ޚަބަރު
ދިވެހި 15 ފުލުހެއް ޗައިނާގައި ބާއްވާ ސެމިނަރ އެއްގައި ބައިވެރިވުމަށް ފުރައިފި

ޗައިނާއަށް ފުރި ފުލުހުންނާއި ފުލުހުންގެ އިސްވެރިންނާއި ބައްދަލުކުރެއްވުން. ފޮޓޯ: ފުލުހުން
ދިވެހި 15 ފުލުހެއް ޗައިނާގައި ބާއްވާ ސެމިނަރ އެއްގައި ބައިވެރުވުމަށް ފުރައިފިއެވެ.
މި ސެމިނަރ އަކީ ޗައިނާގެ މިނިސްޓްރީ އޮފް ޕަބްލިކް ސެކިއުރިޓީން އިންތިޒާމުކޮށްގެން ހިންގާ "ސެމިނަރ ފޯރ އިންޓަރމީޑިއެޓް އެންޑް ސީނިއަރ ޕޮލިސް އޮފިސަރސް" އެވެ. މިސެމިނަރ ގައި ބައިވެރިވާ ފުލުހުން ފުރައިފައިވަނީ އިއްޔެއެވެެ.
މި ސެމިނާރ ބޭއްވުމަށް ހަމަޖެހިފައިވަނީ ޗައިނާގެ ހައިނަން ޕްރޮވިންސްގެ ހައިކޫގައެވެ. ސެމިނަރ ކުރިއަށްދާނީ 1 ޑިސެމްބަރ 2024 އިން 14 ޑިސެމްބަރ 2024 އަށް، ޖުމްލަ 14 ދުވަހުގެ މުއްދަތަށް ކަމަށް ފުލުހުން ބުނެއެވެ. މި ސެމިނާރގައި ބައިވެރިވާ އޮފިސަރުންގެ ތެރޭގައި ހިމެނެނީ ސުޕްރިންޓެންޑެންޓް އޮފް ޕޮލިސް ރަޙްމާ ސަޢީދު، ޗީފް އިންސްޕެކްޓަރ އޮފް ޕޮލިސް މުޙައްމަދު ދިމްހާމް އާއި ނަސްރުﷲ ޖަލީލުގެ އިތުރުން އިންސްޕެކްޓަރ އޮފް ޕޮލިސް ރޭންކުގެ 12 ފުލުހުން ކަމަށްވެސް ފުލުހުން ބުނެފައިވެއެވެ.
މި ސެމިނަރގައި ބައިވެރިވާ އޮފިސަރުންނަށް ޗައިނާގެ ރައީސް ޝީ ޖިންޕިންގގެ ގާނޫނީ ވިސްނުންފުޅުތަކާއި،ޗައިނާގެ ފުލުހުންގެ ސްޓްރެޓެޖީ، ފުލުހުންގެ ލީޑަރޝިޕް، ފްރޯޑް ހުއްޓުވުން، ކޮމިއުނިޓީ ޕޮލިސިންގ ނިޒާމު އަދި އާންމު ރައްޔިތުންގެ ސަލާމަތާއި ރައްކާތެރިކަމާ ގުޅޭ ދާއިރާތަކުން މައުލޫމާތާއި ތަޖުރިބާ ހިއްސާކުރާނެއެވެ. މީގެ އިތުރުން، މައްސަލަތައް ތަހުގީގު ކުރުމާއި، ކެލިގްރަފީ އަދި ސްވޮޓް ޓެކްޓިކްސްއާއި ތާއި ޖީ (ސެލްފް ޑިފެންސް) އާ ގުޅޭ ޢަމަލީ ތަމްރީނުތައްވެސް މި ސެމިނަރގައި ހިމެނޭކަމަށް ދިވެހި ފުލުހުންގެ ޚިދުމަތުން ވަނީ ބުނެފައެވެ.
މި ސެމިނަރގައި ބައިވެރިވުމަކީ ދިވެހި ފުލުހުންގެ ޚިދުމަތުގެ އޮފިސަރުންނަށް ޗައިނާގެ ފުލުހުންގެ ތަޖުރިބާއިން އުނގެނި، އަދި ދެ ޤައުމުގެ ފުލުހުންނާ ގުޅުން އިތުރަށް ބަދަހިކުރުމަށް ލިބިގެންދާ މުހިއްމު ފުރުސަތެއް ކަމަށް ދިވެހި ފުލުހުންގެ ޚިދުމަތުން ބުނެއެވެ.