ކުޑަހުވަދޫން ޕާސްޕޯޓް ނެގޭނެ އިންތިޒާމް ހަމަޖައްސައިފި

ދ. ކުޑަހުވަދޫން "އިމުގާ" މެދުވެރިކޮށް އޮންލައިންކޮށް ހުށަހަޅާ ޕާސްޕޯޓުތައް ނެގޭނެ އިންތިޒާމް ހަމަޖައްސައިފިއެވެ. މި މަޢުލޫމާތު ހާމަކޮށްފައިވަނީ އިމިގްރޭޝަނުން ސޯޝަލް މީޑިއާގައި ކުރި ޕޯސްޓެއްގައެވެ.

އިމިގްރޭޝަނުން ބުނެފައިވާ ގޮތުގައި، "އިމުގާ" މެދުވެރިކޮށް ޕާސްޕޯޓަށް އެދި ހުށަހަޅާއިރު، ޕާސްޕޯޓް ނަގަން ބޭނުންވާ ތަން ނުވަތަ ކަލެކްޝަން ޕޮއިންޓެއްގެ ގޮތުގައި ކުޑަހުވަދޫ ޖެހުމުން ޕާސްޕޯޓް އެރަށުން ލިބޭނެއެވެ. ކުޑަހުވަދޫން ޕާސްޕޯޓު ނެގޭނީ ކޮންމެ ހަފްތާއެއްގެ ހޯމަ ދުވަހުއެވެ.

މި ޚިދުމަތް ފެށުމަކީ ކުޑަހުވަދޫ އާއި އެ އަތޮޅުގެ ރައްޔިތުންނަށް ލިބުނު ވަރަށް ބޮޑު ފަސޭހައެކެވެ. މީގެކުރިން އެރަށުގެ ރައްޔިތުންނާއި ކައިރީގައި އޮންނަ އެހެން ރަށްރަށުގެ ރައްޔިތުންވެސް ޕާސްޕޯޓް ބަލާ އަންނަން ޖެހެނީ މާލެއަށެވެ.

ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓުގެ ޚިދުމަތް ރައްޔިތުންނާ ގާތުން އަވަހަށް ފޯރުކޮށްދިނުމުގެ ކަންކަން މުޅި ރާއްޖެއަށް ފުޅާކުރުމުގެ މަޝްރޫއު މިދިޔަ ނޮވެމްބަރު މަހުގެ 16 ވަނަ ދުވަހު ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ އިފްތިތާހްކޮށްދެއްވާފައެވެ. މި މަޝްރޫއު އެއްކޮށް ނިންމުމަށް ހަމަޖެހިފައިވަނީ އަންނަ އަހަރުގެ ނިޔަލަށެވެ.

މިހާރު ޕާސްޕޯޓުގެ ޚިދުމަތް ލިބެނީ މާލެ ސަރަޙައްދުގެ އިތުރަށް ސިޓީތަކާއި ހއ. ދިއްދޫންނެވެ. އަދި މިއަހަރު ލ. ފޮނަދޫގައި އެ ޚިދުމަތް ފެށުމަށް އޮތީ ނިންމާފައެވެ.

ދ. އަތޮޅުން ޕާސްޕޯޓުގެ ޚިދުމަތް!
"އިމުގާ" މެދުވެރިކޮށް އޮންލައިންކޮށް ހުށަހަޅާ ޕާސްޕޯޓުތައް މިހާރު ދ. ކުޑަހުވަދޫ އިން ނެގުމުގެ އިންތިޒާމް ވަނީ ހަމަޖެހިފައި.@min_mohst @ShamaanW @HomeMinistrymv #DhivehiPassport #MaldivesImmigration pic.twitter.com/yEgCtQ6cPM

— Maldives Immigration (@ImmigrationMV) December 1, 2024