Ads by Exprox

ޚަބަރު

ހދ. އަތޮޅު ކައުންސިލްގެ ބެންކޮކް ދަތުރަށް 9.5 ލައްކަ ރުފިޔާ، މަންފާވާ އެއްކަމެއްވެސް ދަތުރުގައި ކޮށްފައި ނުވޭ

ހދ. އަތޮޅު ކައުންސިލްގެ ބެންކޮކް ދަތުރަށް 9.5 ލައްކަ ރުފިޔާ، މަންފާވާ އެއްކަމެއްވެސް ދަތުރުގައި ކޮށްފައި ނުވޭ

ތައިލެންޑް ފޮޓޯ:އިންޓަނެޓް

އާމިނަތު ޔުމްނާ

އާމިނަތު ޔުމްނާ

02 ޑިސެމްބަރު 2024، 09:45

02 ޑިސެމްބަރު 2024، 09:45

މިދިޔަ އަހަރު ހދ. އަތޮޅު ކައުންސިލްގެ މުވައްޒަފުން ރާއްޖެއިން ބޭރަށް ކުރި ދަތުރަކަށް 952،885 ރުފިޔާ ހޭދަކޮށްފައިވާ އިރު، އެ ދަތުރުން ލިބުނު ތަޖުރިބާއިން ކައުންސިލްތަކަށް މަންފާ ލިބޭ ކަމެއް ކޮށްފައި ނުވާ ކަމަށް އޮޑިޓަރ ޖެނެރަލް އޮފީހުން ބުނެފިއެވެ.

އޮޑިޓަރ ޖެނެރަލް އޮފީހުން އާންމުކުރި ހދ. އަތޮޅު ކައުންސިލް އިދާރާގެ 2023 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި ބަޔާންކޮށްފައިވާ ގޮތުގައި، މިދިޔަ އަހަރުގެ އޮކްޓޯބަރު މަހު ތައިލޭންޑްގެ ބެންކޮކް ސިޓީއަށް ކުރި ދަތުރުގައި ކައުންސިލްގެ ހުރިހާ މެންބަރުންނާއި ސެކްރެޓަރީ ޖެނެރަލް އަދި ސީނިއަރ މެނޭޖްމަންޓްގެ މުވައްޒަފުން ހިމެނޭ ގޮތަށް 20 މުވައްޒަފުން ބައިވެރިވެފައިވެއެވެ.

10 ދުވަހަށް ކުރި މި ދަތުރުގެ މަޤްޞަދަކީ ތައިލޭންޑްގެ އެކިއެކި ކަންކަމާ ގުޅޭ ގޮތުން ތަޖުރިބާއާއި ތަމްރީން ހޯދުމާއި، ބައިވެރިންގެ ޤާބިލުކަން އިތުރުކުރުމާއި، އަތޮޅުގެ ކުރިއެރުމަށް ކުރެވޭނެ ކަންކަމުގައި ތައިލޭންޑްގެ އިންވެސްޓަރުން ހޯދުން ކަމަށް ބަޔާންކޮށްފައިވެއެވެ. ނަމަވެސް، އޮޑިޓަރ ޖެނެރަލް އޮފީހުން ފާހަގަކޮށްފައިވަނީ މި ދަތުރުން ހާސިލުކުރަން ބޭނުންވާ ކަންކަމާއި ލިބޭ ތަޖުރިބާ ކައުންސިލްތަކުގައި ބޭނުންކުރާނެ ގޮތް ދަތުރުކުރުމުގެ ކުރިން ކަނޑައަޅާފައި ނުވާ ކަމަށެވެ.

ދަތުރަށް ކޮށްފައިވާ ޚަރަދުތަކުގެ ތެރޭގައި ތައިލޭންޑްގެ ޓްރެއިނިންގ އިންސްޓިޓިއުޓްގެ ފީ އަދި ކެއުމުގެ ޚަރަދަށް 535،213 ރުފިޔާ، ބައިވެރިންގެ ދަތުރު ޚަރަދަށް 133،229 ރުފިޔާ، ޕޮކެޓް މަނީއަށް 46،260 ރުފިޔާ، މާލޭގެ ދަތުރު ޚަރަދަށް 28،000 ރުފިޔާ، އަދި ޓިކެޓްތަކަށް ޖުމްލަ 210،183 ރުފިޔާ ހިމެނެއެވެ.

އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، ދަތުރު ނިމި އެއް އަހަރު ފާއިތުވި އިރުވެސް ހދ. އަތޮޅުގެ އެއްވެސް ރަށެއްގައި މި ދަތުރުން ހޯދި ތަޖުރިބާއާއި ފަންނުގެ އަލީގައި އެއްވެސް މަޝްރޫޢެއް ފަށާފައި ނުވެއެވެ. އަދި ކައުންސިލަށް 2023 ވަނަ އަހަރު ލިބުނު އާމްދަނީން އަތޮޅުގެ ތަރައްޤީއަށް ފައިދާކުރާނެ ކަމެއް ކުރުމުގެ ބަދަލުގައި، އިދާރާގެ އާމްދަނީއާއި ބްލޮކް ގްރާންޓްގެ ގޮތުގައި ލިބިފައިވާ ފައިސާއިން ބޮޑު އަދަދެއް މި ދަތުރަށް ހޭދަކޮށްފައިވާކަމަށް އޮޑިޓް ރިޕޯޓުގައި ފާހަގަކޮށްފައިވެއެވެ.

އޮޑިޓް ރިޕޯޓުގައި އިތުރަށް ފާހަގަކޮށްފައިވަނީ މި ދަތުރަކީ ދައުލަތުގެ ބަޖެޓުގައި ހިމަނާފައި ނުވާ ދަތުރެއް ކަމަށެވެ. އަދި މިފަދަ ތަމްރީނުތަކަށް ހިނގާ ޚަރަދުތައް ދައުލަތުގެ ބަޖެޓުން ކުރުމުގެ ބަދަލުގައި ބޭރުގެ ފަރާތްތަކާ މަޝްވަރާކޮށްގެން ސްޕޮންސަރޝިޕް ހޯދައިގެން ޚަރަދުކުރުމަށް ލަފާދީފައިވެއެވެ. މީގެ އިތުރުން، ދައުލަތުގެ ބަޖެޓުން ޚަރަދުކުރާއިރު އިޤްތިޞާދީ ގޮތުން ރަށްރަށަށް ފައިދާވާނެ ކަންކަމަށް ޚަރަދުކުރުމަށްވެސް އޮޑިޓަރ ޖެނެރަލް އޮފީހުން ވަނީ އިލްތިމާސްކޮށްފައެވެ.


                    


                    

މި ލިޔުން ކިޔާލުމުން

Ads by MSS