މާސް ޗޮކްލެޓް ބާއެއްގައި ހުންނަންޖެހޭ ޑިޒައިން ނެތުމުން ކުންފުނިން މަޢާފަށް އެދި ބަދަލު ދީފި

މާސް ޗޮކްލެޓް ބާއެއްގައި އާންމުކޮށް ހުންނަ "ރިޕްލްސް" ޑިޒައިން ނެތި އޮތް ޗޮކްލެޓް ބާއެއް ގަތުމާ ގުޅިގެން އިނގިރޭސިވިލާތުގެ މީހަކަށް މާސް ކުންފުނިން މަޢާފަށް އެދި 2 ޕައުންޑް (215 ރުފިޔާ) ގެ ބަދަލެއް ދީފިއެވެ.

ބަކިންގަމްޝަޔަރގެ އޭލްސްބަރީގައި ދިރިއުޅޭ 34 އަހަރުގެ ހެރީ ސީގަރ ކިޔާ މީހަކު ބާމިންގަމްގައި ބޭއްވޭ ކްލާސިކް ކާރު ޝޯއަކަށް ދަތުރުކުރަމުން ދަނިކޮށް އޮކްސްފޯޑްޝަޔަރގެ ސަރވިސް ސްޓޭޝަނަކުން މާސް ޗޮކްލެޓް ބާއެއް ގަނެފައިވެއެވެ. އޭނާ ގަތް ޗޮކްލެޓް ބާގައި އާންމުކޮށް ހުންނަ ރިޕްލްސް ނެތްކަން ފާހަގަކުރުމާ ގުޅިގެން އޭނާ އެކަމުގެ މަޢުލޫމާތު ސޯޝަލް މީޑިއާގައި ހިއްސާކޮށްފައިވެއެވެ.

ހެރީ ސީގަރ ޑަލް މެންސް ކްލަބް ފޭސްބުކް ޕޭޖުގައި އެ ޗޮކްލެޓް ބާގެ ފޮޓޯ ޕޯސްޓްކުރުމާ ގުޅިގެން އެ ޕޯސްޓް ވަރަށް ބޮޑަށް ވައިރަލްވެ، އެތައްހާށް މީހުންގެ ސަމާލުކަން ލިބުނެވެ. މިކަމާ ގުޅިގެން ހެރީ ސީގަރ މާސް ވްރިގްލީ ޔޫކޭއާ ގުޅައި، މިއީ އައު ބާވަތެއްގެ ޗޮކްލެޓް ބާއެއްތޯ ސުވާލުކޮށްފައިވެއެވެ.

މާސް ކުންފުނިން ހެރީ ސީގަރއަށް ފޮނުވި ސިޓީއެއްގައި ބުނެފައިވަނީ މިކަމާ ގުޅިގެން މަޢާފަށް އެދޭ ކަމަށާއި، އޭނާގެ ޝަކުވާ ކޮލިޓީ ޓީމާ ހިއްސާކުރާނެ ކަމަށެވެ. އަދި ކުރިމަގުގައި އެހެން އެއްޗެއް ގަތުމަށް ބޭނުންކުރެވޭނެ 2 ޕައުންޑްގެ ވައުޗަރެއް ދީފައިވެއެވެ.

ހެރީ ސީގަރ ބުނެފައިވަނީ އޭނާ ބޭނުންވީ ހަމައެކަނި މިކަން ދިމާވި ސަބަބު އެނގުން ކަމަށާއި، އެހެންނަމަވެސް މާސް ކުންފުނިން އެ ސުވާލަށް ޖަވާބު ދިނުމަށް މާ ބޮޑު އިސްކަމެއް ނުދޭ ކަމަށެވެ. އަދި 2 ޕައުންޑްގެ ވައުޗަރަކީ ރަނގަޅު އަދަދެއް ކަމަށާއި، އޭގެ ސަބަބުން އިތުރު ދެ މާސް ބާ ގަނެވޭނެ ކަމަށް އޭނާ ބުނެފައިވެއެވެ.

މި މައްސަލައާ ގުޅިގެން ގިނަ ބަޔަކު ސޯޝަލް މީޑިއާގައި ކޮމެންޓްކޮށް، މާސް ކުންފުނިން ދިން ޖަވާބު އެކަށީގެންވާ ވަރަށްވުރެ ކުރުކަމަށާއި، ދިން ބަދަލުގެ އަދަދު ކުޑަކަމަށް ފާޑުކިޔާފައިވެއެވެ.