އެއަރޕޯޓް ޓެކްސް އާއި ފީ ނެގުމުގެ އައު ޤާނޫނަށް ޢަމަލުކުރަން ފަށައިފި

ދިވެހިރާއްޖޭގެ އެއަރޕޯޓްތަކުން ބޭރަށް ފުރާ ފަސިންޖަރުންގެ އަތުން ނަގާ ޓެކްސް އާއި ފީގެ އައު ޤާނޫނަށް މިއަދުން ފެށިގެން ޢަމަލުކުރަން ފަށައިފިއެވެ. މި އިސްލާހާ އެކު، ވެލާނާ އިންޓަރނޭޝަނަލް އެއަރޕޯޓުން ދަތުރުކުރާ ފަސިންޖަރުންގެ އަތުން އެއަރޕޯޓް ޑިވެލޮޕްމަންޓް ފީ ނެގޭނެ އެވެ. އެހެންނަމަވެސް، ރާއްޖޭގެ އެހެން ސަރަހައްދުތަކުގެ ބައިނަލްއަޤްވާމީ އެއަރޕޯޓްތަކުން ދަތުރުކުރާ ފަރާތްތަކުގެ އަތުން ނެގޭނީ ހަމައެކަނި ޑިޕާޗަރ ޓެކުހެވެ.

މި އައު ބަދަލާއެކު، އިކޮނޮމީ ކްލާހުގައި ދަތުރުކުރާ ބޭރު މީހުންގެ އަތުން ނެގޭ ޓެކްސް 30 ޑޮލަރުން 50 ޑޮލަރަށް އިތުރުވެފައިވެއެވެ. ބިޒްނަސް ކްލާހުގެ ފަސިންޖަރުންގެ އަތުން ނެގޭ އަދަދު 50 ޑޮލަރުން 120 ޑޮލަރަށް، އަދި ފަސްޓް ކްލާހުގެ ފަސިންޖަރުންގެ އަތުން ނެގޭ އަދަދު 90 ޑޮލަރުން 240 ޑޮލަރަށް އިތުރުވެފައިވެއެވެ. ޕްރައިވެޓް ޖެޓްތަކުގައި ދަތުރުކުރާ ފަރާތްތަކުގެ އަތުން ނެގޭ އަދަދުވެސް 120 ޑޮލަރުން 480 ޑޮލަރަށް އިތުރުވެފައިވެއެވެ. ނަމަވެސް، އިކޮނޮމީ ކްލާހުގައި ދަތުރުކުރާ ދިވެހި ފަސިންޖަރުންގެ އަތުން ނެގޭ ފީއަށް އެއްވެސް ބަދަލެއް ގެނެސްފައެއް ނުވެއެވެ.

މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން ހާމަކޮށްފައިވާ ތަފާސް ހިސާބުތަކުން ދައްކާ ގޮތުގައި، މިދިޔަ އަހަރު ރާއްޖެއިން ބޭރަށް ދަތުރުކުރި ދިވެހިންގެ 97.8 އިންސައްތަ އަދި ބިދޭސީންގެ 90.2 އިންސައްތަ ދަތުރުކޮށްފައިވަނީ އިކޮނޮމީ ކްލާހުގައެވެ. މިދިޔަ އަހަރު އެއަރޕޯޓް ޑިވެލޮޕްމަންޓް ފީގެ ގޮތުގައި 65.5 މިލިއަން އެމެރިކާ ޑޮލަރު އަދި ޑިޕާޗަރ ޓެކުހުގެ ގޮތުގައި 64.1 މިލިއަން ޑޮލަރު ލިބިފައިވާކަން މީރާއިން ހާމަކޮށްފައިވެއެވެ.

މި އައު ބަދަލާއެކު، އަންނަ އަހަރު 1.5 ބިލިއަން ރުފިޔާގެ އާމްދަނީއެއް ލިބޭނެކަމަށް އަންދާޒާކުރެވެއެވެ. މި ބަދަލުތައް ގެނެވިފައިވަނީ ރާއްޖޭގެ އެއަރޕޯޓްތަކުގެ ވަސީލަތްތައް ތަރައްޤީކުރުމަށާއި، ދައުލަތަށް ލިބޭ އާމްދަނީ އިތުރުކުރުމުގެ މަޤްޞަދުގައިކަން ފާހަގަކުރެވެއެވެ.