ދަތުގެ އިންފެކްޝަނެއް ސިކުނޑިއާ ހަމައަށް ފޯރާފާނެތަ؟

ދަތުގެ އިންފެކްޝަނަކީ އާންމުކޮށް ކުޑަ ކަމެއްގެ ގޮތުގައި ފެނުނު ނަމަވެސް، އެކަމަށް އެކަށީގެންވާ ފަރުވާ ނުދެވިއްޖެނަމަ، އެއީ މުޅި ސިއްހަތަށް ނުރައްކާވެދާނެ ކަމެކެވެ. ގިނަ ފަހަރަށް ދަތުގެ އިންފެކްޝަންތައް ހުންނަނީ ހަމައެކަނި ދަތް ނުވަތަ ހިރުގަނޑާ ހަމައިގައެވެ. ނަމަވެސް، ވަރަށް މަދު ހާލަތްތަކެއްގައި މި އިންފެކްޝަން ހަށިގަނޑުގެ އެހެން ގުނަވަންތަކަށް ފެތުރިގެންދެއެވެ. މީގެ ތެރެއިން އެންމެ ނުރައްކާތެރި އެއް ކަމަކީ ދަތުގައި ހުންނަ ބެކްޓީރިއާ ސިކުނޑިއާ ހަމައަށް ދަތުރުކުރުމެވެ. މިއީ ފުރާނައަށް ނުރައްކާވާ ފަދަ ސިއްހީ މައްސަލަތަކެއް ކުރިމަތިކުރުވާ ކަމެކެވެ.

ދަތުގެ އިންފެކްޝަނެއް ހަގީގަތުގައިވެސް ސިކުނޑިއަށް ފޯރާފާނެތަ؟

މިއީ ވަރަށް މަދުން ނޫނީ ދިމާނުވާ ކަމެއް ނަމަވެސް، ހިނގާފާނެ ކަމެކެވެ. މާހިރުން ވިދާޅުވާ ގޮތުގައި، ދަތުގައި އުފެދޭ އިންފެކްޝަނަށް ވަގުތުން ފަރުވާ ނުދެވިއްޖެނަމަ، އެ އިންފެކްޝަން އަނގައިން ބޭރަށް ފެތުރިދާނެއެވެ. ބެކްޓީރިއާ ލޭގެ ތެރެއިން ދަތުރުކޮށްގެން ނުވަތަ މޫނުގެ ޓިޝޫތަކުގެ ތެރެއިން ގޮސް ސިކުނޑިއާ ހަމައަށް ފޯރައެވެ. މޫނުގައި ހުންނަ ބައެއް ލޭނާރުތަކަކީ "ވަލްވް" ހުންނަ ނާރުތަކެއް ނޫން ކަމުން، ބެކްޓީރިއާ ފަސޭހަކަމާއެކު ބޮލުގެ ނާށިގަނޑާ ދިމާއަށް ދަތުރުކުރުމުގެ ފުރުސަތު އޮވެއެވެ.

މީގެ ސަބަބުން ކުރިމަތިވެދާނެ ނުރައްކާތެރި މައްސަލަތައް

ދަތުގެ ބެކްޓީރިއާ ސިކުނޑިއާ ހަމައަށް ފޯރައިފިނަމަ، ތިރީގައިވާ ނުރައްކާތެރި ބަލިތައް ޖެހުމުގެ ފުރުސަތު އޮވެއެވެ:

ބްރެއިން އެބްސެސް: ސިކުނޑީގެ އެތެރޭގައި ދޮސް އުފެދުން.
މެނިންޖައިޓިސް: ސިކުނޑިއާއި މައިބަދައިގެ ނާރުތައް ވަށައިގެންވާ ދުލިފަށްތަކަށް އިންފެކްޝަން ޖެހުން.
އެހެނިހެން ބަލިތައް: މަދު ހާލަތްތަކެއްގައި ހަށިގަނޑުގެ އެހެން ގުނަވަންތަކަށްވެސް މި އިންފެކްޝަން ފެތުރިގެންދެއެވެ.
މި ދެންނެވި ބަލިތަކަކީ ކުއްލި ފަރުވާ ބޭނުންވާ، ވަގުތުން ފަރުވާ ނުދެވިއްޖެނަމަ ފުރާނަ ދިއުމުގެ ފުރުސަތު އޮތް ބަލިތަކެކެވެ.

