ސަކާގެ ތަފާތު މޮޅު ކުޅުމެއް ފެނިގެން ދިޔައިރު އާސެނަލް އިން ލިވަޕޫލާއި 6 ޕޮއިންޓު ކައިރިއަށް ޖެހިލައިފި

އިންގްލިޝް ޕްރިމިއަރ ލީގުގައި ހޮނިހިރު ދުވަހުގެރޭ ވެސްޓް ހޭމް އާއި އާސެނަލް ބައްދަލުކުރި މެޗުގައި ބުކަޔޯ ސަކާގެ ތަފާތު މޮޅު ކުޅުމެއް ފެނިގެން ގޮސްފައިވާއިރު، އާސެނަލްއިން ލީގުގެ އެއްވަނައިގައި އޮތް ލިވަޕޫލާއި 6 ޕޮއިންޓު ކައިރިއަށް ޖެހިލައިފިއެވެ. 

ވެސްޓް ހޭމްގެ ލަންޑަން ސްޓޭޑިއަމްގައި ކުޅުނު މި މެޗު 5-2 އިން އާސެނަލް ކާމިޔާބުކުރި އިރު މެޗުގެ ހުރިހާ ގޯލެއް ވެސް ފެނިގެން ދިޔައީ ފުރަތަމަ ހާފުއެވެ. އެ ޓީމުގެ ފުރަތަމަ ގޯލު ޑިފެންޑަރ ގެބްރިއެލް ކާމިޔާބުކުރި އިރު، ދެވަނަ ގޯލު ކާމިޔާބުކުރީ ޓްރޮސަރޑްއެވެ. މި ދެ ގޯލަކީ ވެސް ސަކާ ތަނަވަސްކޮށްދިން ދެ ފުރުސަތެވެ.

އޭގެ ފަހުން އާސެނަލް ގެ 3 ވަނަ ގޯލު ކާމިޔާބުކުރީ އެ ޓީމަށް ލިބުނު ޕެނަލްޓީއަކުން، ޓީމުގެ ކެޕްޓަން މާޓިން އެޑެގާޑްއެވެ. މިއީ ވެސްޓް ހޭމްގެ ޕެނަލްޓީ އޭރިޔާގެ ތެރެއަށް ސަކާ ވަންނަން އުޅުމުގެ ތެރޭގައި އޭނާއަށް ކުރި ފައުލަކާ ގުޅިގެން ލިބުނު ޕެނަލްޓީއެކެވެ. 

އޭގެ 2 މިނެޓު ފަހުން ކައި ހަވަޓްޒް ކާމިޔާބުކުރި ގޯލަކާއެކު، އާސެނަލްގެ ލީޑު 4 ގޯލަށް ފުޅާވެގެން ދިޔައެވެ. މިއީ ޓްރޮސާޑް ދުއްވާލި މޮޅު ތްރޫ ޕާހަކުން އޭނާ ކާމިޔާބު ކުރި ގޯލެކެވެ.

އޭގެ 4 މިނެޓު ފަހަށް ޖެހިލާއިރު، ވެސްޓް ހޭމް 2 ގޯލު ކާމިޔާބުކޮށް މެޗުގެ ތެރެއަށް ވަނުމަށް މަސައްކަތް ކުރިތަން ފެނުނެވެ. އެ ޓީމުގެ ފުރަތަމަ ގޯލު މެޗުގެ 38 ވަނަ މިނެޓުގައި އާރޮން ވެން-ބިސާކާ ކާމިޔާބުކުރިއިރު، ދެވަނަ ގޯލު ހިތްގައިމު ހިލޭ ޖެހުމަކުން ކާމިޔާބުކުރީ އެމަސަންއެވެ. 

ނަމަވެސް އެ ޓީމުގެ ހިތްވަރަށް އަނެއްކާވެސް މާޔޫސްކަން ގެނުވީ، އާސެނަލްއަށް ލިބުނު ކޯނަރެއް ވެސްޓް ހޭމްގެ ކީޕަރު، ލޫކަސް ފެބިއަންސްކީ ދިފާއުކުރަން އުޅުމުގެ ތެރޭގައި ލިބުނު ޕެނަލްޓީއަކުންނެވެ. ފުރަތަމަ ހާފުގެ އިތުރު ވަގުތުގައި ޕެނަލްޓީ ކާމިޔާބުކޮށް، މެޗުގެ ނަތީޖާ 5-2 އަށް ބަދަލުކުރީ ސަކާއެވެ.

މި މެޗުގެ ފުރަތަމަ ހާފުގައި 7 ގޯލު ފެނިގެން ގޮސްފައިވާއިރު، މި އަދަދަށް ޕްރިމިއަރ ލީގުގެ މެޗެއްގެ ފުރަތަމަ ހާފުގައި ގޯލު ފެނިގެން ގޮސްފައިވަނީ 4 ފަހަރެވެ. މީގެ ކުރިން ފުރަތަމަ ހާފުގައި މި އަދަދަށް ގޯލު ފެނިގެން ގޮސްފައިވަނީ 1997 ގައި ބްލެކްބާން އާއި ލީޑްސް ބައްދަލުކުރި މެޗެއްގަ އާއި، އެޕްރީލް 2000 ގައި ބްރެޑްފޯޑާއި ޑާބީ ބައްދަލުކުރި މެޗެއްގައާއި 2012 ގައި ރެޑިންނާއި މެންޗެސްޓަރ ޔުނައިޓެޑް ބައްދަލު ކުރި މެޗެއްގައެވެ.

މި މެޗުގައި ސަކާ ކުރި 2 އެސިސްޓާއެކު، އޭނާ މިހާރު މިވަނީ މި ސީޒަނުގުއި، ލީގުގައި އެކަނި ވެސް 10 އެސިސްޓް ކާމިޔާބުކޮށްފައެވެ.