އީފާސްގެ ނިޒާމް ހަރުދަނާކުރުމަކީ އެނިޒާމްގެ އަމާޒު : ޑރ. މުހައްމަދު ކިނާނަތު

ނެޝަނަލް ޑިޖިޓަލް އައިޑެންޓިޓީ، އީފާސްގެ ނިޒާމް ދުވަހެއް ދުވަހަކަށް ހަރުދަނާކުރުމަކީ އެ ނިޒާމުގެ އަމާޒު ކަމަށް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީގެ ސްޓޭޓް މިނިސްޓަރ، ޑރ. މުހައްމަދު ކިނާނަތު ވިދާޅުވެއްޖެއެވެ.

ސްޓޭޓް މިނިސްޓަރ މިހެން ވިދާޅުވީ އީފާސް އިން އޮންލައިން ފޭސް ވެރިފިކޭޝަންގެ ޚިދުމަތް އަލުން ފެށުމާ ގުޅިގެން ދެއްވި ބަސްދީގަތުމެއްގައެވެ. އީފާސްގެ ފޭސްވެރިފިކޭޝަނަށް ގެނައި ބަދަލާ ގުޅިގެން ޑރ. ކިނާނަތު ވިދާޅުވީ އަމާޒަކީ އީފާސްގެ ނިޒާމަކީ ދިވެހިރާއްޖޭގެ ޑިޖިޓަލް ހިދުމަތްތައް ފުޅާކުރުމުގައި އެންމެ އިސްދައުރެއް އަދާކުރާ، ރައްޔިތުންނާއި މުއައްސަސާތަކުގެ އިތުބާރާއި ޔަޤީންކަން ލިބިފައިވާ ނިޒާމަކަށް ހެދުން ކަމަށެވެ.

ނެޝަނަލް ސެންޓަރ ފޯ އިންފޮމޭޝަން ޓެކްނޮލޮޖީ (އެންސީއައިޓީ) އިން މައުލޫމާތު ދެއްވާފައިވާ ގޮތުގައި، އީފާސްގެ އޮންލައިން ފޭސް ވެރިފިކޭޝަންގެ ޚިދުމަތް އަލުން ފަށާފައިވަނީ ލެޓްވިއާގައި ރަޖިސްޓަރީ ކޮށްފައިވާ ރެގިއުލާ ފޮރެންސިކްސް ކުންފުނީގެ އެޕްލިކޭޝަނެއް ބޭނުންކޮށްގެނެވެ. މި ޚިދުމަތް ދޭނީ ބޭރުގެ އެއްވެސް ފަރާތަކަށް ރައްޔިތުންގެ ޒާތީ މައުލޫމާތު ހިއްސާކުރުމަކާ ނުލައި އެންސީއައިޓީގެ އެތެރޭގައި ކަމަށް އެ އިދާރާއިން ވިދާޅުވިއެވެ.

މިހާރު މި ޚިދުމަތް ލިބޭނީ އީފާސް ވެބްސައިޓް މެދުވެރިކޮށް ކަމަށާއި، އާންމުކޮށް ބޭނުންކުރާ ހުރިހާ ބްރައުޒަރތަކުން އީފާސްއަށް ލޮގިންކޮށް ޚިދުމަތް ލިބޭނެ ކަމަށްވެސް އެންސީއައިޓީން މައުލޫމާތު ދެއްވިއެވެ.

އީފާސްގެ މުހިންމު އެއް ބޭނުމަކީ ދައުލަތުން ފޯރުކޮށްދޭ ޑިޖިޓަލް ޚިދުމަތްތައް ފޯރުކޮށްދިނުމުގައި އެ ޚިދުމަތް ދެވެނީ ޚިދުމަތަށް އެދޭ އަސްލު ފަރާތަށްކަން ކަށަވަރުކުރުމެވެ. މިއީ އެހެން މީހުންގެ އައިޑެންޓިޓީ ވަގަށް ނަގައި އޮޅުވާލައިގެން މުއާމަލާތްތައް ހިންގުމުގެ ފުރުޞަތު ހަނިކުރުމުގެ މަޤްޞަދުގައި ފެށި ޚިދުމަތެކެވެ.

ސްޓޭޓް މިނިސްޓަރ ޑރ. ކިނާނަތު ވިދާޅުވިގޮތުގައި، މި އަމާޒު ހާސިލްކުރުމުގައި އަބަދުވެސް ރައްޔިތުންގެ އަޑުއަހައި އިހުސާސްތައް ދެނެގަނެ ޚިދުމަތް ދިނުމަށް ވަރަށް ބޮޑަށް އިސްކަންދެއްވާނެއެވެ.