ބަންޑާރަ ނައިބުގެ އޮފީސް ސިވިލް ސާވިސްއިން ވަކިކުރުމަށް ބިލެއް ހުށައަޅަނީ

ބަންޑާރަ ނައިބުގެ އޮފީހަކީ ސިވިލް ސާވިސްއިން ވަކި ޚިދުމަތެއްގެ ގޮތުގައި ހިންގުމަށްޓަކައި ޤާނޫނެއް އެކުލަވާލުމަށް ސަރުކާރުން ވަނީ ރައްޔިތުންގެ މަޖިލީހަށް ބިލެއް ހުށަހަޅާފައެވެ. މި ބިލް މަޖިލީހަށް ހުށަހެޅުއްވީ ސަރުކާރުގެ ފަރާތުން މާފަންނު ދެކުނު ދާއިރާގެ ޕީއެންސީގެ މެންބަރު އަބްދުﷲ ރިފާއު (ބޮޗޭ) އެވެ.

މިހާރު ބަންޑާރަ ނައިބުގެ އޮފީހަކީ ސިވިލް ސާވިސްގެ ދަށުން ހިންގާ ތަނެއްގެ ގޮތުގައި އޮތުމުން، އެ އޮފީހަށް ދިމާވާ ދަތިތަކަށް ހައްލެއް ހޯދުމަށްޓަކައި މި ބިލް ހުށަހެޅިފައިވާކަމަށް ސަރުކާރުން ބުނެފައިވެއެވެ. މި ދަތިތަކުގެ ތެރޭގައި ޤާބިލު ވަކީލުން ހޯދުމުގެ އުނދަގޫތަކާއި، އެހެން މިނިވަން މުއައްސަސާތަކާ އަޅާބަލާއިރު މުސާރަ ކުޑަވުން ހިމެނެއެވެ.

ބިލްގައިވާ ގޮތުން، ބަންޑާރަ ނައިބުގެ އޮފީހުގެ މުވައްޒަފުން ބަހާލެވިފައިވަނީ ލީގަލް ސާވިސް އަދި އެޑްމިނިސްޓްރޭޓިވް ސާވިސްގެ ދެ ބަޔަކަށެވެ. މުވައްޒަފުންގެ މުސާރައާއި އިނާޔަތްތައް ކަނޑައަޅާނީ ނޭޝަނަލް ޕޭ ކޮމިޝަނުގެ ސިޔާސަތުތަކާ އެއްގޮތަށް ފިނޭންސް މިނިސްޓަރެވެ. މީގެ އިތުރުން، މުވައްޒަފުންނަށް އެކަށީގެންވާ ސިއްޙީ އިންޝުއަރެންސް ނިޒާމެއް ޤާއިމުކުރުމާއި، ރިޓަޔަރމަންޓް އިނާޔަތްތައް ކަނޑައެޅުމުގެ ބައެޅުމުގެ ބާރު ވެސް މި ބިލުން ލިބިދެއެވެ.

މި ބިލްގެ ފުރަތަމަ ކިޔުން މިއަދު ބޭއްވުނު ރައްޔިތުންގެ މަޖިލީހުގެ ޖަލްސާގައި ވަނީ އިއްވާފައެވެ. މި ބިލް ފާސްވެއްޖެނަމަ، ބަންޑާރަ ނައިބުގެ އޮފީހަކީ ޤާނޫނުއަސާސީގައި ބަޔާންކޮށްފައިވާ ފަދައިން މިނިވަން މުއައްސަސާއެއްގެ ގޮތުގައި ހިންގޭނެ އޮފީހަކަށް ވެގެންދާނެއެވެ.