"ޖަޒީރާ" ބޯޓުގެ ބައެއް ތަކެތި އޮޔާދާތީ ދަތުރުވެރިން ސަމާލުވުމަށް އިލްތިމާސްކޮށްފި

ވ. ފެލިދޫ ކައިރިން ދަތުރުކުރި "ޖަޒީރާ" ބޯޓު އަޑިއަށް ގޮސް، އޭގެ ބައެއް ތަކެތި ކަނޑުމަތީގައި އޮޔާދާތީ އެ ސަރަހައްދުން ދަތުރުކުރާ އުޅަނދުފަހަރުން ސަމާލުވުމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ކޯސްޓްގާޑުން އިލްތިމާސްކޮށްފިއެވެ.

ކޯސްޓްގާޑުން ބުނި ގޮތުގައި، މި ބޯޓުގެ ބައެއް ތަކެތި އޮޔާދާ ކަމަށް ލަފާކުރެވެނީ ވ. ފެލިދޫގެ ގާތްގަނޑަކަށް 5 ނޯޓިކަލް މޭލު ހުޅަނގުންނެވެ. އެހެންކަމުން، އެ ސަރަހައްދުން ދަތުރުކުރާ އުޅަނދުފަހަރުން މިކަމަށް ޚާއްޞަ ސަމާލުކަމެއް ދިނުމަށާއި، ވަކިން ޚާއްޞަކޮށް ރޭގަނޑު ދަތުރުކުރާ ފަރާތްތަކުން އިތުރަށް ރައްކާތެރިވުމަށް ކޯސްޓްގާޑުން ވަނީ އިރުޝާދު ދީފައެވެ.

ވ.ފެލިދޫގެ 5 ނޯޓިކަލް މޭލު ހުޅަނގުން އަޑިއަށްދާ އުޅަނދެއްގެ ބައެއް ތަކެތި އޮޔާ ދާތީ، އެ ސަރަހައްދުން ދަތުރުކުރައްވާ ފަރާތްތަކުން ސަމާލުކަން ދެއްވުމަށް އިލްތިމާސްކުރަން.https://t.co/cMAFEMA2LO pic.twitter.com/tAj72lr7s0

— Maldives National Defence Force (@MNDF_Official) July 9, 2026

މި ހާދިސާގެ ރިޕޯޓް ފުލުހުންނަށް ލިބިފައިވަނީ މިއަދު ހަވީރު 15:26 ހާއިރުއެވެ. ބޯޓު އަޑިއަށް ދާން މެދުވެރިވި ސީދާ ސަބަބެއް މިހާތަނަށް އަދި ސާފެއް ނުވެއެވެ.

ނަމަވެސް، ބޯޓު އަޑިއަށް ދަނިކޮށް އޭގައި ތިބި ފަޅުވެރިން ވަނީ ސަލާމަތްކޮށްފައެވެ. މި މީހުން ސަލާމަތްކޮށްފައިވަނީ އެ ސަރަހައްދުން ދަތުރުކުރި "ވިލާ ދުވެލި" ނަމަކަށް ކިޔާ ލޯންޗަކުންނެވެ. މި ހާދިސާގައި އެއްވެސް މީހަކަށް ގެއްލުމެއް ލިބިފައިވާ ކަމުގެ ރިޕޯޓެއް ލިބިފައެއް ނުވެއެވެ.