މިއަދު ދުނިޔޭގެ އާބާދީގެ 99 އިންސައްތަ މީހުންނަށް އެއްވަގުތެއްގައި އިރުގެ އަލިކަން ލިބޭނެ

ދުނިޔެ އޮންނަ ގޮތާއި އުތުރު ބިތުގެ ހޫނު މޫސުމުގެ ދުވަސްވަރާ ދިމާވުމުގެ ސަބަބުން، މިއަދު ދުނިޔޭގެ އާބާދީގެ ގާތްގަނޑަކަށް 99 އިންސައްތަ މީހުންނަށް އެއްވަގުތެއްގައި އިރުގެ އަލިކަން ނުވަތަ ފަތިސްވަގުތުގެ ފަނޑު އަލިކަން ތަޖުރިބާކުރެވޭނެކަމަށް ދިރާސާ ކުރާ ފަރާތްތަކުން ބުނެފިއެވެ.

ޖީއެމްޓީ ގަޑިން 11:10 ހާއިރު ހިނގާނެ މި ކަމުގައި ދުނިޔޭގެ 8.2 ބިލިއަން މީހުން ބައިވެރިވާނެއެވެ.

ގާތްގަނޑަކަށް އެއް މިނެޓަށް ދެމިގެންދާ މި ވަގުތުކޮޅުގައި، ދުނިޔޭގެ އެންމެ އާބާދީ ބޮޑު ސަރަހައްދުތަކަށް އިރުގެ އަލިކަން ލިބޭނެއެވެ. މީގެ ތެރޭގައި އުތުރު އެމެރިކާ، ދެކުނު އެމެރިކާ، ޔޫރަޕް، އެފްރިކާ އަދި އޭޝިއާގެ ބޮޑު ބައެއް ހިމެނެއެވެ. މި ވަގުތު އަނދިރިކޮށް އޮންނާނީ އޮސްޓްރޭލިއާ، ނިއުޒީލެންޑް، ދެކުނު އިރުމަތީ އޭޝިއާގެ ބައެއް ސަރަހައްދުތަކާއި އެންޓާކްޓިކާގެ އިތުރުން ކަނޑުގެ ބައެއް ސަރަހައްދުތަކެވެ.

އަލިކަން ލިބޭނެ މިންވަރު
މި ޚާއްސަ ވަގުތުގައި ދުނިޔޭގެ އާބާދީގެ 83 އިންސައްތަ ނުވަތަ 6.9 ބިލިއަން މީހުން ތިބޭނީ ސީދާ އިރުގެ އަލިކަމުގެ ތެރޭގައެވެ. މީގެ އިތުރުން 7 އިންސައްތަ މީހުންނަށް "ސިވިލް ޓްވައިލައިޓް" ނުވަތަ ބޭރުގައި މަސައްކަތް ކުރެވޭ ވަރަށް އަލިކަން ހުންނަ ފަނޑު އަލިކަން ލިބޭނެއެވެ. އަދި 6 އިންސައްތަ މީހުންނަށް "ނޯޓިކަލް ޓްވައިލައިޓް" ތަޖުރިބާކުރެވޭއިރު، 3 އިންސައްތަ މީހުން ތިބޭނީ "އެސްޓްރޮނޮމިކަލް ޓްވައިލައިޓް" ގައެވެ. މުޅި ދުނިޔެއިން ރޭގަނޑުގެ އަނދިރިކަން ތަޖުރިބާކުރާނީ އެންމެ 1 އިންސައްތަ މީހުންނެވެ.

މިއީ ހަމައެކަނި ޖުލައި 8 ގައި ހިނގާ ކަމެއް ނޫނެވެ. ކޮންމެ އަހަރެއްގެ މޭ 18 އިން ޖުލައި 17 އާ ދެމެދު އޮންނަ 60 ވަރަކަށް ދުވަހު، ކޮންމެ ދުވަހަކުވެސް ކުޑަ ވަގުތުކޮޅަކަށް ދުނިޔޭގެ ގާތްގަނޑަކަށް ހުރިހާ އިންސާނުންނަށް އެއްފަހަރާ އަލިކަން ލިބެއެވެ. ނަމަވެސް 2022 ވަނަ އަހަރު ސޯޝަލް މީޑިއާގައި ދައުރުވި ޕޯސްޓަކާ ގުޅިގެން ޖުލައި 8 އަކީ މިކަން ހިނގާ ހަމައެކަނި ދުވަސް ކަމަށް ގިނަ ބަޔަކަށް ވަނީ ގަބޫލުކުރެވިފައެވެ.

ޖޫން މަހުގެ ސޯލްސްޓިސްއަށް ވުރެ ޖުލައި 8 ޚާއްސަވާ ސަބަބު
އުތުރު ބިތުގެ އެންމެ ދިގު ދުވަސް ކަމަށްވާ ޖޫން މަހުގެ ސޯލްސްޓިސްއަށް ފަހު، އިރު ދެކުނަށް ދަތުރުކުރަން ފަށައެވެ. މީގެ ސަބަބުން އުތުރުގެ އާބާދީ މަދު ސަރަހައްދުތަކަށް ލިބޭ އަލިކަން ކުޑަވި ނަމަވެސް، އިންޑޮނޭޝިއާ އަދި ފިލިޕީންސް ފަދަ އާބާދީ ބޮޑު ސަރަހައްދުތަކަށް ލިބޭ އަލިކަން އިތުރުވެގެންދެއެވެ. މި ބަދަލާއެކު ސޯލްސްޓިސް ދުވަހަށް ވުރެ އިތުރު 10 މިލިއަން މީހުންނަށް ޖުލައި 8 ގައި އަލިކަން ލިބިގެންދެއެވެ.