ޚަބަރު
ދުނިޔޭގެ ނަން މަޝްހޫރު ޔުނިވަރސިޓީތަކުން ދިވެހިންނަށް ޖާގަ ހޯދައިދިނުމަށް ސަރުކާރުން މަސައްކަތްކުރަނީ

ރާއްޖޭގައި ބޭއްވުނު ދަސްވެނިވުމުގެ ހަފްލާއެއްގެ ތެރެއިން ފޮޓޯ: ތަޢުލީމާއި ބެހޭ ވުޒާރާ
ދުނިޔޭގެ ނަން މަޝްހޫރު ބޮޑެތި ޔުނިވަރސިޓީތަކުން ކިޔެވުމުގެ ފުރުޞަތު، ދިވެހިންނަށް ހޯދައިދިނުމަށް މަސައްކަތްކުރަމުންދާކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވުޒާރާއިން ވިދާޅުވެއްޖެއެވެ.
ސަރުކާރަށް 1 އަހަރު ފުރުމާ ގުޅިގެން ޕީއެސްއެމްއިން ގެނެސްދޭ "52 ހަފްތާ" ޕްރޮގުރާމްގައި ވާހަކަދައްކަވަމުން މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވުޒާރާގެ ސްޓޭޓް މިނިސްޓަރ ޑރ. ޢަބްދުﷲ ނަޒީރު ވިދާޅުވީ ރާއްޖޭގައި ދެވޭ އެންމެ މަތީ ފަންތީގެ ސްކޮލަރޝިޕަކީ ރައީސުލްޖުމްހޫރިއްޔާ ދެއްވާ ސްކޮލަރޝިޕް ކަމަށެވެ. އަދި މިއަހަރު މި ސްކޮލަރޝިޕް 19 ދަރިވަރަކަށް ދީފައިވާކަން ޑރ. ނަޒީރު ފާހަގަކުރެއްވިއެވެ.
ސްޓޭޓް މިނިސްޓަރ ވިދާޅުވީ ރައީސުލްޖުމްހޫރިއްޔާގެ ސްކޮލަރޝިޕަކީ ބޭރުގެ ޔުނިވަރސިޓީއަކުން އަދި ބޭނުން ދާއިރާއަކުން ކިޔަވަން ލިބޭ ފުރުޞަތަކަށްވާއިރު، ދުނިޔޭގެ ނަން މަޝްހޫރު ބޮޑެތި ޔުނިވަރސިޓީތަކަށް ވަންނަން ދަރިވަރުންނަށް ބައެއްފަހަރު ދަތިތައް ދިމާވާ ކަމަށެވެ. އެހެންކަމުން އެފަދަ ޔުނިވަރސިޓީތަކުން ދިވެހިންނަށް ޖާގަ ލިބޭކަން ކަށަވަރުކުރުމަށް މަސައްކަތްކުރަމުންދާކަމަށް ސްޓޭޓް މިނިސްޓަރ ވިދާޅުވިއެވެ.
އަޅުގަނޑުމެން މަސައްކަތް މިކުރަނީ އޮކްސްފޯޑާއި ހާވާޑާއި ކެމްބްރިޖްފަދަ ދުނިޔޭގެ ނަން މަޝްހޫރު ޔުނިވަރސިޓީތަކުން ރައީސުލްޖުމްހޫރިއްޔާގެ ސްކޮލަރޝިޕް ލިބޭ ދިވެހިންނަށް ކޮންމެ ޔުނިވަރސިޓީއަކުންވެސް 1 ނުވަތަ 2 ޖާގަ ކަށަވަރުކުރެވޭތޯ. މި ޔުނިވަރސިޓީތަކުން ޖާގަތަކަކީ ކުރިން ކަނޑައެޅިފައި ހުންނަ އެއްޗެއް ނޫން. އެހެންނަމަވެސް ޖާގަތައް ކުރިން ކަނޑައެޅި ދިވެހިންނަށް ލިބޭނެކަން ކަށަވަރުކުރެވޭނެ ނިޒާމެއް ޤާއިމްކުރުމުގެ މަސައްކަތް މިދަނީ ކުރަމުން
ސްޓޭޓް މިނިސްޓަރ ޢަބްދުﷲ ޑރ. ނަޒީރު ވިދާޅުވިއެވެ.
މީގެ އިތުރުން، ސަރުކާރުން ދަނީ މަތީ ތަޢުލީމް ޙާސިލްކުރުމަށް ގިނަ އަދަދެއްގެ ދަރިވަރުންނަށް ސްކޮލަރޝިޕްގެ ފުރުޞަތުތައް ފަހި ކޮށްދެމުންނެވެ. އަދި ލޯނުގެ އެހީތައްވެސް ދަނީ ދެމުންނެވެ. އެގޮތުން މަތީ ތަޢުލީމާބެހޭ ވުޒާރާގެ އެކި ފުރުޞަތުތަކުގައި 2249 ދިވެހިން ރާއްޖެއިން ބޭރުގައި ދަނީ މަތީ ތަޢުލީމު ޙާސިލްކުރަމުންނެވެ.
މި މަސައްކަތަކީ ދިވެހި ދަރިވަރުންނަށް ދުނިޔޭގެ އެންމެ ފެންވަރު ރަނގަޅު ތަޢުލީމީ މަރުކަޒުތަކުން ކިޔެވުމުގެ ފުރުޞަތު ފަހިކޮށްދިނުމަށް ސަރުކާރުން ކުރަމުންދާ މުހިންމު މަސައްކަތެކެވެ. މިކަމުގެ ސަބަބުން ދިވެހި ދަރިވަރުންނަށް ބައިނަލްއަޤްވާމީ ފެންވަރުގެ ތަޢުލީމެއް ޙާޞިލުކުރުމުގެ ފުރުޞަތު އިތުރުވެ، ޤައުމަށް ބޭނުންވާ ޒަމާނީ ހުނަރުތައް ލިބިފައިވާ ޤާބިލު ޒުވާނުން އުފެއްދުމަށް މަގުފަހިވެގެންދާނެއެވެ.