ޒަކާތު ކޮންފަރެންސްގައި ބައިވެރިވުމަށް ވަޑައިގެންނެވި މެލޭޝިޔާގެ ބޭފުޅުންނާ ވަޒީރު ބައްދަލުކުރައްވައިފި

ދިވެހިރާއްޖޭގެ ޒަކާތު ހައުސްއިން އިންތިޒާމްކޮށްގެން ބާއްވާ ބައިނަލްއަޤުވާމީ ޒަކާތު ކޮންފަރެންސް، އިންޒެކްގައި ބައިވެރިވެވަޑައިގަތުމަށް ޓަކައި މެލޭޝިޔާއިން ވަޑައިގެންނެވި ބޭފުޅުންނާ އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު މިއަދު ބައްދަލުކުރައްވައިފިއެވެ.

މި ކޮންފަރެންސްގައި ބައިވެރިވެވަޑައިގަތުމަށް ޓަކައި މެލޭޝިޔާގެ އިންޓަނޭޝަނަލް ސެންޓަރ ފޮރ އެޑިއުކޭޝަން އިން އިސްލާމިކް ފައިނޭންސް (އިންސިފް)ގެ ފަރާތުން ވަޑައިގެންފައިވަނީ އެސޯސިއޭޓް ޕްރޮފެސަރ ޑރ. މަޖްދާ އިސްމާޢީލް އަބްދުލްމުޙުސިނާއި ހެޑް އޮފް އެކެޑެމީސް، ޑރ. މަޙްމޫން އަލްމަޤްރަބީއެވެ.

އިސްލާމީ ކަންތައްތަކާބެހޭ ވުޒާރާގައި ބޭއްވުނު މި ބައްދަލުކުރެއްވުމުގައި ވަޒީރު ވަނީ، ކޮންފަރެންސްގައި ބައިވެރިވެވަޑައިގަތުމަށް ޓަކައި ވަޑައިގެންދެއްވީތީ ޝުކުރުއަދާކުރައްވައި، ކުރިއަށް އޮތް ތާނގައި ވެސް ގުޅިގެން ކުރެވިދާނެ ކަންކަމާ ގުޅޭ ގޮތުން މަޝްވަރާކުރައްވާފައެވެ.

މި ބައްދަލުކުރެއްވުމުގައި އިސްލާމީ ކަންތައްތަކާބެހޭ ވުޒާރާގެ އިސްވެރިން ވެސް ބައިވެރިވެވަޑައިގެންނެވިއެވެ.

ބައިނަލްއަޤުވާމީ ޒަކާތު ކޮންފަރެންސް، އިންޒެކް ބޭއްވުމުގެ މަޤްޞަދަކީ ޒަކާތާ ގުޅޭ ގޮތުން މަޢުލޫމާތު ބަދަލުކޮށް، ތަޖުރިބާ ހިއްސާކުރުމާއި، ޒަކާތުގެ ނިޒާމު ހަރުދަނާކުރުމަށް މަސައްކަތްކުރުމެވެ. މި ކޮންފަރެންސްގައި ބައިވެރިވެވަޑައިގަންނަވާ ބޭރުގެ މާހިރުންގެ ޢިލްމާއި ތަޖުރިބާއިން ދިވެހިރާއްޖޭގެ ޒަކާތުގެ ނިޒާމަށް ފައިދާތަކެއް ކުރާނެ ކަމަށް އުއްމީދުކުރެވެއެވެ.