އަނެއްކާވެސް ހޮރްމުޒްގައި ހަމަނުޖެހުންތަކެއް، އެމެރިކާއިން އިރާނަށް ހަމަލާދީފި

ހޮރްމުޒް ކަނޑުއޮޅިން ދަތުރުކުރަމުންދިޔަ ތިން އުޅަނދަކަށް އީރާނުން ހަމަލާދީފައިވާ ކަމަށް ބުނެ، ބުދަ ދުވަހުގެ ފަތިހުގެ ވަގުތެއްގައި އެމެރިކާ ސިފައިން އީރާނަށް ވަރުގަދަ ހަމަލާތަކެއް ދީފިއެވެ.

މި ހަމަލާތަކާއެކު، ދުނިޔޭގެ ބާޒާރުގައި އީރާނަށް ފާޅުކަން ބޮޑު ގޮތެއްގައި ސާފުނުކުރާ ތެޔޮ ވިއްކުމަށް ދީފައިވާ ހުއްދަވެސް އެމެރިކާއިން ވަނީ ބާތިލްކޮށްފައެވެ.

މި ހަމަލާތަކާ ގުޅިގެން އީރާނުން ވަނީ ވޮޝިންޓަނަށް ވަރުގަދަ އިންޒާރެއް ދީފައެވެ. އީރާނުން ބުނެފައިވަނީ "އެ ގައުމަށް ފެންނަ ކޮންމެ ފިޔަވަޅެއް އެޅުމަށް ފަސްނުޖެހޭނެ" ކަމަށެވެ. މީގެ ސަބަބުން މިހާރު ކުރިއަށްދާ ހަނގުރާމަ މެދުކަނޑާލުމަށް ވެފައިވާ ވަގުތީ އެއްބަސްވުން އުވި، މުޅި މެދުއިރުމަތި ބޮޑު ހަމަނުޖެހުމެއްގެ ތެރެއަށް ވެއްޓިދާނެ ކަމުގެ ބިރު ވަނީ ބޮޑުވެފައެވެ. އެމެރިކާގެ ކަނޑުގެ ސިފައިންގެ ފަސްވަނަ ފްލީޓް ގާއިމުވެފައިވާ ބަހްރޭންގައިވެސް ބުދަ ދުވަހުގެ ހެނދުނު ވަނީ މިސައިލް އެލާޓް ސައިރަން އަޅާފައެވެ.

އުޅަނދުތަކަށް ދިން ހަމަލާތަކާއި އެމެރިކާގެ ރައްދު ހަމަލާތައް މި އައީ، އުމުރުން 86 އަހަރުގައި އަވަހާރަވި އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީގެ ޖަނާޒާގެ ރަސްމިއްޔާތުތައް ކުރިއަށްދާ ދަނޑިވަޅެއްގައެވެ. ބުރާސްފަތި ދުވަހުގެ ނިޔަލަށް ކުރިއަށްދާ މި ޖަނާޒާގެ ދުވަސްވަރަކީ މަސްރަހު ފިނިވާނެ ދުވަސްވަރެއް ކަމަށް ބެލެވުނު ނަމަވެސް، ޖަނާޒާގެ ބައިވެރިން ދަނީ އެމެރިކާގެ ރައީސް ޑޮނަލްޑް ޓްރަމްޕާއި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ މަރާލުމަށް ގޮވާލަމުންނެވެ.

ޚާމަނާއީ ފަސްދާނުލުމަށްފަހު، ހޮރްމުޒް ކަނޑުއޮޅި ފުރިހަމައަށް ހުޅުވާލުމާއި އީރާނުގެ ނިއުކްލިއާ ޕްރޮގްރާމާ ގުޅޭގޮތުން ފަހުގެ އެއްބަސްވުމަކަށް އައުމަށް މަޝްވަރާތައް ފެށުމަށް އޮތީ ތާވަލުކުރެވިފައެވެ. ނަމަވެސް އަލަށް ދެވުނު މި ހަމަލާތަކާއެކު އެ މަޝްވަރާތަކަށް ވަނީ ހުރަސް އެޅިފައެވެ.

މިކަމާ ގުޅިގެން އީރާނުގެ މަޖިލީހުގެ ރައީސް މުހައްމަދު ބާގިރު ގާލީބާފް އެކްސްގައި ވިދާޅުވީ، "ބިރުދެއްކުމާއި މަޖުބޫރުކުރުމުގެ ޒަމާން މާޒީވެއްޖެ" ކަމަށާއި، އެމެރިކާގެ މި އަމަލުތަކުން އެއްވެސް ނަތީޖާއެއް ނުނިކުންނާނެ ކަމަށެވެ. އަދި އީރާނުން ދޫނުދޭނެ ކަމަށްވެސް އޭނާ ވިދާޅުވިއެވެ.