި އީރާނާ ބޯޑަރު ހިއްސާކުރާ، މައުދަނުން މުއްސަނދި ބަލޮޗިސްތާން ޕްރޮވިންސްގައި ދައުލަތުގެ ބާރުތަކާއި، ބޭރުގެ އިންވެސްޓްމަންޓްތަކާއި އިންފްރާސްޓްރަކްޗަރ މަޝްރޫއުތަކަށް އަމާޒުކޮށް ހަތިޔާރު އެޅި ގްރޫޕްތަކުން ދޭ ހަމަލާތަކާ ޕާކިސްތާނުން އަންނަނީ އަހަރުތަކެއް ވަންދެން ހަނގުރާމަކުރަމުންނެވެ.

އަފްޣާން ތާލިބާނުންނާ ވަކި ހަރަކާތެއްގެ ގޮތުގައި އޮންނަ ޓީޓީޕީއަކީ ބަލޮޗިސްތާނުގައި ވަރުގަދަ ނުފޫޒެއް އޮންނަ ޖަމާއަތެކެވެ. އެ ޖަމާއަތުން އަންނަނީ އިސްލާމްއާބާދުގައި އޮތް ސަރުކާރު ވައްޓާލުމަށް ގިނަ އަހަރުތަކެއް ވަންދެން ހަނގުރާމަކުރަމުންނެވެ.