ބޭރު ފައިސާ މާރުކުރުމާބެހޭ ބިލަށް ކާނި އަބްދުއްﷲ ގެ ތާޢީދު

ބޭރު ފައިސާ މާރުކުރުމާބެހޭ ބިލަށް ތާއީދުކުރައްވާކަމަށް ނެޝަނަލް ހޮޓެލްސް އެންޑް ގެސްޓް ހައުސް އެސޯސިއޭޝަން އޮފް މޯލްޑިވްސްގެ ރައީސް އަދި ރާއްޖޭގައި އެންމެ ފުޅާ ދާއިރާއެއްގައި ގެސްޓް ހައުސް ވިޔަފާރި ހިންގާ ކާނި ހޮޓެލްސްގެ ވެރިޔާ، އަބްދުﷲ ނަޝީދު ވިދާޅުވެއްޖެއެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާއި ކަމާބެހޭ މުއައްސަސާތައް ގުޅިގެން އެކުލަވާލާފައިވާ މި ބިލަކީ، ވިޔަފާރިތަކަށް ބޭރު ފައިސާއިން ލިބޭ އާމްދަނީން ވަކި މިންވަރެއް މާރުކުރުމާބެހޭ އުސޫލުތައް ބަޔާންކޮށްފައިވާ ބިލެކެވެ.

ކުރިން އެކުލަވާލާފައިވާ އުސޫލުތަކުގައި 50 އެނދަށްވުރެ ގިނަ އެނދު ހުންނަ ގެސްޓް ހައުސްތަކާއި ހޮޓާތައް ކެޓަގަރީ އޭ ގައި ހިމަނާފައި އޮތުމާ ގުޅިގެން ވިޔަފާރިވެރިން ވަނީ ކަންބޮޑުވުން ފާޅުކޮށްފައެވެ. ނަމަވެސް އައު ބިލުގައި މީހުން ދިރިއުޅޭ ރަށްރަށުގައި ހިންގާ ގެސްޓް ހައުސްތަކާއި ހޮޓާތަކުން ޑޮލަރު މާރުކުރަންޖެހޭ މިންވަރު މަދުކޮށް، ބީ ކެޓަގަރީގައި ހިމަނާފައިވާކަން އަބްދުﷲ ނަޝީދު ފާހަގަކުރެއްވިއެވެ.

މިއީ ރަށްރަށުގެ ތަރައްޤީ ދެމެހެއްޓެނިވި ގޮތެއްގައި ކުރިއަށްގެންދިއުމަށް ވަށާޖެހޭ ހައްލެއް ގެނެސްދޭނެ ކަމެއް

އަބްދުﷲ ނަޝީދު ވިދާޅުވިއެވެ.

އެމްއެމްއޭއިން މި ބިލު އެކުލަވާލުމުގެ މައިގަނޑު މަޤްޞަދަކީ ބޭރު ފައިސާ ލިބުމުގައި ހުރި ދަތިތައް ހައްލުކޮށް، ވިޔަފާރިވެރިންނާއި އާންމުންނަށް މެދުނުކެނޑި ބޭރު ފައިސާ ފޯރުކޮށްދެވޭނެ ނިޒާމެއް ޤާއިމްކުރުމެވެ.

މި ބިލުގެ ދަށުން ބޭންކިން ނިޒާމުގެ ތެރެއަށް ވަންނަ ބޭރު ފައިސާގެ ތެރެއިން 60 އިންސައްތަ ކޮންމެ ހަފްތާއަކު އެމްއެމްއޭއަށް ވިއްކަންޖެހޭނެއެވެ. މީގެ ސަބަބުން ބޭންކުތަކަށް ބޭރު ފައިސާ ލިބުމުގައި މިހާރު ދިމާވާ ދަތިތަކަށް ހައްލެއް ލިބޭނެކަމަށް އެމްއެމްއޭއިން ބުނެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމުގައި ޑޮލަރުގެ މައްސަލަ ހައްލުކުރުމަށް ފެށިފައިވާ މި މަސައްކަތަކީ ގިނަ ބައެއްގެ ތަޢުރީފް ލިބެމުންދާ މަސައްކަތެކެވެ.