ނުރައްކާ ބޮޑީ ކޮން ބަޔަކަށް؟

ދަތުގެ އިންފެކްޝަނަށް ފަރުވާ ނުދޭ ކޮންމެ މީހަކަށްވެސް މި ނުރައްކާ އޮތް ނަމަވެސް، ބައެއް މީހުންނަށް މިކަމުގެ ބިރު ބޮޑެވެ. އޭގެ ތެރޭގައި:

• ހަށިގަނޑުގެ ދިފާއީ ނިޒާމު ބަލިކަށި މީހުން.
  
• ހަކުރުބަލި ކޮންޓްރޯލް ނުކުރެވޭ މީހުން.
  
• ދަތުގެ ފަރުވާ ހޯދުމުގައި ލަސްކުރާ މީހުން.
  
• ދަތުގައި ދޮސް ހެދިފައިވާ ނުވަތަ ހިރުގަނޑުގެ ބަލިތައް ބޮޑުވެފައިވާ މީހުން.

ސަމާލުވާންޖެހޭ ނިޝާންތައް

ދަތުގެ އިންފެކްޝަނެއް ފެށޭއިރު އާންމުކޮށް ފެންނާނީ ދަތުގައި ރިއްސުން، ހިރުގަނޑު ނުވަތަ މޫނު ދުޅަވުން، ދޮސް އައުން، ހުން އައުން އަދި އަނގަ ހުޅުވަން އުނދަގޫވުން ފަދަ އަލާމާތްތަކެވެ. ނަމަވެސް އިންފެކްޝަން ސިކުނޑިއަށް ފެތުރެން ފެށުމުން ފެންނާނެ ނުރައްކާތެރި އަލާމާތްތަކުގެ ތެރޭގައި:

• ގަދައަށް ބޮލުގައި ރިއްސުން.
  
• ބޯ އެނބުރުން ނުވަތަ މާބޮޑަށް ނިދިއައުން.
  
• ހޮޑުލެވުން.
  
• ލޮލުގެ ފެނުމަށް ބަދަލު އައުން.
  
• ފިޓުޖެހުން.

މިފަދަ އަލާމާތެއް ފެނިއްޖެނަމަ ލަސްނުކޮށް ކުއްލި ފަރުވާ ހޯދަންވާނެއެވެ.

ބަލި ދެނެގަތުމާއި ފަރުވާ

ޑޮކްޓަރުން މިފަދަ ހާލަތްތައް ދެނެގަތުމަށްޓަކައި އެމް.އާރް.އައި ނުވަތަ ސީ.ޓީ ސްކޭން ހަދައެވެ. މެނިންޖައިޓިސް ހުރިތޯ ބެލުމަށް މައިބަދައިން ފެން ނަގައިގެން ޓެސްޓު ކުރެއެވެ.

ދަތުގެ އާދައިގެ އިންފެކްޝަނެއްނަމަ ދޮސް ބޭރުކޮށް، އެންޓިބަޔޮޓިކް ބޭނުންކޮށްގެން ފަރުވާ ދެވޭނެއެވެ. ނަމަވެސް އިންފެކްޝަން ސިކުނޑިއަށް ފޯރައިފިނަމަ، ހޮސްޕިޓަލުގައި އެޑްމިޓްކޮށްގެން، ބައެއް ފަހަރު ސާޖަރީ ހަދައިގެން ނޫނީ ފަރުވާ ނުދެވޭނެއެވެ.

ރައްކާތެރިވާނީ ކިހިނެއް؟

މިފަދަ ނުރައްކާތެރި ހާލަތަކުން ސަލާމަތްވުމަށް އޮތް އެންމެ ރަނގަޅު ގޮތަކީ ދަތުގެ ސިއްހަތަށް ސަމާލުކަން ދިނުމެވެ. ގަވާއިދުން ދަތްތައް ޗެކްކުރުމާއި، ދަތް ފަނިކެއުމުން ނުވަތަ ހިރުގަނޑުގެ މައްސަލައެއް ދިމާވުމުން ވަގުތުން ފަރުވާ ހޯދުމަކީ މުހިންމު ކަމެކެވެ. ދަތެއްގައި ރިއްސުމަކީ ކުޑަ ކަމެއްގެ ގޮތުގައި ދޫކޮށްނުލާށެވެ. އެއީ ހަށިގަނޑަށް ކުރިމަތިވަމުންދާ ނުރައްކަލެއްގެ ކުރީގެ އިންޒާރަކަށް ވެދާނެއެވެ. ދަތުގެ ސިއްހަތަށް ރައްކާތެރިވުމަކީ މުޅި ހަށިގަނޑުގެ ދުޅަހެޔޮކަމަށް އެޅޭ މުހިންމު ފިޔަވަޅެކެވެ.