ޚަބަރު
ކުޑަކުދިންގެ ހައްޤުތަކާއި ރައްކާތެރިކަން ކަށަވަރުކުރުމަށް ޚާއްޞަ މަސައްކަތްތަކެއް ކުރެވިގެންދާނެ: ސީޕީ ޝުޖާޢު

ފުނަދޫގައި ބޭއްވި ކުޑަކުދިންގެ ހަވީރުގައި ސީޕީ ޝުޖާޢު ބައިވެރިވެވަޑައިގަންނަވަނީ. ފޮޓޯ: ފުލުހުން
ކުޑަކުދިންގެ ހައްޤުތަކާއި ރައްކާތެރިކަން ކަށަވަރުކުރުމަށް ޚާއްޞަ މަސައްކަތްތަކެއް ކުރެވިގެންދާނެ ކަމަށް ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވެއްޖެއެވެ.
ސީޕީ ޝުޖާޢު މިހެން ވިދާޅުވީ ދުނިޔޭގެ ކުޑަކުދިންގެ ދުވަސް ފާހަގަކުރުމުގެ ގޮތުން އިއްޔެ ށ. ފުނަދޫގައި ބޭއްވުނު ކުޑަކުދިންގެ ހަވީރުގައި ވާހަކަފުޅު ދައްކަވަމުންނެވެ.
ސީޕީ ޝުޖާޢުގެ ވާހަކަފުޅުގައި ވިދާޅުވީ އަންނަ އަހަރަކީ ކުޑަކުދިންގެ ހައްޤުތަކާއި ރައްކާތެރިކަން ކަށަވަރުކުރުމަށް ޚާއްސަ މަސައްކަތްތަކެއް ކުރާ އަހަރަކަށް ވެގެންދާނެ ކަމަށެވެ.
ޤާނޫނުތަކުން ކުޑަކުދިންނަށް ލިބިފައިވާ އެއްވެސް ހައްޤަކަށް އަރައިގަންނަ ފަރާތްތަކުގެ މައްސަލަ ބެލުމުގެ ޒިންމާ އޮންނަނީ ދިވެހި ފުލުހުންގެ މުއައްސަސާއަށެވެ. ކުޑަކުދިންނާމެދު ހިންގޭ އަނިޔާވެރި ޢަމަލުތައް ރާއްޖޭގައިވެސް ހިނގަމުންދާކަން ފާހަގަކުރައްވައި، މިފަދަ އަމަލުތައް ހިންގާ ފަރާތްތަކާމެދު ޤާނޫނީ އިމުގެ ތެރެއިން އެންމެ ހަރުކަށި ފިޔަވަޅު އަޅާނެކަން ސީޕީ ޝުޖާޢު ޔަޤީންކޮށްދެއްވިއެވެ.ދިވެހި ފުލުހުންގެ ޚިދުމަތުގެ މަސައްކަތްތައް އަންނަ އަހަރަށް ތަރުތީބުކުރާއިރު، އެންމެ އިސްކަންދޭ ކަންތައްތަކުގެ ތެރޭގައި ކުޑަކުދިންގެ ރައްކާތެރިކަމަށް އިސްކަންދިނުން ކަނޑައެޅިގެންދާނެ ކަމަށް ޝުޖާޢު ވިދާޅުވިއެވެ. އެގޮތުން، ކުޑަކުދިންގެ ހައްޤުތަކާއި ރައްކާތެރިކަން ކަށަވަރުކުރުމަށް ހާއްސަ މަސައްކަތްތަކެއް ކުރެވިގެންދާނެ ކަމަށް ކޮމިޝަނަރ އޮފް ޕޮލިސް ވިދާޅުވިއެވެ.
ސީޕީގެ ވާހަކަފުޅުގައި ފަލަސްތީނުގެ ކުޑަކުދިންގެ ހާލަތަށް އިޝާރާތްކުރައްވަމުން، އެ ކުދިން އެތައް ހައްޤުތަކަކުން މަހުރޫމުވެ، ތަހައްމަލުކުރަމުންދާ ދަތި އުނދަގޫތަކާއި ބިރުވެރިކަމަކީ މިފަދަ ދުވަހެއް ފާހަގަކުރާއިރު ލިބޭ ހިތްދަތިކަމެއްކަން ފާހަގަކުރައްވައިފައިވެއެވެ.
މި ކުޑަކުދިންގެ ހަވީރަކީ ދިވެހި ފުލުހުންގެ ޚިދުމަތާއި ޔުނިސެފާއި ށ. ފުނަދޫ މުއައްސަސާތައް ގުޅިގެން ހިންގި ހަރަކާތެކެވެ.